جيىندا اڭگىمە ارقاۋىنا اينالعان ەڭ باستى تاقىرىپ – پرەزيدەنت قاسىم-جومارت توقاەۆتىڭ «ادىلەتتى مەملەكەت. ءبىرتۇتاس ۇلت. بەرەكەلى قوعام» جولداۋىنىڭ ورىندالۋىنا ارداگەرلەردىڭ ىقپالى. سوڭعى ءبىر جىلدا ەلىمىزدە 5 ءىرى ساياسي ناۋقان, اتاپ ايتقاندا رەفەرەندۋم, پرەزيدەنت سايلاۋى, سەنات, ءماجىلىس جانە ءماسليحاتتار سايلاۋلارى ءوتىپ, جاڭا قازاقستاندى قۇرۋ جولىندا ماڭىزدى دا قاجەتتى قادامدار جاسالعانىن تىلگە تيەك ەتكەن ورتالىق كەڭەس توراعاسى باقتىقوجا سالاحاتدين ۇلى ەل ارداگەرلەرى بۇل ۇدەرىستەردىڭ بارىنە ۇمىتپەن قاراپ, قولداپ وتىرعانىن جەتكىزدى.
– شىنايى باسەكە ورىن العان پرەزيدەنت سايلاۋىنا ەلمەن بىرگە ارداگەرلەرىمىز دە اتسالىسىپ, داۋىس بەرىپ, بەلسەندىلىك تانىتقانىنا وسى وتىرعان بارشامىز كۋامىز. قاسىم-جومارت كەمەل ۇلىنىڭ ادىلەتتى قازاقستان قۇرۋ باعىتىنداعى رەفورمالارىن ارداگەرلەر ءبىراۋىزدان قولداپ, حالىققا اعالىق ىقپال ەتىپ ءجۇر. جاقىندا ءماجىلىس سايلاۋى پرەزيدەنتىمىزدىڭ رەفورمالارىنا سايكەس ءوتتى. بارلىق پارتيالارعا سايلاۋعا قاتىسۋعا بىردەي مۇمكىندىك بەرىلدى. ناتيجەسىندە, ماجىلىسكە ساياسي ۇستانىمدارى ءارتۇرلى 7 پارتيا ءوتتى. «Amanat» پارتياسى ۇسىنعان تىزىممەن ماعان ءماجىلىس دەپۋتاتى مانداتى تاپسىرىلدى. ونى ارداگەرلەر قاۋىمىنا كورسەتىلگەن زور سەنىم دەپ قابىلدادىم, – دەدى ول.
قازىرگى الەمدىك ساياساتتىڭ سىناپتاي سىرعىپ, اۋمالى-توكپەلى بولىپ تۇرعان ۋاعىندا مەملەكەت باسشىسىنىڭ اينالاسىنا ۇيىسىپ, جاڭا دا ادىلەتتى قازاقستاندى بىرگە قالىپتاستىرۋعا شاقىرعان ءماجىلىس دەپۋتاتى ەلدەگى بىرقاتار يگى وزگەرىس پەن كەزەك كۇتتىرمەس پروبلەماعا توقتالدى. ماسەلەن, جالاقى مەن زەينەتاقىنى ءوسىرۋ, ەڭبەك جانە حالىقتى الەۋمەتتىك قولداۋ مينيسترلىگى ازىرلەگەن «بەلسەندى ۇزاق ءومىر» ۇلتتىق جوسپارى, قاريالارعا ارنالعان گەرونتولوگيالىق مەديتسينا بولىمشەلەرىن اشۋ, ولارعا بەرىلەتىن الەۋمەتتىك كومەك, جۇمىسپەن قامتۋ, جاستار تاربيەسى, ت.ب. جايتتار تۋرالى ايتتى.
