ءماجىلىس وتىرىسىندا دەپۋتات قوعامعا كەرى اسەر ەتىپ جاتقان بلوگەرلەرگە قاتىستى ماسەلە كوتەردى. ولار اقپاراتتىڭ دايەكتىلىگىن تەكسەرمەي, «فەيك» تاراتىپ جاتادى. الايدا, سول ءۇشىن جاۋاپكەرشىلىك الىپ, جازالانىپ جاتقاندار از. وسىعان بايلانىستى ءماجىلىس دەپۋتاتى بلوگەرلەردىڭ جاۋاپكەرشىلىگىن كۇشەيتۋ كەرەگىن جەتكىزدى.
ءماجىلىس دەپۋتاتىنىڭ ايتۋىنشا, ءدال وسى بلوگەرلەر تالاي جىلدان بەرى ۇمىت بولعان قارجى پيراميدالارىنىڭ جاندانۋىنا دا سەبەپ بولىپ وتىر.
«ەلدە بولىپ جاتقان ءتۇرلى الەۋمەتتىك جاعدايلاردى ءوز ىڭعايىنا بۇرمالاپ, وعان ۇلتارالىق رەڭ بەرىپ, ەلگە جالعان اقپارات تاراتقان بلوگەرلەردىڭ دە ءىسى مايشاممەن قارالۋى كەرەك ەدى. راستالماعان قاۋەسەتتىڭ الەۋمەتتىك جەلى ارقىلى تەز تاراۋىنان قورداي وقيعاسىنىڭ نەمەن اياقتالعانى بارىڭىزگە ءمالىم», دەدى دەپۋتات.
اناس باققوجاەۆ ساپالى كونتەنت قالىپتاستىرىپ جۇرگەن بلوگەرلەردىڭ بارىن جوققا شىعارمايتىنىن ايتتى. دەگەنمەن, جالعان اقپارات تاراتىپ, حالىقتى الداپ جۇرگەندەردىڭ ساڭىراۋقۇلاقشا قاپتاپ كەتكەنىن دە ەسكە سالدى.
ء«بىز قىسقا عانا ۋاقىت ىشىندە ءسوزى مەن ىسىنە جاۋاپ بەرە المايتىن بلوگەرلەردىڭ وتانىنا اينالىپ كەتكەندەيمىز. بۇل - قوعام ءۇشىن دە, مەملەكەت ءۇشىن دە قاۋىپتى قۇبىلىس. مۇنىڭ ءبارى بىزدەگى زاڭنامادا بلوگەر مارتەبەسى ايقىندالماعاننان بولىپ وتىر. جاۋاپكەرشىلىكتىڭ جوق ەكەنىن سەزىنگەن مۇنداي ادامدار ارينە, ويىنا كەلگەنىن ىستەيدى. كوپكە توپىراق شاشۋدان اۋلاقپىن. حالىققا شىن جاناشىر بلوگەرلەر دە از ەمەس. كوپبالالى جالعىزباستى انالارعا, مۇگەدەك جاندارعا جاردەم بەرىپ, الەۋمەتتىك جەلى ارقىلى حالىققا پايداسىن تيگىزىپ جۇرگەن جەرلەستەرىمە تەك باس يەمىن. وقىرمانعا قىزىقتى ءارى پايدالى اقپارات تاراتىپ, جەكە بلوگىن جۇرگىزىپ جۇرگەندەرگە دە ايتار داۋىمىز جوق», دەدى ول.
