سۋرەتتە: «سامۇرىق-قازىنا» ۇلتتىق ءال-اۋقات قورى» اق باسقارما توراعاسى نۇرلان جاقىپوۆ.
«سامۇرىق-قازىنا» باسشىسىنىڭ ايتۋىنشا, قور توبىنىڭ الماتى وبلىسىنداعى جۇمىسىنىڭ نەگىزگى باعىتى – ءوزىن-ءوزى قامتاماسىز ەتەتىن زاماناۋي ەنەرگەتيكا. «سامۇرىق-قازىنا» كومپانيالارى وڭىردە جاڭا جەل جانە سۋ ەلەكتر ستانسالارىن قۇرۋ جۇمىستارىن جۇرگىزىپ جاتىر.
– بۇل ءوڭىر بۇكىل ورتالىق ازياداعى ەڭ ءىرى ەنەرگەتيكالىق حابتاردىڭ بىرىنە اينالۋى مۇمكىن. ءبىرىنشى كەزەكتە ونىڭ قۋاتى الماتى وبلىسىنىڭ ەنەرگەتيكالىق قاجەتتىلىكتەرىن قاناعاتتاندىرۋعا باعىتتالۋعا ءتيىس. ىشكى نارىقتا سۇرانىس ۇنەمى ءوسىپ كەلەدى. ودان ارتىلعاندى ەكسپورتتاۋ كەرەك. قىرعىزستان مەن وزبەكستان ءبىزدىڭ تازا ەلەكتر ەنەرگيامىزعا ەرەكشە قىزىعۋشىلىق تانىتىپ وتىر, – دەدى نۇرلان جاقىپوۆ.
ول ءىسساپار بارىسىندا قوناەۆ قالاسىنىڭ ماڭىنداعى كۇن ەلەكتر ستانسالارى پاركىنە جانە ىلە وزەنىندەگى قاپشاعاي گەس-نە باردى.
– سۋ رەسۋرستارى – الماتى وبلىسىنىڭ ستراتەگيالىق ارتىقشىلىعى. ءبىز وڭىردەگى گيدروەنەرگەتيكانىڭ دامۋىنا قولداۋ كورسەتۋگە دايىنبىز. قازىر قازاقستاندا ءدال وسى گەس مانەۆرلىك قۋاتتىڭ نەگىزگى كوزىنە اينالدى. ول ەلەكتر ەنەرگياسىنا دەگەن سۇرانىستى ارتتىرادى, – دەدى «سامۇرىق-قازىنا» باسشىسى.
قاپشاعاي گەس-ءىنىڭ تيىمدىلىگىن ارتتىرۋ ءۇشىن «سامۇرىق-ەنەرگو» ىلە وزەنىندە قارسى رەتتەۋشى كەربۇلاق گەس-ءىن سالۋدى جوسپارلاپ وتىر. قارسى رەتتەگىش سۋ قويماسىن قۇرۋ قاپشاعاي گەس-ءى جۇمىسىن تەڭەستىرۋگە جانە ونى قولدا بار قۋاتتى پايدالانا وتىرىپ, ەڭ جوعارى جۇكتەمەلەردى جابۋ رەجىمىنە اۋىستىرۋعا مۇمكىندىك بەرەدى. بۇل جوبا 2026 جىلعا دەيىن جۇرگىزىلمەكشى.
سونداي-اق «سامۇرىق-قازىنا» ۇلتتىق ءال-اۋقات قورى» اق-نىڭ قولداۋىمەن الماتىدا جۇقپالى اۋرۋلار ۇلتتىق عىلىمي-زەرتتەۋ ورتالىعى سالىنۋدا. قور وسى ورتالىقتىڭ قۇرىلىسىنا شامامەن 130 ميلليارد تەڭگە ءبولدى. قۇرىلىس جۇمىستارى بيىلعى جەلتوقسانعا دەيىن اياقتالادى دەپ جوسپارلانىپ وتىر.