– بيىل 2 اقپاندا پرەزيدەنت قابىلداۋىندا بولعانىمدا بىرنەشە ۇسىنىس جاساعان ەدىم. سونىڭ ءبىرى – «ىسكەرلىك جانە جاناشىرلىق» جوباسى. قاسىم-جومارت كەمەل ۇلى ۇسىنىستارىمدى زور ىقىلاسپەن قابىلداپ, ۇكىمەتكە تاپسىرما بەرەتىنىن ايتتى. ۇزاماي, 6 اقپاندا ۇسىنىسىم قابىلدانعانى جانە وسى جۇمىستاردى ۇيلەستىرۋ ەڭبەك جانە حالىقتى الەۋمەتتىك قورعاۋ مينيسترلىگىنە جۇكتەلگەنى تۋرالى جاۋاپ الدىم. قازىرگى ۋاقىتتا ۇسىنىسىما بايلانىستى جوبا جۇمىسى اتىراۋ وبلىسىندا باستالىپ كەتتى. ناتيجەسى – ۋاقىت ەنشىسىندە, – دەدى باقتىقوجا ىزمۇحامبەتوۆ.
ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ەل ومىرىندەگى ارداگەرلەردىڭ ورنى ەرەكشە ەكەنىن اتاپ ءوتىپ, الدا كەلە جاتقان وتان قورعاۋشى جانە جەڭىس كۇندەرىنە وراي ولارعا مەملەكەت تاراپىنان كورسەتىلەتىن كومەك تۋرالى مالىمدەدى.
– جىلدان-جىلعا مايدانگەرلەرىمىزدىڭ سانى ازايىپ بارادى. بيىل ەلىمىزدە سوعىسقا قاتىسقان 237 قاريامىز عانا قالىپتى. ولاردان بولەك, 50 مىڭعا تاقاۋ تىڭ ارداگەرى بار. سونىمەن قاتار ءار سالادا ەڭبەك ەتىپ, بۇگىندە ەل اعاسى بولار جاسقا جەتكەن سىزدەردىڭ دە ورىندارىڭىز ەرەكشە, – دەدى مينيستر.
جۋىردا پرەزيدەنتتىڭ تمد ەلدەرىندەگى تۇڭعىش الەۋمەتتىك كودەكسكە قول قويعانى بەلگىلى. كۇنى كەشە وتكەن قازاقستان حالقى اسسامبلەياسىنىڭ سەسسياسىندا مەملەكەت باسشىسى وسى كودەكس ماقساتتارىنا كەڭىنەن توقتالعانىن اتاپ وتكەن تامارا قاسىمقىزى جاڭا قۇجات ەل حالقى ءۇشىن بارلىق قولداۋلار تولىققاندى قامتىلعاندىعىمەن قۇندى ەكەنىن جەتكىزدى.
– بالا دۇنيەگە كەلگەننەن باستاپ كامەلەت جاسقا تولعانعا دەيىن بالاعا, اتا-انالارعا, وتباسىنا قاتىستى, سونىمەن قاتار زەينەتكەرلەرگە كورسەتىلەتىن قولداۋ تەتىكتەرى دە ول جەردە جان-جاقتى قاراستىرىلعان. بيىل 1 قاڭتاردان باستاپ ەلىمىزدەگى 6,3 ميلليون وتباسىنىڭ تولىق بازاسى جاسالدى. ولاردىڭ قايسىسىندا قانشا بالا بار, كىم قانداي كومەككە مۇقتاج, قاي وتباسىندا مۇگەدەك بالالار بار, كىمگە جۇمىس كەرەك, وسىنىڭ ءبارى بازاعا ەنگىزىلدى, – دەدى مينيستر.
تامارا دۇيسەنوۆا بيىل ورتاشا زەينەتاقى 125 مىڭ تەڭگەگە وسكەنىن, ال ەڭ ۇلكەن زەينەتاقى 182 مىڭ تەڭگەنى قۇرايتىنىن, سونىمەن قاتار مۇگەدەك ادامدارعا بەرىلەتىن جاردەماقى جىل باسىندا 8,5 پايىزعا ءوسىپ, مەملەكەت باسشىسىنىڭ تاپسىرماسىمەن 1 شىلدەدەن باستاپ تاعى 14 پايىزعا كوبەيەتىنىن ايتتى.
– پرەزيدەنت ءوز جولداۋىندا حالىقتىڭ الەۋمەتتىك جاعدايىن, ءومىر ءسۇرۋ ساپاسىن جاقسارتۋ ماسەلەسىنە توقتالدى. شىن مانىندە, ەڭ الدىمەن وسى ەلدىڭ, حالىقتىڭ قاۋىپسىزدىگى بولماسا, ءبىز ءومىردى جاقسارتا المايمىز. ەلدىڭ قورعانىس سالاسىندا, اسكەرىندە قانداي وزگەرىستەر بولىپ جاتىر؟ قازىرگى كۇنى 20 مىڭنان استام ارداگەرىمىز بار. سولار ەلدى قورعاۋ, قاۋىپسىزدىك سالاسىنداعى جۇمىستاردىڭ جاندانۋىنا قانداي ۇلەستەرىن قوسىپ جاتىر, مەن وسى ماسەلەگە توقتالعىم كەلەدى, – دەگەن گەنەرال-لەيتەنانت اباي تاسبولاتوۆ قورعانىس سالاسىندا جاسالىپ جاتقان جۇمىستار تۋرالى باياندادى.
بۇدان وزگە, پلەنۋم بارىسىندا ۇلىتاۋ وبلىسى ارداگەرلەر كەڭەسىنىڭ توراعاسى ساعىندىق قوجامسەيىتوۆ, قىزىلوردا وبلىسى ارداگەرلەرى كەڭەسىنىڭ توراعاسى سەرىك دۇيسەنباەۆ ءسوز الىپ, وي-پىكىرلەرىن ورتاعا سالدى. جيىندا «ارداگەرلەر ۇيىمى» رەسپۋبليكالىق قوعامدىق بىرلەستىگى ورتالىق كەڭەسى قۇرامىنا تولىقتىرۋلار مەن وزگەرىستەر ەنگىزىلدى.
جيىندا قابىلدانعان ماڭىزدى قۇجات – «ارداگەرلەر ۇيىمى» مەن ەڭبەك جانە حالىقتى الەۋمەتتىك قورعاۋ مينيسترلىگى اراسىنداعى ءوزارا ىنتىماقتاستىق تۋرالى مەموراندۋم. قۇجاتقا ۇيىم توراعاسى باقتىقوجا ىزمۇحامبەتوۆ پەن مينيستر تامارا دۇيسەنوۆا قول قويدى.
ءىس-شارا سوڭىندا ەڭبەك جانە حالىقتى الەۋمەتتىك قورعاۋ مينيسترلىگىنىڭ «ەڭبەك ارداگەرى» مەدالىمەن ۇلىتاۋ وبلىسى ارداگەرلەر كەڭەسىنىڭ توراعاسى ساعىندىق قوجامسەيىتوۆ, «ارداگەرلەر ۇيىمى» رەسپۋبليكالىق قوعامدىق بىرلەستىگىنىڭ «قۇرمەت بەلگىسى» ءتوس بەلگىسىمەن الماتى قالاسى ارداگەرلەر كەڭەسىنىڭ توراعاسى احان بيجانوۆ, اقتوبە وبلىسى ارداگەرلەر كەڭەسىنىڭ توراعاسى سەرىك شاڭعۇتوۆ, باتىس قازاقستان وبلىسى ارداگەرلەر كەڭەسىنىڭ توراعاسى ماقسوت بەرگەن, قوستاناي وبلىسى ارداگەرلەر كەڭەسىنىڭ توراعاسى باتىربەك احمەتوۆ ماراپاتتالدى.
