قازاقستاندىق دەلەگاتسيانى قازاقستان رەسپۋبليكاسى پرەمەر-ءمينيسترىنىڭ ورىنباسارى – ساۋدا جانە ينتەگراتسيا ءمينيسترى سەرىك جۇمانعارين باسقاردى.
قازاقستاندىق جەتكىزۋشىلەرگە ەاەو ەلدەرىنىڭ ونەركاسىپتىك تاۋارلارىن مەملەكەتتىك ساتىپ الۋعا, ونىڭ ىشىندە ست-1 سەرتيفيكاتىن ۇسىنۋ ارقىلى كەدەرگىسىز قاتىسۋعا مۇمكىندىك بەرەتىن بىرقاتار قۇجاتتارعا وزگەرىستەر ەنگىزىلدى. ەاەو-عا مۇشە مەملەكەتتەردەن تاۋارلاردىڭ شىعۋ تەگىن ايقىندايتىن وندىرىستىك جانە تەحنولوگيالىق وپەراتسيالاردى جۇرگىزۋ شارتتارىنىڭ تىزبەسى ارنايى ماشينا جاساۋ, مەديتسينالىق ماقساتتاعى بۇيىمدار مەن مۇناي-گاز ماشينا جاساۋ تاۋارلارىنا قاتىستى 38 پوزيتسيامەن تولىقتىرىلدى. سونىمەن قاتار مۇنداي شارتتار قاراستىرىلماعان 174 تاۋار بويىنشا ەەك كەڭەسىنىڭ مۇشەلەرى تمد اۋماعىندا تاۋاردىڭ شىعارىلعان ەلىن ايقىنداۋ قاعيدالارىندا كوزدەلگەن تاۋارلاردى جەتكىلىكتى قايتا وڭدەۋ ولشەمدەرىن قولدانۋ تۋرالى شەشىم قابىلدادى. بۇل تۇزەتۋلەر ەاەو ەلدەرىنىڭ مەملەكەتتىك ساتىپ الۋ شەڭبەرىندە ساتىپ الىناتىن تاۋارلارعا وندىرىستىك جانە تەحنولوگيالىق وپەراتسيالاردى جۇرگىزۋ ءۇشىن ۇلتتىق شارتتاردى قولدانۋ تاجىريبەسىن الىپ تاستاۋعا مۇمكىندىك بەرەدى.
ۆەتەريناريالىق باقىلاۋ سالاسىنداعى ساۋدا كەدەرگىلەرىن تەڭەستىرۋ ءۇشىن كەڭەس مۇشەلەرى 2019 جىلدان بەرى وداق الاڭىندا تالقىلانىپ كەلە جاتقان ماسەلە بويىنشا ءبىرتۇتاس شەشىمگە كەلدى. ەندى قاتىسۋشىلار جانۋارلاردان الىناتىن ازىق-ت ۇلىك ونىمدەرىندە اتاۋى جوق ۆەتەريناريالىق دارىلىك زاتتار قالدىعىنىڭ قۇرامىن تەك تاماق ونىمدەرىنىڭ تەحنيكالىق رەگلامەنتىنە ستاندارتتاردىڭ بىرىڭعاي تىزبەسىنە ەنگىزىلگەن زەرتتەۋ ادىستەرىمەن عانا باقىلاۋدى ۇيعاردى. بۇل ەاەو-عا مۇشە مەملەكەتتەردىڭ باسقا ەلدەردە اتتەستاتتالماعان كەلىسىلمەگەن زەرتتەۋ ادىستەرى ارقىلى ساۋدا كەدەرگىلەرىن ەنگىزۋ تاۋەكەلدەرىن ازايتۋعا مۇمكىندىك بەرەدى.
سونداي-اق وداققا مۇشە ەلدەردىڭ بىرلەسكەن ونەركاسىپتىك كووپەراتسيالىق جوبالارىن ىسكە اسىرۋعا قارجىلىق كومەك كورسەتۋ تاسىلدەرى ماقۇلداندى. شەشىم جوباسىندا قارجىلىق كومەك ەاەو بيۋدجەتى ەسەبىنەن حالىقارالىق جانە ۇلتتىق قارجى ۇيىمدارى بەرەتىن نەسيەلەر مەن قارىزدار بويىنشا سىياقى مولشەرلەمەسىن سۋبسيديالاۋ تۇرىندە كورسەتىلەتىن بولادى. قۇجات ەاەو-عا مۇشە مەملەكەتتەر باسشىلارىنىڭ قول قويۋىنا جوعارعى كەڭەس وتىرىسىندا ۇسىنىلادى.
ەەك كەڭەسىنىڭ كەلەسى وتىرىسى 2023 جىلعى 19 مامىردا وتەدى.
