ءوز سوزىندە پالاتا سپيكەرى قازاقستاننىڭ الەۋمەتتىك-ەكونوميكالىق دامۋ ماسەلەلەرى جونىندەگى كەڭەستە ەل پرەزيدەنتى جۇكتەگەن مىندەتتەردى ساپالى ءارى جەدەل ىسكە اسىرۋ قاجەت ەكەنىن ايتتى. سونداي-اق ماۋلەن اشىمباەۆ سەنات وڭىرلەردىڭ مۇددەسىن قورعايتىن پالاتا ەكەنىن تىلگە تيەك ەتىپ, الداعى ۋاقىتتا دا ماسليحاتتارمەن بايلانىس كۇشەيە تۇسەتىنىن جەتكىزدى.
وسىعان وراي سەنات توراعاسى الداعى بىرلەسكەن جۇمىستىڭ باسىم باعىتتارىن ايقىنداپ بەردى. ماۋلەن اشىمباەۆتىڭ ايتۋىنشا, قازىرگى تاڭدا جاڭا فورماتسياداعى زاڭداردى ازىرلەپ, قابىلداۋ جۇمىسىنا ءماسليحات دەپۋتاتتارىن بەلسەندى جۇمىلدىرعان ءجون. ال سەناتورلار وڭىرلەردىڭ دامۋ ماسەلەلەرىنە باسا ءمان بەرۋگە جانە جۇيەلى پروبلەمالاردى شەشۋگە زاڭنامالىق تۇرعىدان ىقپال ەتۋگە ءتيىس.
ء«ار وڭىردە وزىنە ءتان وزەكتى ماسەلەلەر بار. ولاردىڭ باسىم كوپشىلىگى, پرەزيدەنتىمىز اتاپ كورسەتكەندەي, ينفراقۇرىلىمعا, الەۋمەتتىك نىساندارعا, مەملەكەتتىك باعدارلامالاردىڭ ىسكە اسىرىلۋىنا قاتىستى. سەنات دەپۋتاتتارى وسى ماسەلەلەردى ورتالىق دەڭگەيدە جۇيەلى تۇردە كوتەرىپ, ولاردىڭ وڭ شەشىلۋىنە ىقپال ەتەدى. بىلتىر پارلامەنت 86 زاڭ قابىلدادى. ولاردىڭ 13-ىنە دەپۋتاتتاردىڭ وزدەرى باستاماشى بولدى. قابىلدانعان زاڭداردىڭ ءبارى ەلدىڭ دامۋىنا جانە حالىقتىڭ ءومىر ءسۇرۋ ساپاسىن ارتتىرۋعا باعىتتالعان. بۇگىندە پرەزيدەنتىمىز بەكىتكەن ون ۇلتتىق جوبا ىسكە اسىرىلۋدا. ونىڭ ءبارى – وڭىرلەرگە تىكەلەي قاتىسى بار قۇجاتتار. ءبارىمىز بىرگە ولاردىڭ ساپالى جانە جەدەل ىسكە اسىرىلۋىن قامتاماسىز ەتۋىمىز كەرەك», دەگەن ماۋلەن اشىمباەۆ ارىپتەستەرىن مەملەكەت باسشىسى جۇكتەگەن مىندەتتەردى ىسكە اسىرۋ جولىندا جۇدىرىقتاي جۇمىلۋعا شاقىردى.
سەنات سپيكەرى بۇگىندە ەلىمىزدە جەرگىلىكتى مەملەكەتتىك باسقارۋ جانە ءوزىن-ءوزى باسقارۋ جۇيەسىن دامىتۋ باعىتىندا اۋقىمدى جۇمىس اتقارىلىپ جاتقانىن, سونىڭ بارىسىندا ءماسليحاتتاردىڭ ءرولىن ارتتىرۋ دا ماڭىزدى قادام ەكەنىن ايتتى. ماۋلەن اشىمباەۆ قازىردىڭ وزىندە قولدانىستاعى زاڭنامالارعا بىرقاتار مەملەكەتتىك فۋنكتسيانى ورتالىقتان وڭىرلەرگە بەرەتىن ءتيىستى تۇزەتۋلەر ەنگىزىلگەنىنە نازار اۋداردى. الداعى ايلاردا وسى باعىتتا تاعى ءبىراز جاڭا نورمالار قابىلدانادى.
