كۇزدىڭ كۇنى جىلى جاققا ۇشىپ كەتكەن جىل قۇستارى ناۋرىز, ءساۋىر ايلارىندا قايتىپ ورالىپ, بالاپان شىعارادى. اسىرەسە, اۋىل ىشتەرىندە قاراتورعايدىڭ سايراپ وتىراتىنىن ءجيى بايقايمىز. ءيا, سايراۋىق قۇستار ەلدى مەكەندى جاعالايدى.
– جىلى جاقتان ۇشىپ كەلگەن قۇستار بالاپان باسۋعا قولايلى جەر ىزدەپ, الاس ۇراتىنداي كورىنەدى بىزگە. جۇمىسىمىز تابيعاتتى قورعاۋ بولعاندىقتان, قۇستارعا قامقورلىق كورسەتكىمىز كەلەدى. قۇستار عانا ەمەس, كۇزدە ءتۇز تۇياقتىلارىنا دا جەم-شوپتەرىن ازىرلەپ, قىستان شىعۋىن جەڭىلدەتەمىز, – دەيدى جانۋارلار الەمىن قورعاۋ جانە ءوندىرۋ ءبولىمىنىڭ قىزمەتكەرى ءامىر بازيلوۆ.
قاناتتىلارعا قامقورلىق تانىتقان پارك قىزمەتكەرى كاتونقاراعاي اۋىلىنداعى س.لاستاەۆ مەكتەبىنىڭ وقۋشىلارىنا قۇس ۇياسىن جاساۋدى ۇيرەتتى. بالالار دا بۇل جۇمىسقا قىزىعا كىرىستى. بۇل – ءبىر جاعىنان تابيعاتتى قورعاۋعا, جانۋارلارعا جاناشىرلىق كورسەتۋگە ۇيرەتسە, ەكىنشى جاعىنان بالانى ەڭبەككە باۋلۋ. قۇستارعا ۇيا, ناۋا جاساۋ سەكىلدى جۇمىستاردى قالا مەكتەپتەرىنىڭ وقۋشىلارى دا قولعا السا, قۇبا-قۇپ بولار ەدى. ايتپەسە, قول ەڭبەگىنە يكەمى جوق بالالار از ەمەس.
ءسويتىپ, كاتونقاراعايلىق وقۋشىلار جاساعان ۇيالارىن مەكتەپتىڭ باۋ-باقشاسىنا ورناتتى. كوپ ۇزاماي بيىكتەۋ ۇياعا قوس قاراتورعايدىڭ تۇراقتاعانىن دا ايتادى وقۋشىلار. بۇل سايراۋىق قۇس جىلىنا ءۇش رەت بالاپان ۇشىرادى ەكەن. ەكى رەت جىلى جاقتا جۇمىرتقا باسسا, ءبىر رەت سولتۇستىك وڭىرلەردە بالاپانىن قارا قاناتتاندىرادى.
شىعىس قازاقستان وبلىسى,
كاتونقاراعاي اۋدانى
