اقتىق جۇپتىڭ ءبىرى – ارگەنتينا

شىلدەنىڭ 10-ىنا قاراعان ءتۇنى سان-پاۋلۋدە گوللانديا جانە ارگەنتينا قۇرامالارى اراسىندا ەكىنشى جارتىلاي فينالدىق ماتچ وينالدى. ماتچتىڭ نەگىزگى جانە قوسىمشا ۋاقىتتارى 0:0 ەسەبىمەن تەڭ اياقتالىپ, جەڭىمپاز پەنالتي سەرياسى ارقىلى انىقتالدى.  وسىناۋ «لوتەرەيادا» ارگەنتينالىقتار 4:2 ەسەبىمەن باسىم ءتۇسىپ, فينالدا وينايتىن جۇپتىڭ ەكىنشى كومانداسى اتاندى. وسىمەن بۇل ەكى قۇراما الەم چەمپيوناتتارى شەڭبەرىندە بەسىنشى مارتە كوزبە-كوز كەزدەستى. مۇنىڭ الدىنداعى ويىنداردا ەكى دۇركىن جەڭىسكە جەتىپ, ءبىر رەت تەڭ ويناعان جانە ءبىر ماتچ­تا ۇتىلعان گوللانديالىقتاردىڭ دەسى باسىم ەدى. الايدا, سول جالعىز جەڭىس­تىڭ ءوزى ارگەنتينا فۋتبولى تاري­حىنداعى ەڭ جارقىن بەتتەردىڭ ءبىرى بولىپ قالدى. 1978 جىلى تىركەلگەن وسى ويىننىڭ قوسىمشا ۋاقىتىن 3:1 ەتىپ اياقتاعان بۇل ەلدىڭ كومانداسى ءبىرىنشى رەت پلانەتا چەمپيونى اتانعان ەدى. دەگەنمەن, گوللانديانىڭ ەكى ۇتىسىندا دا ايتارلىقتاي سالماق بار. ايتالىق, ول 1974 جىلى قارسىلاسىن 4:0 ەتىپ تالقانداپ ۇتىپ, فينالعا اپاراتىن جولدان قاقسا, 1998 جىلى 2:1 ەسەبىمەن تىزە بۇكتىرىپ, جارتىلاي فينالعا جىبەرمەي قويعان ەدى. اتالمىش ويىن الدىندا ەكى جات­­تىق­­تىرۋشى دا ءوزىنىڭ بۇرىنعى قۇرا­مى­نا ازداعان وزگەرىس ەنگىزدى. ماسەلەن, گول­­لانديانىڭ ستارتتىق ساپىندا جا­­را­­قاتىنان ساۋىققان تىرەكتى جار­تى­لاي قورعاۋشى نايدجەل دە يونگ پاي­دا بولسا, ارگەنتينالىقتار قۇرا­مىن­دا قاتاردان شىققان انحەل دي ما­ريانىڭ ورنىن ەنتسو پەرەس باستى. ءبى­رىن­شى تايم قورعانىس سيپاتىندا ءوتتى. ەكى جاق تا اسا ساق وينادى. شاما­سى, قار­­­سىلاستار وسىنىڭ الدىندا بول­عان ءبىرىنشى جارتىلاي فينالدىق كەز­دە­سۋ­دەگى اشىقتىق پەن اپاي-توپاي ءىس-قي­مىلدىڭ برازيليالىقتاردى قان­داي دارەجەگە جەتكىزگەنىنەن جاق­سى سا­باق السا كەرەك. ستاتيستيكا كور­سەت­كەن­دەي, گوللانديالىقتار 1998 جىل­دان بەرى العاشقى 15 مينۋتتا گول سوعىپ كور­­مەپتى. ال ارگەنتينالىقتار قور­عا­­نىس­تى تاس-ءتۇيىن ەتە وتىرىپ, قارسى شاب­ۋىلعا شىعىپ تۇرۋدى ءجون ساناپتى. سوندىقتان بۇلاردىڭ العاشقى 15 مي­نۋت قانا ەمەس, ءبىرىنشى 45 مينۋتتا دا ە­سەپ اشا الماعاندارىنا تاڭعالۋعا بولمايدى. كەزدەسۋ ءراسىمى ەكىنشى تايمدا دا وزگەرە قويمادى. قارسىلاستار ءبىر-ءبىرىن ءوز الاڭى جاققا تارتا كەلىپ, جالت بەرەتىن قارسى شولعىنعا كوبىرەك يەك ارتتى. وسى اڭدىسۋمەن ۋاقىت زىرىلداپ ءوتىپ بەردى. سول كەزدەرى الاڭدا ءتىپتى 92-ءشى ماتچىنا شىعىپ, اتى اڭىزعا اينالعان ديەگو مارادونانى بۇل جاعىنان باسىپ وزعان ليونەل مەسسيدىڭ جۇرگەنى دە بىلىنگەن جوق. ويىن وسىلايشا بىرتىندەپ وۆەرتايمعا جاقىنداپ كەلە جاتتى. تەك نەگىزگى مەرزىمنىڭ ەڭ سوڭىندا ارەن روببەننىڭ ماتچ تاعدىرىن شەشىپ كەتەتىن وتە قولايلى مۇمكىندىگى بولىپ ەدى. بىراق «قىزعالداقتار ەلىنىڭ» وكىلىن اقىرعى ساتىندە حاۆەر ماسكەرانو قۋىپ جەتىپ, ەركىن سوققى جاساۋىنا جول بەرمەدى. وۆەرتايمنىڭ الدىندا لۋي ۆان گال دا, الەحاندرو سابەليا دا ءبىر عا­نا ويىنشىدان الماستىردى. ارگەن­تي­نالىق جاتتىقتىرۋشى نەگىزگى ۋا­قىت­تىڭ اياعىنا قاراي ەنتسو پەرەس پەن گونسالو يگۋايننىڭ ورىندارىنا رودريگو پالاسيو مەن سەرحيو اگۋەرونى شىعارىپ, شابۋىل شەبىن ءبىرشاما جاڭارتىپ ەدى. ال لۋي ۆان گال ەكىنشى تايمنىڭ بارىسىندا ەسكەرتۋ العان برۋنو مارتينس يندي مەن 90 مينۋت ويناۋعا دايىن ەمەس نايدجەل دە يونگتى داريل يانمات پەن يوردي كلاسيگە اۋىستىردى. گوللانديالىق باپكەر, شاماسى, وتكەن جولعىداي ءۇشىنشى مۇمكىندىك رەتىندە قاقپاشى تيم كرۋلدى پەنالتي سەرياسى ءۇشىن الاڭعا شىعارۋدى كوزدەگەن دە بولۋى مۇمكىن. بىراق «قىزعىلت تۇستىلەردىڭ» شابۋىلداعى ەنجارلىعى ونى سوڭعى ساتتە الدىڭعى شەپتى نىعايتا تۇسۋگە ءماجبۇر ەتكەن سياقتى. ءسويتىپ, روبين ۆان پەرسيدىڭ ورنىن كلاس-يان حۋنتەلاار باس­تى. بۇلاردىڭ ءبارىنىڭ سوڭىنان سابەليا اقىرعى اۋىس-ءتۇيىستى جاسادى. ونىڭ ىرقىمەن شابۋىلدى كۇشەيتۋ ماق­ساتىندا ەسەكەل لاۆەسسيدىڭ ورنى­نا الاڭدا ماكسي رودريگەس پايدا بول­دى. سوعان قاراماستان, تابلوداعى ەسەپ 0:0 دەگەن قالپىنان مىزعىماي قويدى. ەكىنشى ەكسترا-تايمدا ارگەنتينا قۇراماسى گول سوعۋدىڭ تاماشا ءبىر مۇمكىندىگىن ءتيىمدى پايدالانا المادى. ەگەر قاقپاشى ياسپەر سيللەسسەنمەن بەتپە-بەت كەلگەن رودريگو پالاسيو ونى الداپ وتە العاندا, ماتچتىڭ تاعدىرى تولىق شەشىلۋى ابدەن ىقتيمال ەدى. سول سياقتى مەسسي جەتكىزگەن دوپتى قابىل­داپ العان ماكسي رودريگەس وتە جاقسى پوزيتسيادان دۇرىس سوققى جاساي العان جوق. ناتيجەسىندە فينالعا اپاراتىن ەكىنشى جولدامانىڭ تاعدىرىن پەنالتي سەرياسى ارقىلى شەشۋگە تۋرا كەلدى. سونىمەن, 11 مەترلىك سوققىلاردىڭ دا كەزەگى جەتتى. جەرەبە بويىنشا ونى گوللانديا قۇراماسى باستادى. «نۇكتەگە» ءبىرىنشى بولىپ رون ۆلاار كەلدى. ونىڭ ۇرعان دوبىن قاقپاشى سەرحيو رومەرو قايتارىپ تاستادى. ال ارگەنتينالىقتار سوققىسىن باستاعان ليونەل مەسسي ءمۇلت كەتكەن جوق – 1:0. گوللانديالىقتار ارەن روببەننىڭ كۇشىمەن ەسەپتى تەڭگەردى – 1:1. سوسىن ەسەكەل گاراي امەريكالىقتاردى قايتا العا شىعاردى – 2:1. بۇدان كەيىن ەۋروپالىق ۋەسلي سنەيدەردىڭ ۇرعان دوبىن رومەرو تاعى قاعىپ جىبەردى. مۇنىڭ ەسەسىنە, ارگەنتينالىق سەرحيو اۋەرو دوپتى قاقپا تورىنا توپ ەتكىزدى – 3:1. ءوز كومانداسى ءۇشىن ءتورتىنشى سوققىنى جاساعان ديرك كەيت تە ودان قالىسپادى – 3:2. ەندى ءبارىن ارگەنتينالىقتار سوعاتىن سوڭعى سوققى شەشۋى ابدەن مۇمكىن ەدى. بۇل راسىندا دا سولاي بولدى, ماكسي رودريگەس ۇرعان دوپ تا ەش توسقاۋىلسىز قارسى قاقپاعا گۇمپ ەتتى – 4:2. وسى ارقىلى ارگەنتينا قۇراماسى تۇپكى جەڭىستى قامتاماسىز ەتە ءبىلدى. ەندى 13 شىلدە كۇنى وتەتىن فينالدىق شاي­­قاستا گەرمانيا جانە ارگەنتينا قۇ­را­مالارى كەزدەسەدى. ماتچ استانا ۋا­قى­تىمەن تۇنگى ساعات 02-00-دە باستا­لادى. ال ءۇشىنشى ورىن ءۇشىن تالاس سول كۇنى ساعات 03-00-دە سورەدەن شىعادى. سەرىك ءپىرنازار, «ەگەمەن قازاقستان».