مازمۇندى شارا كىتاپحانانىڭ «مادەنيەت ارقىلى ۇنقاتىسۋ» حالىقارالىق كورمە جوباسى اياسىندا ەلىمىزدەگى كورەي رەسپۋبليكاسى ەلشىلىگىنىڭ كورەي مادەني ورتالىعىمەن بىرلەسىپ ۇيىمداستىرىلدى. فوتوسۋرەت كورمەسى كورەي ەلىن ەجەلگى نانىم – شامانيزم ارقىلى تانىستىرادى. بۇل – سوڭعى ۋاقىتقا دەيىن كورەي تۇبەگىندە كەڭ تارالعان بىرنەشە نەگىزگى ءدىني اعىمنىڭ ءبىرى.
– بۇل ءبىزدىڭ كىتاپحانا مەن ەلشىلىكتىڭ جانىنداعى كورەي مادەني ورتالىعىمەن بىرلەسىپ وتكىزگەن جەتىنشى ءىس-شارامىز. بيىل ءبىزدىڭ ىنتىماقتاستىعىمىزعا بەس جىل تولدى. وسى جىلدار ىشىندە كىتاپحانادا كورەيلىك تانىمال سۋرەتشىلەردىڭ بىرقاتار كورمەسى ءوتىپ, وندا اتاقتى كورەي مۇراجايلارىنداعى تاريحي جادىگەرلەر قويىلدى. ءداستۇرلى كورەي كيىمدەرىنىڭ كورسەتىلىمدەرى مەن شەبەرلىك ساباقتارى ءوتتى. مادەني سەرىكتەستىگىمىز ەكى حالىق اراسىنداعى دوستىقتى نىعايتۋعا ءوز سەپتىگىن تيگىزەدى دەپ ۇمىتتەنەمىن, – دەدى تۇڭعىش پرەزيدەنت كىتاپحاناسىنىڭ ديرەكتورى باقىتجان تەمىربولات.
كورەي رەسپۋبليكاسىنىڭ توتەنشە جانە وكىلەتتى ەلشىسى كۋ حونگ سوك بىلتىرعى مادەني الماسۋ جىلى بيىل دا جالعاسىن تاپقانىن اتاپ ءوتتى.
– 2023 جانە 2024 جىلدار كورەياعا بارۋ جىلى بولىپ جاريالاندى. وسىعان بايلانىستى قازىر ءتۇرلى ءىس-شارالار ءوتىپ جاتىر. سىزدەردى كورەيلەردىڭ ءداستۇرلى نانىم-سەنىمدەرى مەن شامانيزم تاقىرىبىنداعى كورىنىستەردى تۇسىرگەن فوتوگرافتارىمىزدىڭ مۇراعاتتارىنداعى سۋرەتتەر ارقىلى كورەيامەن تانىستىرامىز. بۇل فوتوسۋرەتتەر ۇزاق ۋاقىت بويى شىندىقتان تىس الەمدى تۇسىنۋگە تىرىسقان كورەيلەردىڭ جۇرەگىنە ۇڭىلۋگە مۇمكىندىك بەرەدى, – دەدى ەلشى.
سونداي-اق كورمە اۆتورلارىنىڭ ءبىرى لي حانگۋ ۆەنگريا مەن پولشادان كەيىن كورەي «گۋت» شامانيزمىنە ارنالعان بۇل كورمە ورتالىق ازيادا العاش رەت ءوتىپ وتىرعانىن ايتتى. «مۇندا اۆتورلاردىڭ ءارتۇرلى تۇسىندىرمەلەرىن, سونىمەن قاتار كورەي ءشامانيزمىنىڭ سوناۋ وتكەن داۋىردەن قازىرگى كۇنگە دەيىنگى وزگەرىستەرىن كورىپ, سەزىنەسىز. فوتوسۋرەتتەرمەن جۇمىس ىستەي وتىرىپ, مەن باقسىنىڭ ماڭىزدى پسيحوتەراپەۆتىك ءرول اتقاراتىنىنا, ادامداردىڭ قورقىنىشتارى مەن ۇرەيلەرىن ەمدەيتىنىنە كوز جەتكىزدىم. بۇل كورمە ارقىلى كەلۋشىلەر تەرەڭ ۇيقىداعى سەزىمدەرىن وياتىپ, شابىت الادى», دەدى ول.
كورمەگە كيم سوننام, كيم دونحي, لي گيۋچەل, پاك چانحو, ان سەحون, لي حانگۋ سەكىلدى التى دەرەكتى فوتوسۋرەتشىنىڭ جۇمىسى قويىلدى. ولار كورەي ونەرى مەن مادەنيەتىن, اتا-بابالار ءومىرى مەن رۋحىن, سونداي-اق بەس مىڭ جىلدىق تاريحى بار كورەي ءشامانيزمىن شەبەرلىكپەن اشا بىلگەن.
