وسى اكتسياعا «Vista» سپورت كلۋبى, الپينيزم جانە قۇزعا شىعۋ فەدەراتسياسىمەن قاتار «Qadam Special School», «Autism Qadam» قورى قولداۋ كورسەتىپتى. فەستيۆالدىڭ تاقىرىبى «شەكاراسىز شىڭدار» دەپ اتالادى. بۇل ءىس-شاراعا «Qadam Special School» ورتالىعىنىڭ تاربيەلەنۋشىلەرى, ياعني اۋتيزممەن اۋىراتىن بالالار وزدەرىنىڭ سپورتتىق داعدىلارىن كورسەتەدى. وسى مەزەتتە بالعىنداردىڭ اتا-انالارى «KeruenCity» ساۋدا ورتالىعىندا قۇزعا شىعۋدان باق سىنايدى. بىزگە «Autism Qadam» قورىنىڭ پرەزيدەنتى ايسۇلۋ ماجەن ەلدە العاش رەت ۇيىمداستىرىلاتىن فەستيۆالدىڭ ءمان-ماڭىزى جايىندا ايتىپ بەردى.
– ءبىزدىڭ قور اۋتيزممەن اۋىراتىن بالالاردى قولداۋ ماقساتىندا ءتۇرلى جوبالاردى قولعا الىپ, ۇيلەسىمدى ىسكە اسىرىپ كەلەدى. ونىڭ ىشىندە ءبىلىم بەرۋ سالاسىنداعى جانە سپورت باعىتىنداعى جوبالاردى اتاپ وتۋگە بولادى. «Qadam Special School» ورتالىعى دا تيىمدىلىگىن كورسەتتى. بىلتىر ءوزىم باستاپ, ەلىمىزدەگى اۋتيزممەن اۋىراتىن بالالارعا ارنالعان العاشقى سپورتتىق قۇزعا شىعۋ سەكتسياسىن ىسكە قوستىق. ەندى ەرتەڭ, 28 ساۋىردە, ءبىز ءبىرىنشى فەستيۆال وتكىزۋدى ويلاستىردىق. ونىڭ ماقساتى ءاۋتيزمى بار بالالار سپورتتىڭ وسى تۇرىمەن تابىستى اينالىسا الاتىنىن كورسەتۋ بولىپ وتىر. ارينە, ۋاقىت ساتىمەن ەلىمىزدىڭ باسقا وڭىرلەرى دە ءبىزدىڭ باستامانى قولدايدى دەپ ۇمىتتەنەمىز, دەيدى ا.ماجەن.
«Qadam Special School» ورتالىعىنىڭ بالالارى «Vista» سپورت كلۋبى ماماندارىنىڭ كومەگىمەن سپورتتىق قۇزعا شىعۋ نەگىزدەرىن يگەرىپ جاتقانىنا جىلدان اسقان. بۇل سەكتسيا ەلدەگى اۋتيزممەن اۋىراتىن بالالاردىڭ سپورتتىق قۇزعا شىعۋمەن اينالىسۋىنا تاپتىرمايتىن العاشقى سەكتسيا ەكەنىن ەسكە سالامىز. قازىر وسى ورتالىقتا 20-عا جۋىق بالا شىنىعادى. «Autism Qadam» قورى ءبىر مەزگىلدە 14 جاتتىقتىرۋشىنى وقىتىپ, ولاردىڭ ەرەكشە بالالارمەن جۇمىس ىستەۋ داعدىلارىن مەڭگەرۋگە ىقپالداسقان. ستاتيستيكاعا زەر سالساق, كەيىنگى ونجىلدىقتا اۋتيستىك سپەكترىنىڭ بۇزىلۋى بار بالالاردىڭ سانى ون ەسە ارتقان. بۇگىندە الەمدەگى ءاربىر 36 بالا سول قاتارعا كىرەدى. اۋتيستىك سپەكترىنىڭ بۇزىلۋى بايقالعان بالالارعا جاردەمدەسۋدىڭ كەشەندى, ءتيىمدى تاسىلدەرىنىڭ ءبىرى – سپورتقا باۋلۋ. وسى تۇستا قۇزعا شىعۋ سپورتى بارلىق بۇلشىق ەت توپتارىنا بەلسەندى اسەر ەتەتىن, فيزيكالىق بەلسەندىلىكتى ارتتىراتىن سپورتتىڭ ەرەكشە ءتۇرى سانالاتىنىن تاعى ءبىر ەسكە سالامىز. ويتكەنى مۇندا بالالار ەپتى, ءتوزىمدى بولىپ, قوزعالىسىن باقىلاۋدى ۇيرەنىپ قويماي, لوگيكالىق ويلاۋىن دامىتادى. ءارى سپورتتىڭ وسى تۇرىندە جاراقات الۋ قاۋپى تومەن. جىل ىشىندە «Qadam Special School» ورتالىعىنىڭ تاربيەلەنۋشىلەرى جالپى ءال-اۋقاتى مەن دەنساۋلىق جاعدايىنىڭ ايتارلىقتاي جاقسارعانى بايقالعان.
