ءمينيستردىڭ سوزىنشە, قازىر قازاقستاننىڭ 9 وڭىرىندە قالا حالقىن سۋمەن قامتاماسىز ەتۋ كورسەتكىشى 100%-عا جەتىپ وتىر.
ۆەدومستۆو باسشىسى ايتقانداي, تازا سۋمەن قامتاماسىز ەتۋدە جامبىل (91,9%) وبلىسىنداعى قالالار مەن قوستاناي, اقمولا جانە سولتۇستىك قازاقستان وبلىستارىنىڭ اۋىلدارىندا باياۋ ديناميكا بايقالىپ وتىر.
بۇل رەتتە بيىل سۋمەن جابدىقتاۋ جانە سۋ بۇرۋ جۇيەلەرىن سالىپ, جاڭعىرتۋ جونىندەگى 400-دەن استام جوبانى ىسكە اسىرۋعا رەسپۋبليكالىق بيۋدجەتتەن 280 ملرد تەڭگە بولىنگەنىن ايتا كەتكەن ورىندى. وسى ارقىلى جىل سوڭىنا دەيىن قالالاردى سۋمەن قامتاماسىز ەتۋ كورسەتكىشىن 98,8%-عا, ال ەلدى مەكەندەردە 96,3%-عا جەتكىزۋ كوزدەلگەن.
سونىمەن قاتار م.قاراباەۆ سۋ تازارتۋ جۇيەلەرىنىڭ قاۋقارىن ارتتىرىپ, ماگيسترالدى سۋ قۇبىرلارىن كەڭەيتۋ بويىنشا جۇرگىزىلىپ جاتقان جۇمىستارعا توقتالدى.
«تازا سۋدى تارتۋ بويىنشا كەزەڭدىك جوسپار ازىرلەنىپ, سوعان سايكەس بارلىق ەلدى مەكەن قامتىلادى. ءاربىر قالالىق جانە اۋىلدى ەلدى مەكەنگە بايلانىستى مونيتورينگ جۇرگىزىلىپ كەلەدى. ونىڭ ىشىندە ىزدەستىرۋ-بارلاۋ جۇمىستارى, جوبالاۋ-سمەتالىق قۇجاتتامانى ازىرلەۋ جانە قۇرىلىس-مونتاج جۇمىستارىن ىسكە اسىرۋ ماسەلەلەرى بار», دەدى مينيستر.
بۇعان قوسا ول سۋ رەسۋرستارىن ۇنەمدەۋ ماقساتىندا سۋمەن جابدىقتاۋ, سۋدى بۇرۋ جانە ونى تازارتاتىن جۇيەلەردىڭ ءوندىرىس پروتسەستەرىن اۆتوماتتاندىرۋدى ۇسىندى. بۇل ارقىلى سۋ ارنالارىنىڭ بارلىق كەزەڭىندە قاجەتتى رەسۋرستى ەسەپكە الۋدىڭ كەشەندى جۇمىسى جۇرگىزىلمەك.
«سۋمەن جابدىقتاۋ جانە سۋ بۇرۋ جۇيەسىنىڭ گيدرومودەلىن قۇرۋ ءۇشىن بارلىق ءوندىرىس ۋچاسكەسىندە سۋدىڭ كولەمىن ولشەيتىن جابدىقتاردى ورناتۋ قاجەت. ءوز كەزەگىندە اۆتوماتتاندىرۋ ءىسى سۋ ارنالارىنىڭ الداعى ۋاقىتتاعى شىعىندارىن ازايتۋعا, سونداي-اق ءتيىمدى دامۋ مودەلىن جولعا قويۋ ارقىلى سۋ ينفراقۇرىلىمىن سالىپ, جاڭعىرتۋعا جۇمسالاتىن مەملەكەتتىك قاراجاتتى ۇنەمدەۋگە سەپتەسەدى», دەدى م.قاراباەۆ.
