مارافوننىڭ اشىلۋ سالتاناتىنا استانا قالاسى اكىمىنىڭ ورىنباسارى ەرلان بەكمۇرزاەۆ, «بولاشاق» قورىنىڭ قامقورشىلىق كەڭەسىنىڭ ءتورايىمى دينارا گاپلان قاتىسىپ, قاتىسۋشىلارعا ساتتىلىك تىلەدى.
ء«ىس-شارا اۋتيزم دياگنوزى بار ادامداردىڭ ءومىر ءسۇرۋ ساپاسىن جاقسارتۋ جانە ولاردىڭ قوعامنان ءوز ورنىن تابۋى ماقساتىندا وتكىزىلىپ جاتىر. مۇنداي جارىستاردى الداعى ۋاقىتتا دا ءداستۇرلى تۇردە وتكىزىپ تۇرۋ جوسپاردا بار», دەدى قالا اكىمىنىڭ ورىنباسارى.
ۇيىمداستىرۋشىلاردىڭ ايتۋىنشا, ساتىلىمداعى بيلەتتەردەن تۇسكەن 6 ملن تەڭگەدەن استام قاراجات «بولاشاق» قورىنىڭ ء«ار بالا مەكتەپكە بارۋعا لايىقتى» جوباسى شەگىندە ءاۋتيزمى بار جانە باسقا دا مەنتالدى بۇزىلۋشىلىقتارى بار بالالارعا ارنالعان ينكليۋزيۆتى ءبىلىم بەرۋدى دامىتۋعا باعىتتالادى.
«قايىرىمدىلىق ءىس-شاراسىنا كاسىبي, اۋەسقوي سپورتشىلاردان باستاپ ەرەكشە قاجىتتىلىگى بار 16 بالا مەن ولاردىڭ اتا-انالارى قاتىستى. ولار ءتورت قاشىقتىق بويىنشا سىنعا ءتۇستى. سونداي-اق بۇل جارىسقا استانالىقتاردان بولەك الماتى, قاراعاندى, قوستاناي, پاۆلودار, تەمىرتاۋ جانە سەمەي سياقتى باسقا قالالاردان كەلگەن قاتىسۋشىلار دا قاتىستى. اۋتيزم جانە دامۋىندا باسقا دا ەرەكشەلىكتەرى بار بالالارعا ارنالعان «كوڭىلدى ستارتتار» سپورتتىق-ويىن-ساۋىق ەستافەتاسى ۇيىمداستىرىلدى», دەلىنگەن قالا اكىمدىگى ءباسپاسوز قىزمەتىنىڭ حابارلاماسىندا.
كوماندالىق ويىندارعا 5 جانە 14 جاس ارالىعىنداعى ءاۋتيزمى بار, پسيحيكالىق جانە سويلەۋ ءتىلى دامۋى تەجەلگەن, داۋن سيندرومىمەن جانە ت.ب. 100-دەن استام بالا قاتىستى. ەستافەتا قورىتىندىلارى بويىنشا ءاربىر جاس قاتىسۋشىعا مەدال جانە ءىس-شارانىڭ سەرىكتەسىنەن سىيلىق قوراپشاسى تابىستالدى.
سونىمەن بىرگە بالالار اراسىندا بالالار ۆەلوسيپەدتەرى دە ويناتىلدى. جارىس ءتورت قاشىقتىق بويىنشا ءوتتى: 1 كم, 2,5 كم, 5 كم جانە 10 كم. قاتىسۋ قۇنى 4 990 تەڭگەدەن 7 990 تەڭگەگە دەيىن بولدى. قايىرىمدىلىق مارافونىنا بارلىعى 1 017 ادام قاتىستى.
ءار قاشىقتىقتان جۇلدەلى ورىندارعا يە بولعان جارىس جەڭىمپازدارى ءىس-شارانىڭ اتاقتى سپورتشىلارى مەن سەرىكتەستەرىنىڭ قولىنان ديپلومدار مەن مەدالدار الدى. مارەگە جەتكەن بارلىق قاتىسۋشىلار ەستەلىك مەدالدارعا يە بولدى. جۇگىرۋ مارافونى استانا قالاسى اكىمدىگىنىڭ قولداۋىمەن ءوتتى.
