ەڭبەك كودەكسىنە ساي, مۇندا بەس كۇندىك, التى كۇندىك, سونداي-اق تولىق ەمەس جۇمىس اپتاسى قاراستىرىلىپ وتىر. (ۇزاقتىعى تاراپتاردىڭ كەلىسىمى بويىنشا انىقتالادى). وسى تۇستا جەكەلەگەن وندىرىستەردە جۇمىسشىلار ءبىر مەزگىلدە بەس كۇندىك جانە ءتورت كۇندىك جۇمىس اپتاسىن بەلگىلەۋى قاجەت بولادى. ارينە, بۇل جاڭاشىلدىق جۇمىس ۋاقىتى, جۇمىس رەجىمىنە قاتىستى ساۋالداردى اينالىپ وتپەيدى. وسىلايشا, تاراپتاردىڭ كەلىسىمى بويىنشا ەڭبەك شارتىندا بەس نەمەسە التى كۇندىك جۇمىس اپتاسىمەن كەزەكتەسۋ ارقىلى ءتورت كۇندىك جۇمىس اپتاسىن بەلگىلەۋگە جول اشىلادى. ياعني وسى اپتاداعى التىنشى جۇمىس كۇنىنىڭ ەنشىسىنە كەلەر اپتانىڭ بەيسەنبىسىندەگى دەمالىستى ولجالايسىز. وسىعان بايلانىستى ۇستەمە جۇمىستاردىڭ شەكتى سانىن 4, 5 كۇندىك جۇمىس اپتاسىنا بولەدى. ۇستەمە جۇمىستاردىڭ جالپى ۇزاقتىعى جۇمىس ۋاقىتىنىڭ جيىنتىق ەسەبىن بەلگىلەۋ كەزىندە ايىنا ون ەكى ساعاتتان – ءتورت كۇندىك, بەس كۇندىك جانە التى كۇندىك جۇمىس اپتاسىندا جانە جىلىنا ءجۇز جيىرما ساعاتتان اسپاۋعا ءتيىس ەكەن.
نەگىزى, بەس كۇندىك, التى كۇندىك نەمەسە ءتورت كۇندىك جۇمىس اپتاسىندا جالپى دەمالىس كۇنى جەكسەنبى بولىپ قالا بەرمەك. بەس كۇندىك جانە ءتورت كۇندىك جۇمىس اپتاسىنداعى ەكىنشى نەمەسە ءۇشىنشى دەمالىس كۇنى ۇجىمدىق شارتتا نەمەسە ەڭبەك ءتارتىبىنىڭ ەرەجەلەرىندە بەلگىلەنەدى. بۇل تاجىريبە كوبىنە كەڭسەدە جۇمىس ىستەيتىن قىزمەتكەرگە قولدانىلعان ەكەن. ياكي, ەڭبەك سالاسىنداعى حالىقارالىق ستاندارتتارعا سايكەس كەلەدى. سەبەبى دامىعان ەلدەردە كەيبىر سالانىڭ ماماندارى 4 كۇندىك جۇمىس رەجىمىن ەنگىزىپ ۇلگەردى. ويتكەنى زەرتتەۋلەر كورسەتكەندەي, جاقسى دەمالعان ادامنىڭ جۇمىسقا قۇلشىنىسى جوعارى بولادى ەكەن. بۇل راسىندا جۇمىس ونىمدىلىگى دە جوعارى بولادى دەگەنگە كەلىپ تۇر. تاعى ءبىر ەسكەرەتىن جاي, ءتورت كۇندىك جۇمىس ءتارتىبى شىلدەدە ەنگىزىلىپ جاتسا, وندا جۇمىس بەرۋشى مەن جۇمىسشى ۋاعدالاسقاندا جۇمىسشىنىڭ ەڭبەكاقىسىنا تەرىس اسەر ەتپەيتىن شەشىم قابىلداعانى ابزالىراق.
