فورۋمعا قاتىسقان اقپارات جانە قوعامدىق دامۋ ءمينيسترى دارحان قىدىرالى عالامتورداعى مەملەكەتتىك ءتىل اياسىنىڭ كەڭەيۋى ءۇشىن جاسالىپ جاتقان اۋقىمدى جۇمىستارعا توقتالدى. ءمينيستردىڭ ايتۋىنشا, قازىرگى كۇنى مەملەكەتتىك مەدياداعى قازاق ءتىلىنىڭ ۇلەسى 83 پايىزعا جەتكەن.
– مەملەكەتتىك ءتىلدىڭ باق-تاعى ۇلەسى ارتا ءتۇستى. مىسالى, وتكەن جىلى مەملەكەتتىك باق-تاعى قازاق تىلىندەگى كونتەنتتىڭ ۇلەسى 83 پايىزدى قۇرادى. اتاپ ايتقاندا, تەلەارنالارداعى قازاق ءتىلىنىڭ ۇلەسى 77 پايىزعا جەتسە, باسپا باق-تا – 85 پايىز, ينتەرنەت-رەسۋرستاردا 87 پايىزعا جەتتى, – دەدى ول.
دارحان قۋاندىق ۇلى مەديا نارىقتا قازاقتىلدى باق-قا جارناما بەرۋشىلەر قاتارى دا ارتىپ كەلە جاتقانىن جەتكىزدى. ونىڭ سوزىنشە, وتاندىق رەسۋرستاردا PR ماقالالاردى ورنالاستىرۋ كولەمى ءوسىپ جاتىر.
– وسى رەتتە, ينتەرنەت-جارنامانى رەتتەۋ, الەۋمەتتىك جەلىلەردەگى ينتەرفەيس پەن جارنامالىق الگوريتمدەردى, مونەتيزاتسيالاۋ جۇيەسىن قازاق تىلىندە جاساۋ وتە ماڭىزدى. اتالعان ماسەلە مينيسترلىك ازىرلەپ جاتقان «ينتەرنەت جارناما جانە ونلاين پلاتفورمالار تۋرالى» زاڭ جوباسىندا قاراستىرىلىپ جاتىر. جالپى, بۇل زاڭ جوباسى ءبىرىنشى كەزەكتە ازاماتتاردىڭ قۇقىعىن قورعاۋعا, ونلاين ورتانى قاۋىپسىز جانە اشىق تۇردە دامىتۋعا باعىتتالعان. بۇگىندە باق سالاسىنداعى زاڭنامانى جەتىلدىرۋ جۇمىستارى ءجۇرىپ جاتىر, – دەدى مينيستر.
«Qazaq Forum» وتاندىق كونتەنت جاساۋشىلار فورۋمى قازاق تىلىندەگى جاڭا مەديانىڭ دامۋىنا سەرپىن بەرەتىن جيىن ەكەنىن ايتقان دارحان قىدىرالى مينيسترلىك تاراپىنان الەمدەگى سوڭعى ۇردىستەردى ەسكەرە وتىرىپ, جاڭا تسيفرلىق مەديا مەن كرەاتيۆتى يندۋستريانى دامىتۋ جونىندەگى جۇمىستاردى جانداندىرۋ كوزدەلىپ وتىرعانىن جەتكىزدى. قازىرگى كۇنى «Meta», «TikTok», «Google», «Mail.Ru Group», «LinkedIn», «Netflix» كومپانيالارىمەن كەلىسسوز جۇرگىزىلىپ, تىعىز قارىم-قاتىناس ورناتىلعان.
– كەلىسسوزدەر ناتيجەسىندە «مەتا» كومپانياسىنا قاراستى Instagram, Whatsapp, Facebook, Messenger-ءدىڭ ەلىمىز بويىنشا رەسمي وكىلدەرى ايقىندالدى. سونداي-اق «TikTok» كورپوراتسياسىنىڭ ايماقتىق كەڭسەسى اشىلدى. Facebook پەن TikTok-ءتىڭ ينتەرفەيسىن قازاقشالاۋ بويىنشا كەلىسىمدەر جاسالدى. TikTok كومپانياسىمەن 13 جاسقا تولماعان بالالاردىڭ پلاتفورمانى پايدالانۋىن جانە زياندى مازمۇندى كونتەنتتەردى بىرلەسىپ انىقتايتىن بولامىز. مۇنىڭ ءبارى بىزگە ۇلكەن جاۋاپكەرشىلىك جۇكتەيدى, – دەدى مينيستر.
فورۋمعا قاتىسقان سپيكەرلەردىڭ ايتۋىنشا, قازىرگى كۇنى ەل حالقىنىڭ 45-50 پايىزى ءالى كۇنگە ءداستۇرلى مەديانى تۇتىنادى. ياعني تەلەديدار كورىپ, راديو تىڭداپ, گازەت-جۋرنال وقيتىن ادامدار قاتارى ازايعان ەمەس. وسىعان وراي اقپارات جانە قوعامدىق دامۋ ءمينيسترى سوڭعى ۋاقىتتا قول جەتكىزىلگەن جاعىمدى جاڭالىقپەن ءبولىستى. بۇدان بىلاي حالىق گازەت-جۋرنالعا جازىلۋ ءۇشىن پوشتا بولىمشەسىنە بارىپ جۇرمەيدى, ۇيىندە وتىرىپ-اق kaspi.kz قوسىمشاسى ارقىلى جازىلا الاتىن بولدى.
– «Kaspi Bank»-پەن ارىپتەستىك بايلانىس ورناتىپ, باسپاسوزگە ونلاين جازىلۋ بويىنشا كەلىسىمگە كەلدىك. مۇنداي قادامدار جازىلۋشىلارعا وڭتايلى جولدار ۇسىنىپ, ولاردىڭ قاتارىن ارتتىرادى دەگەن سەنىمدەمىز, – دەدى مينيستر.
ونىڭ ايتۋىنشا, ازىرگە قوسىمشا ارقىلى 18 باسىلىمعا جازىلۋعا مۇمكىندىك بار. سونىڭ ىشىندە وقىرماندارىمىز «قازاق گازەتتەرى» جشس-نا قارايتىن «Egemen Qazaqstan», «كازاحستانسكايا پراۆدا» جانە «Ana tili» گازەتتەرىنە دە ونلاين جازىلا الادى. اتالعان گازەت-جۋرنالدارعا جازىلۋ ءۇشىن Kaspi.kz قوسىمشاسىنا كىرىپ, «تولەمدەر», ونىڭ ىشىندە «باسقاسى» دەگەن باتىرمانى باسىپ, «قر باسپا باسىلىمدارى» دەگەن بولىمگە وتەسىز, ءارى قاراي قاجەت باسىلىمدى تاڭداپ, تولەم جاساي الاسىز.
بيىلعى «Qazaq Forum»-دا «مونەتيزاتسيا. نەگە ءبارى مۇز؟», «Immersiveness. قازاقستاندىق جۋرناليستيكا جاڭا ترەندتەرگە دايىن با؟», «From TV to YouTube: بەيىمدەلۋ, تەندەنتسيا جانە جاڭا مۇمكىندىكتەر», «تانىمدىق كونتەنتتىڭ الەۋەتى» تاقىرىپتارىندا پانەلدىك سەسسيالارمەن قاتار, «پودكاستى قالاي جۇزەگە اسىرۋ كەرەك؟», «مەديا جەلىدە جاساندى ينتەللەكتى قولدانۋ تاسىلدەرى» اتتى شەبەرلىك سىنىپتارى ءوتتى.
