«مادەنيەت باسقارماسى مادەنيەت سالاسىنداعى مەكەمەلەرمەن بىرلەسىپ, مامىر ايىنا 160-تان استام ءىس-شارا جوسپارلاپ وتىر. سونىمەن بىرگە 1 مامىر – قازاقستان حالقىنىڭ بىرلىگى كۇنى, 7 مامىر – وتان قورعاۋشى كۇنى, 9 مامىر – جەڭىس كۇنىنە ارنالعان 25-تەن استام ءىس-شارا وتەدى.
1 مامىر كۇنىنە ارنالعان ءىس-شارالارعا توقتالسام, «سارىارقا» اۋدانىنداعى قالالىق الاڭدا (استانا قالاسى اكىمدىگى الدىندا) ساعات 12:00-15:00 ارالىعىندا قالا تۇرعىندارى مەن قوناقتارى ءۇشىن مەرەكەلىك كونتسەرت, تەاترلاندىرىلعان كورىنىستەر, تسيرك كورسەتىلىمدەرى, بالالارعا ارنالعان جانە سپورتتىق ءىس-شارالار, ساۋدا جارمەڭكەسى ۇيىمداستىرىلادى. سونىمەن قاتار, «بايتەرەك» مونۋمەنتى الدىندا ساعات 12:00-15:00 ارالىعىندا كونتسەرت بولادى. وعان تانىمال ونەرپازدار قاتىسادى», دەدى ن.قامزين استانا قالاسى كوممۋنيكاتسيالار قىزمەتىندە وتكەن ءباسپاسوز ءماسليحاتىندا.
بۇدان بولەك, 3 مامىر كۇنى ساعات 19:00-دە مۋزىكالىق جاس كورەرمەن تەاترىندا «چەم دالشە مى ۋحوديم وت ۆوينى...» مۋزىكالىق-پوەتيكالىق كومپوزيتسيا جوسپارلانعان.
نۇران قامزيننىڭ ايتۋىنشا, 4 مامىردا عالىم, فيلوسوف, دارىگەر يبن سينا (اۆيتسەننا) ءبيۋستىنىڭ اشىلۋ سالتاناتى وتەدى. ءىس-شاراعا قازاقستان مەن تاجىكستان پرەزيدەنتتەرى قاتىسادى دەپ كۇتىلىپ وتىر.
مۇنىمەن قوسا, 7 مامىردا Nomad City Hall عيماراتى الدىندا (ساعات 12:00-13:00) اشىق اسپان استىنداعى مەرەكەلىك كونتسەرت ۇيىمداستىرىلادى.
ءدال وسى كۇنى «بايتەرەك» مونۋمەنتى جانىنداعى الاڭدا (ساعات 18:00-22:00) وتان قورعاۋشى كۇنىنە ارنالعان مەرەكەلىك ءىس-شارا وتەدى.
ال 8 مامىردا ساعات 17:00-دە بەيبىتشىلىك جانە كەلىسىم سارايىندا «ەرلىك جايلى ەستەلىكتەر» اتتى مەرەكەلىك كونتسەرت باستالادى.
8 مامىر كۇنى ساعات 19:00 - دە ءازىربايجان مامبەتوۆ اتىنداعى مەملەكەتتىك دراما جانە كومەديا تەاترىندا د.يسابەكوۆتىڭ «تىنىشتىق كۇزەتشىسى» سپەكتاكلى وتەدى.
9 مامىردا جەڭىس كۇنىنە وراي سوعىس ارداگەرلەرىنىڭ, تىل ەڭبەككەرلەرىنىڭ, قوعامدىق جانە جاستار ۇيىمدارى وكىلدەرىنىڭ قاتىسۋىمەن «وتان انا» مونۋمەنتى الدىندا گۇل شوقتارىن قويۋ ءداستۇرلى شاراسى ۇيىمداستىرىلماق.
