شىڭعىس ايتماتوۆ وقۋلارىنىڭ اگروتەحنيكالىق كوللەدجدە ۇيىمداستىرىلۋى بەكەر ەمەس. الاتاۋدىڭ ارعى بەتىنەن كەلگەن قالامگەر جامبىل قالاسىنداعى اۋىل شارۋاشىلىعى باعىتىنداعى تەحنيكۋمدا ءبىلىم نارىمەن سۋسىنداعانىن جۇرت جاقسى بىلەدى. اتالعان تەحنيكۋم ارادا ونداعان جىل وتكەندە قۇلان اۋىلىنا كوشىرىلگەن بولاتىن.
قالامگەر وقىعان ءبىلىم ورداسىنداعى بايقاۋدا ستۋدەنتتەر ەكى كەزەڭ بويىنشا سىنعا ءتۇستى. ء«سوز – قۇدىرەت قاشاندا» دەپ اتالعان العاشقى كەزەڭ قاتىسۋشىلارى كوركەمسوز وقۋ ارقىلى ءوزارا كىم مىقتىنى انىقتاسا, «تالانتتار ومىردە شىڭدالادى» كەزەڭىندە توپقا تۇسكەن وقۋ ورىندارىنىڭ تالانتتارى شىڭعىس شىعارمالارىنان ساحنالىق قويىلىم كورسەتتى.
ستۋدەنتتەر الەمگە ايگىلى قالامگەردىڭ «عاسىردان دا ۇزاق ءتۇن», ء«جاميلا», «قوش بول, گۇلسارى!», «اق كەمە» سىندى كوركەم شىعارمالارىنان ءۇزىندى وقىعانى كوكەيگە قوندى.
بايقاۋ قورىتىندىسىندا ء«سوز – قۇدىرەت قاشاندا» كەزەڭى بويىنشا تاراز سەرۆيس جانە تەحنولوگيا كوللەدجىنىڭ ستۋدەنتى دامير بالپىقوۆ جەڭىمپاز اتانسا, «پاراسات» كوللەدجىنىڭ ستۋدەنتى امانگەلدى جانسەرىك ءبىرىنشى ورىنعا, جامبىل پوليتەحنيكالىق جوعارى كوللەدجىنىڭ ستۋدەنتى اكىمجان قۋانىشبەك ۇلى مەن اباي اتىنداعى شىعىس قازاقستان گۋمانيتارلىق كوللەدجىنىڭ ستۋدەنتى ايسۇلۋ قابىشەۆا ەكىنشى ورىنعا لايىق دەپ تانىلدى. جۇلدەلى ءۇشىنشى ورىن قاسكەلەڭ مادەنيەت كوللەدجىنەن كەلگەن دىنمۇحامەد تولەپبەرگەن, قۇلان اگروتەحنيكالىق كوللەدجىنىڭ ءۇمىتى ءامينا جۇمامۇرات, تۇركىستان كوپسالالى اگرارلىق كوللەدجىنىڭ ستۋدەنتى پەريزات ابدىراحمانوۆاعا بۇيىردى.
«تالانتتار ومىردە شىڭدالادى» كەزەڭىندە «شىڭعىسحاننىڭ اق بۇلتى» قويىلىمىمەن دارالانعان تۇركىستان كوپسالالى قولونەر كوللەدجىنىڭ ستۋدەنتتەرى توپ جارسا, تالدىقورعان اگروتەحنيكالىق كوللەدجىنىڭ ستۋدەنتتەرى جۇلدەلى ءبىرىنشى ورىندى يەلەندى. ەكىنشى ورىن ي.ابدىكارىموۆ اتىنداعى قىزىلوردا اگرارلىق تەحنيكالىق جوعارى كوللەدجى مەن قاسكەلەڭ گۋمانيتارلىق تەحنيكالىق كوللەدجى ستۋدەنتتەرىنە بۇيىرسا, اباي اتىنداعى جامبىل گۋمانيتارلىق كوللەدجى جانە بايزاق, اباي وبلىسىنان كەلگەن بەسقاراعاي كوللەدجىنىڭ ستۋدەنتتەرى ۇزدىك ۇشتىكتى تۇيىندەدى.
جامبىل وبلىسى,
تۇرار رىسقۇلوۆ اۋدانى
