قارجى مينيسترلىگىنە 26 تارماقتىڭ ورىندالۋى بەكىتىلگەن, سوڭعى ەكى جىلدا ونىڭ 15-ءى تولىق كولەمدە اياقتالدى.
«وسى شارالاردى جۇزەگە اسىرۋ كەدەندىك تەكسەرۋلەردىڭ تيىمدىلىگىن ارتتىرۋعا, كامەرالىق باقىلاۋدى جاقسارتۋعا, كەدەندىك راسىمدەردى وڭتايلاندىرۋعا جانە اكىمشىلىك قۇقىق بۇزۋشىلىقتار بويىنشا قوسىمشا شارالار ازىرلەۋگە مۇمكىندىك بەردى. جالپى جۇزەگە اسىرىلىپ جاتقان شارالار سوڭعى 3 جىلدا ىشكى جالپى ونىمدەگى كولەڭكەلى ەكونوميكانىڭ ۇلەسىن 27%-دان 19,75%-عا دەيىن قىسقارتۋعا مۇمكىندىك بەرىپ, بيۋدجەتكە 2 ترلن تەڭگە قوسىمشا كىرىس ءتۇستى», دەپ اتاپ ءوتتى ەرۇلان جاماۋباەۆ.
سونداي-اق ۇقساس ستاتيستيكادا قىتاي اراسىنداعى سايكەسسىزدىكتەردى ازايتۋدا وڭ ناتيجەگە قول جەتكىزىلدى. جۇرگىزىلگەن جۇمىستاردىڭ قورىتىندىسى بويىنشا جەكەلەگەن تاۋارلار بويىنشا وزىندىك قۇن كورسەتكىشتەرى 2,5 ەسەگە ءوستى. ەكسپورتتىق دەكلاراتسيالاردى ونلاين الماسۋ جولعا قويىلدى.
ورتالىقتاندىرىلعان باقىلاۋدى جانە شەكارادان ءوتۋدى اۆتوماتتاندىرىلعان باقىلاۋدى قامتاماسىز ەتۋ, ادامي فاكتوردى جويۋ جانە سىبايلاس جەمقورلىق تاۋەكەلدەرىن ازايتۋ ماقساتىندا ديسپەتچەرلىك باس باسقارماسى قۇرىلدى.
«ناتيجەسىندە, 2022 جىلدىڭ قورىتىندىسى بويىنشا كەدەندىك تولەم مەن سالىق كولەمى 3,4 ترلن تەڭگەگە جەتتى, بۇل 2021 جىلمەن سالىستىرعاندا 50%-عا ارتىق», دەدى ەرۇلان جاماۋباەۆ.
قاناتقاقتى جوبا جۇزەگە اسىرىلعان 2 جىل ىشىندە اينالىم سوماسى 4,1 ترلن تەڭگە بولاتىن جالعان مامىلەلەر جاساسقان 9 مىڭعا جۋىق قاتىسۋشىنىڭ قىزمەتى انىقتالدى جانە شەكتەلدى. 1 ترلن تەڭگە سوماسىنا ءوزارا ەسەپ ايىرىساتىن 4 مىڭنان استام سۋبەكتىنى تىركەۋ سوت ورگاندارى ارقىلى جارامسىز دەپ تانىلىپ, 402 ملرد تەڭگەگە 3 890 مامىلەنى سوتتارمەن جارامسىز دەپ تانىلدى.
ەرۇلان جاماۋباەۆ مەملەكەت باسشىسىنىڭ تاپسىرماسىنا سايكەس, ەلدىڭ ترانزيتتىك الەۋەتىن ارتتىرۋ ماقساتىندا كەدەندىك ءترانزيتتى جەڭىلدەتۋ بويىنشا «قازاقستان تەمىرجولى» اق-مەن بىرلەسە جۇمىستاردىڭ ءجۇرىپ جاتقانىن جەتكىزدى. تەمىرجول تاسىمالداۋشىسى مەن مەملەكەتتىك كىرىستەر ورگاندارىنىڭ اقپاراتتىق جۇيەلەرىن ينتەگراتسيالاۋ, ونىڭ ىشىندە ارالاس قىزمەتتەردى باقىلاۋدى جەڭىلدەتە وتىرىپ, ترانزيتتىك دەكلاراتسيالار شىعارۋ كوزدەلىپ وتىر. قازاقستان ارقىلى قىتايدان ەۋروپاعا «ۇزدىكسىز» ترانزيتپەن جۇرەتىن تاۋارلارعا ترانزيتتىك دەكلاراتسيالاردى اۆتوماتتى تۇردە تىركەۋ جانە شىعارۋ ەنگىزىلۋدە.
كولەڭكەلى ەكونوميكانىڭ تومەندەۋى بيۋدجەتتىڭ كىرىس بولىگىن ۇلعايتۋدىڭ نەگىزگى فاكتورى بولىپ تابىلاتىنىن ەسكەرە وتىرىپ, مينيسترلىك جاڭا كەشەندى جوسپارعا قوسىمشا ءىس-شارالار ەنگىزدى. بۇل — ەلەكتروندىق تاۋارعا مىندەتتى ىلەسپە قۇجاتتاردى ەنگىزۋ جولىمەن مۇناي جانە مۇناي ونىمدەرى اينالىمى سالاسىنداعى باقىلاۋدى كۇشەيتۋ.
ءسوز سوڭىندا ەرۇلان جاماۋباەۆ جوسپاردىڭ ءىس-شارالارى بويىنشا جۇمىس بەلگىلەنگەن ۋاقىتتا ىسكە اسىرىلاتىنىن اتاپ ءوتتى. بۇل ماسەلە ۇكىمەتتىڭ تۇراقتى باقىلاۋىندا.