كلينيكانىڭ قۇرىلىس الاڭىنا كەلگەن «سامۇرىق-قازىنا» ۇلتتىق ءال-اۋقات قورى» اق باسقارما توراعاسى نۇرلان جاقىپوۆ جاڭا ورتالىق بۇكىل تمد-داعى ەڭ ءىرى زەرتتەۋ مەكەمەسى ءارى كلينيكالىق ورتالىق بولاتىنىن اتاپ ءوتتى. ونىڭ ايتۋىنشا, سوڭعى جىلدارداعى وقيعالار كلينيكالىق بولىمشەسى بار ءىرى جۇقپالى اۋرۋلار عىلىمي-زەرتتەۋ ورتالىعىنىڭ بولۋى جاي عانا قاجەتتىلىك ەمەس, ۇلتتىق قاۋىپسىزدىك ماسەلەسى ەكەنىن دە دالەلدەدى. ول قۇرىلىس بارىسىن ءوزى تەكسەرىپ, قۇرىلىس مەردىگەرىمەن بارلىق جۇمىستىڭ ۋاقىتىندا ورىندالۋىن تالقىلادى.
اتالعان اۋرۋحانا 2021 جىلدىڭ قازانىندا سالىنا باستادى. ورتالىقتا 350 زاماناۋي جابدىقتالعان ورىن بولادى. ول وتاندىق دارىگەرلەر, عالىمدار مەن الماتىنىڭ مەديتسينالىق جوعارى وقۋ ورىندارىنىڭ ستۋدەنتتەرى ءۇشىن كلينيكالىق بازاعا اينالادى. جاڭا ورتالىقتا جۇقپالى اۋرۋلار, پۋلمونولوگيا جانە فتيزياتريا سالاسىندا مەديتسينالىق كومەك كورسەتىلەدى, زەرتتەۋلەر مەن وقىتۋ جۇرگىزىلەدى, وزىق مەديتسينالىق تەحنولوگيالاردى شوعىرلاندىرىلىپ, دارىلىك پرەپاراتتار زەرتتەلەدى. سونىمەن قاتار جاڭا نىسان بازاسىندا ەلدەگى ەپيدەميولوگيالىق جاعدايدى باقىلاۋ ءۇشىن احۋالدىق ورتالىق اشۋ جوسپارلانعان.
نۇرلان جاقىپوۆ ءوزى باسقاراتىن قوردىڭ قازاقستان مەديتسيناسىن دامىتۋعا قوسقان ۇلەسى تۋرالى ايتا كەلىپ, 26 ساۋىردە الماتى قالاسىنان «سامۇرىق-قازىنا» كومپانيالار توبىنىڭ قارجىلاندىرۋىمەن مەديتسينالىق پويىز جولعا شىققانىن اتاپ ءوتتى. ءبىر جىل ىشىندە مەدپويىز دارىگەرلەرى شالعاي ستانسالارداعى تۇرعىندارعا مەديتسينالىق كومەك كورسەتەدى.
ۇلتتىق ءال-اۋقات قورىنىڭ باسشىسى الماتى وبلىسىنا ءىسساپارىنىڭ سوڭىندا «الماتى ەلەكتر ستانساسى جەو-2» اق-عا بارىپ, وندا باستالعالى جاتقان قۇرىلىس جۇمىسىمەن تانىستى. الماتى قالاسىنىڭ جارتى اۋماعىن جىلۋمەن قامتاماسىز ەتىپ وتىرعان ورتالىق قاتتى وتىننان «كوگىلدىر» وتىنعا كوشۋدى جوسپارلاپ وتىر. بۇل جۇمىس ءۇش جىلعا سوزىلماق. «كوگىلدىر» وتىنعا كوشۋ مەگاپوليستى تۇتىنمەن لاستاماي, ءتيىمدى جولمەن حالىققا جىلۋ سىيلاۋعا مۇمكىندىك بەرەتىن بولادى.
الماتى وبلىسى
