كوپسالالى وبلىستىق بالالار اۋرۋحاناسىندا ول 3 بالانىڭ بۇيرەك, كوكەت, وكپە, باۋىرىنا وپەراتسيا جاساپ, جەرگىلىكتى دارىگەرلەرمەن تاجىريبە الماستى.
«الدىمەن, تۋعان جەرىمە كەلىپ قۋانىپ تۇرمىن. وبلىس تاريحي جەتىسۋ دەگەن اتاۋىن الىپ جاتىر ەكەن. قۇتتىقتايمىن. تالدىقورعاندا مەنىڭ اكەم مۇحتار ارىن اتىندا مەكتەپ-گيمنازيا بار. بيىل – ءبىلىم ورداسىنىڭ 30 جىلدىق مەرەيتويى. سوعان وراي 3 بالاعا قايىرىمدىلىق وپەراتسيالارىن جۇرگىزۋدى ءجون كوردىك. ءبارى ءساتتى وتەدى دەپ سەنەمىن. ءبىزدىڭ كىشكەنتاي بالاپاندارىمىز امان بولىپ, قازاقتىڭ بالالارى كوبەيە بەرسىن. ءبىز بەرگەن ەم شيپا بولىپ, بالدىرعاندار شاپقىلاپ كەتسىن», دەدى ن.ارىن.
ودان كەيىن تاجىريبەلى دارىگەر «تۋعان ەلگە تاعزىم» اكتسياسى اياسىندا وبلىستىڭ مەديتسينالىق مەكەمەلەرىندە شەبەرلىك ساباعىن وتكىزدى. وسى ۋاقىتقا دەيىن 25 مىڭنان اسا وپەراتسيا جاساعان مامان ونىڭ ەكى مىڭعا جۋىعىن قايىرىمدىلىققا ارناعان ەكەن. بالالاردىڭ اتا-انالارى دارىگەردىڭ يگىلىكتى ىسىنە العىس جاۋدىردى.
قازىر تالدىقورعاندىق دارىگەرلەر كۇردەلى وپەراتسيالاردى الىسقا سىلتەمەي, اقىلداسىپ, وزدەرى جاساپ ءجۇر. ماسەلەن, بىلتىر وتكەن سەرگەي الەكسەەۆسكي ەسىمدى سىرقاتقا وكپە وبىرى دياگنوزى قويىلعان. بىراق ونكولوگتەر جۇرەك-قان تامىرلارى پاتولوگياسىنا بايلانىستى وعان وپەراتسيا جاساي الماپتى. وسىدان كەيىن بايلانىستى وبلىستىق كوپسالالى كلينيكانىڭ ونكولوگتەرى مەن تالدىقورعان قالاسىنىڭ وبلىستىق كارديولوگيالىق ورتالىعىنىڭ ماماندارى شۇعىل كونسيليۋم جينادى. ءسويتىپ, 62 جاستاعى ناۋقاسقا ءبىر مەزگىلدە ارالاس وپەراتسيا جاساۋ تۋرالى شەشىم قابىلداندى. وپەراتسيا جەتىسۋ وبلىسى كارديولوگيالىق ورتالىعىنىڭ بازاسىندا جاسالدى.
«تالدىقورعان قالاسىنىڭ كارديولوگيالىق ورتالىعىندا دارىگەرلەر بىرەگەي كۇردەلى وپەراتسيا جاسادى. وپەراتسيا وبلىستىق كوپسالالى كلينيكانىڭ دارىگەرلەرىمەن بىرلەسىپ جۇرگىزىلدى. ناۋقاستا جۇرەكتىڭ يشەميالىق اۋرۋى, اۋىر كورونارلىق پاتولوگيا, كلاپان جەتكىلىكسىزدىگى, ءريتمنىڭ بۇزىلۋى جانە ىلەسپە دياگنوزى قويىلعان. ناۋقاستا سول جاق وكپەنىڭ قاتەرلى ىسىگى بار», دەيدى كارديولوگيالىق ورتالىقتىڭ ديرەكتورى نۇرسان سەيىت ۇلى.
وبلىستىق كوپسالالى كلينيكانىڭ ديرەكتورى ماديار ومىرباەۆتىڭ ايتۋىنشا, وپەراتسيا ءساتتى وتكەن. بۇدان ءارى مامانداندىرىلعان ەمدەۋ جوسپارلانىپ وتىر. وپەراتسيالىق ماتەريالدى گيستولوگيالىق زەرتتەۋدەن كەيىن حيميوتەراپيا كۋرستارى, سونداي-اق ىسىك گەنىنىڭ مۋتاتسياسىن بولدىرماۋ ءۇشىن مولەكۋلالىق-گەنەتيكالىق زەرتتەۋ جۇرگىزىلمەك.
ناۋقاس كۇردەلى وپەراتسيادان سوڭ 2 ساعاتتان كەيىن تولىق ەسىن جيىپ, كەلەسى كۇنى تاڭەرتەڭ پالاتاعا اۋىستىرىلعان. قازىر سەرگەي الەكسەەۆسكي كارديولوگيالىق ورتالىقتا العاشقى وڭالتۋدان ءوتىپ ءجۇر. ءبىر اپتادان كەيىن ۇيىنە ورالۋعا مۇمكىندىك بار. الايدا ءبىر جىل ىشىندە ول دارىگەرلەردىڭ قاتاڭ باقىلاۋىندا بولادى جانە وبلىستىق كوپسالالى كلينيكادا ەمدەلۋدى جالعاستىرادى.
جەتىسۋ وبلىسى
