اقمولا وبلىسىندا قۇس فابريكاسى اشىلادى دەپ كۇتىلۋدە

استانا. 10 شىلدە. جەرگىلىكتى تۇرعىنداردىڭ قۇس ەتىنە سۇرانىسىن قامتاماسىز ەتۋ ماقساتىندا اقمولا وبلىسىندا بىرقاتار جوبالار جۇزەگە اسىرىلۋدا. بۇل تۋرالى BNews.kz حابارلادى. اقمولا وبلىستىق اۋىل شارۋاشىلىعى باسقارماسى ماركەتينگ جانە اۋىل شارۋاشىلىعى ونىمدەرىن وڭدەۋ ءبولىمىنىڭ باسشىسى بەكبولات ەلبەرگەنوۆتىڭ ايتۋىنشا, بۇگىندە ءتيىستى كاسىپورىندار وبلىس تۇرعىندارىنىڭ  قۇس ەتىنە دەگەن سۇرانىسىن تەك 20 پايىزعا عانا وتەپ وتىر. ال قۇس شارۋاشىلىعى سالاسىندا جۇزەگە اسىرىلىپ جاتقان جوبالاردىڭ ارقاسىندا وبلىس حالقىنىڭ قۇس ەتىنە دەگەن سۇرانىسىن 90 پايىزعا قامتاماسىز ەتۋگە بولادى. بەكبولات ەلبەرگەنوۆ: «بيىلعى جىلى استراحان اۋدانىندا «استراحانسكايا پتيتسا» جاۋاپكەرشىلىگى شەكتەۋلى سەرىكتەستىگىنىڭ وندىرىستىك قۋاتتىلىعى جىلىنا 3 مىڭ توننانى قۇرايتىن جوباسىن ىسكە اسىرۋدىڭ ەكىنشى كەزەڭى اياقتالادى. تسەلينوگراد اۋدانىندا Capital Project LTD جاۋاپكەرشىلىگى شەكتەۋلى سەرىكتەستىگى جىلىنا 20 مىڭ توننا ەت وندىرمەك. ونىڭ قۇرىلىسى بيىل باستالدى, 2017 جىلى اياقتالادى دەپ جوسپارلانۋدا», – دەدى. سول سياقتى, 2014 جىلدىڭ قاراشاسىندا اقكول اۋدانىنىڭ دومبىرالى اۋىلىندا قۇس فابريكاسى اشىلعالى وتىر. بۇل كاسىپورىن ىسكە قوسىلسا, جىلىنا 90 ملن. جۇمىرتقا جانە 270 توننا قۇس ەتىن وندىرە الادى. ءبىر ايتا كەتەرلىگى, جوعارىدا اتالىپ وتكەن جوبالاردىڭ بارلىعى ۇدەمەلى يندۋستريالدى-يننوۆاتسيالىق دامۋ مەملەكەتتىك باعدارلاماسى اياسىندا جۇزەگە اسۋدا. جولدىباي بازار. دەرەككوز: BNews.kz فوتو: strategy2050.kz.