«بۇگىندە پرەزيدەنتىمىز باسقارۋ جۇيەسىن ورتالىقسىزداندىرۋ ماسەلەسىنە ۇلكەن ءمان بەرىپ وتىر. وسى ماقساتتى جۇزەگە اسىرۋ ءۇشىن جۋىردا اكىمشىلىك رەفورمالار بويىنشا بىرقاتار زاڭعا وزگەرىستەر مەن تولىقتىرۋلار ەنگىزىلدى. ناتيجەسىندە, ۇكىمەتتىڭ ءبىراز فۋنكتسياسى ورتالىق مەملەكەتتىك ورگاندارعا بەرىلدى. اكىمشىلىك رەفورمانىڭ كەلەسى كەزەڭىندە بىقاتار قۇزىرەت جەرگىلىكتى بيلىك ورگاندارىنا بەرىلۋگە ءتيىس. وسىعان قاتىستى ءتيىستى زاڭداردى الداعى ايلاردا قابىلداۋدى جوسپارلاپ وتىرمىز. جالپى, اكىمشىلىك وزگەرىستەردىڭ جاڭا كەزەڭى جەرگىلىكتى وكىلدى ورگانداردىڭ قۇزىرەتىن كەڭەيتۋگە جول اشادى دەپ سەنەمىز», دەدى ماۋلەن اشىمباەۆ.
پالاتا توراعاسى ماسليحاتتارعا ماتەريالدىق-تەحنيكالىق جانە ادىستەمەلىك كومەك كورسەتۋ ماسەلەسىنە دە توقتالىپ ءوتتى. وسىعان وراي ماۋلەن اشىمباەۆ ءماسليحات دەپۋتاتتارىنا ارنالعان تۇراقتى سەمينارلار, ترەنينگتەر جانە تاجىريبە الماسۋ جۇمىستارىن ۇيىمداستىرۋدى ۇسىندى. مۇنداي باستامالار جەرگىلىكتى وكىلدى ورگان دەپۋتاتتارىنىڭ بىلىكتىلىگىن ارتتىرۋعا مۇمكىندىك بەرەتىنى انىق.
سونىمەن قاتار ساپار بارىسىندا سەنات توراعاسى الماتى وبلىسىنىڭ بەلسەندى جاستارىمەن كەزدەستى. ول جاس ساياساتكەرلەردىڭ جاڭا بۋىنى پرەزيدەنتىمىز بەلگىلەپ بەرگەن ادىلەتتى قازاقستان قۇرۋ باعدارىن ءارى قاراي جالعاستىراتىنىنا سەنىم ءبىلدىردى.
«وزدەرىڭىزگە بەلگىلى, 2019 جانە 2020 جىلدارى جاستار جانە ۆولونتەرلەر جىلى بولىپ جاريالاندى. بىلىكتى جاستاردى ەلدىك ىستەرگە تارتۋ ءۇشىن پرەزيدەنتتىك جاستار كادرلىق رەزەرۆى قۇرىلدى. مەملەكەت قاشاندا سىزدەردىڭ وي-پىكىرلەرىڭىز بەن ۇسىنىستارىڭىزدى تىڭداۋعا دايىن. سەنات جانىنداعى جاس ساراپشىلار كلۋبى مەن تالداۋ مەكتەبىنىڭ دە نەگىزگى ماقساتتارىنىڭ ءبىرى وسى. سىزدەردى اتالعان جوبالارعا بەلسەندى قاتىسۋعا شاقىرامىز. ەلىمىزدىڭ بولاشاعى جاستارعا تىكەلەي بايلانىستى. وسى جاۋاپكەرشىلىكتى سەزىنىپ, ارقايسىڭىز ءوز سالاڭىزدا ەلىمىزدىڭ دامۋىنا زور ۇلەس قوساسىزدار دەپ سەنەمىز», دەگەن پالاتا سپيكەرى ءار ادام ءوز بويىندا دۇرىس قۇندىلىقتاردى قالىپتاستىرۋ ءۇشىن تەرەڭ ءبىلىم مەن كاسىبي قابىلەت قاجەت ەكەنىن ايتتى.
بۇدان باسقا, سەنات توراعاسى وڭىرگە ساپارى كەزىندە «شاراپات» ارناۋلى الەۋمەتتىك قىزمەتتەر كورسەتۋ ورتالىعىنىڭ ۇجىمىمەن كەزدەستى.
