قازىرگى ۋاقىتتا ەلوردادا ونعا جۋىق كوشە ۋچاسكەسىنە جوندەۋ جۇمىسى ءجۇرىپ جاتىر. ولاردىڭ قاتارىندا پانفيلوۆ, كەنجين كوشەلەرى, جەڭىس داڭعىلى, جۇمباقتاس تۇيىق كوشەسى جانە باسقالارى بار.
مۇندا قوزعالىس ءىشىنارا نەمەسە تولىعىمەن شەكتەلگەن.
ايتا كەتۋ كەرەك, 2023 جىلى جالپى ۇزىندىعى 54,3 كم بولاتىن 72 كوشەگە ورتاشا جوندەۋ جۇرگىزۋ جوسپارلانىپ وتىر, ونىڭ 44-ءى ۇزىندىعى 40 كم بولاتىن ورتالىق كوشەلەر, 28-ءى قالانىڭ ەلدى مەكەندەرىندە ورنالاسقان.
ماسەلەن, ءال-فارابي داڭعىلى الاش كوپىرىنەن پۋشكين كوشەسىنە دەيىن, ءۋاليحانوۆ كوشەسى بوگەنباي باتىر داڭعىلىنان كراۆتسوۆ كوشەسىنە دەيىن, ش.قۇدايبەردى ۇلى داڭعىلى مۇستافين كوشەسىنەن قوشقارباەۆ داڭعىلىنا دەيىن, «تۇلپار» كوپىرى, تۇران داڭعىلى قورعالجىن كوشەسىنەن سارايشىق كوشەسىنە دەيىن جانە ت.ب. ۋچاسكەدە جوندەۋ جۇرگىزىلەدى.
سونىمەن قاتار بيىل ەلوردادا ۇزىندىعى 13 كم بولاتىن 31 كوشە سالىنادى, ءتورت كوشە بويىنشا جۇمىس تولىق كولەمدە اياقتالادى, 19 كوشە بويىنشا جالعاسادى, تاعى سەگىزى ەندى باستالادى.
