مۋزەي-قورىق ديرەكتورى, تاريح عىلىمدارىنىڭ دوكتورى ابىلسەيىت مۇحتاردىڭ ايتۋىنشا, جاقىندا ساپار ورتالىعىن اشۋ جوسپارلانعان. ونىڭ قۇرامىندا ەكسپوزيتسيالىق كورمە زالدارى, قور قويماسى, كونفەرەنتس-زال, زەرتحانالىق جانە رەستاۆراتسيالىق بولمەلەر, ەلەكتروندى دەرەكتەر بازاسى جاساقتالعان كىتاپحانا بار. ورتالىقتا ءدارىس وتكىزۋگە ارنالعان الاڭدار, اشىق اسپان استىنداعى مۋزەي جانە ەتنواۋىل دا ورنالاسقان.
– قازاق دالاسىنداعى ەڭ كونە تاريحي ورىنداردىڭ ءبىرى, ءىرى ساۋدا قالاسى سارايشىق 1580 جىلى قيراعان. بۇدان 300 جىل بۇرىن بۇل ۇلى جىبەك جولى ورتالىقتارىنىڭ ءبىرى بولعان ەدى. سول سەبەپتەر, سارايشىقتىڭ تاريحى تىم تەرەڭدە جاتىر. ويتكەنى بۇل – ۇلى جىبەك جولى بويىنداعى ورتاعاسىرلىق قالا. ساپار ورتالىعىندا موڭعولعا دەيىنگى, موڭعول كەزەڭى, سونداي-اق نوعاي ورداسى مەن قازاق حاندىعى تاريحىنا قاتىستى قۇندى دۇنيەلەر جۇرتشىلىق نازارىنا ۇسىنىلادى. ونىڭ ىشىندە سارايشىق قالاشىعىنىڭ ماتەريالدىق مۇرالارى, ءدال وسى جەردەن ءار كەزەڭدە تابىلعان جادىگەرلەر, التىن وردا تۋى نەمەسە بۇگىندە كەيبىر ەلدەردىڭ مەملەكەتتىك ەلتاڭبالارىندا كورىنىس تاپقان قوس باستى بۇركىت بەلگىسى قويىلادى. بۇرىن بۇل بەلگى سارايشىقتان تابىلعان ەدى. قاسىم حان مەن باتۋ حاننىڭ بەينەلەرى العاش رەت وسىندا كورسەتىلەدى. بۇل تۇلعالاردىڭ بەينەلەرىن جاساۋ ءۇشىن عالىمدارمەن بىرلەسكەن جۇمىس اتقارىلدى, – دەيدى ابىلسەيىت مۇحتار.
ساپار ورتالىعىندا تاريحي قالاشىقتىڭ عىلىمي نەگىزدە قايتا جاسالعان بىرەگەي ماكەتىن ۇسىنۋ كوزدەلىپ وتىر. التىن وردا كەزەڭىندەگى سارايشىقتىڭ ماكەتىن جاساۋعا عالىمدار كومەكتەسكەن. بارلىق ەكسپوزيتسيانىڭ مۋلتيمەديالىق نۇسقاسى دايىندالعان. بۇل ساپار ورتالىعىنا كەلەتىن قوناقتاردىڭ قازاق, ورىس جانە اعىلشىن تىلدەرىندە اقپارات الۋعا جول اشادى.
– قازاقستاندا ەلىمىزدىڭ وتكەنىنەن سىر شەرتەتىن كيەلى دە تاريحي ورىندار كوپ. سونداي ورىندارعا ازاماتتارىمىز عانا ەمەس, شەتەلدىك تۋريستەر دە ۇلكەن قىزىعۋشىلىق تانىتادى. الايدا تاريحي جانە ارحەولوگيالىق ەسكەرتكىشتەر ورنالاسقان اۋماقتا تۋريستىك ينفراقۇرىلىم جوقتىعى ءتۋريزمدى دامىتۋعا قولبايلاۋ بولىپ وتىر. ال كونە سارايشىق اۋماعىندا اشىلاتىن ساپار ورتالىعى ەلىمىزدىڭ باي مادەني جانە تاريحي مۇراسىنا نازار اۋدارتىپ, ءتۋريزمدى جانداندىرۋعا سەپتىگىن تيگىزەدى, – دەدى التاي كولگىنوۆ.
اتىراۋ وبلىسى
