قازىر وڭىردەگى 35 مىڭ كاسىپكەرلىك نىساندى قىز-كەلىنشەكتەر باسقارادى. كاسىپكەرلىككە بەت بۇرعان ايەلدەر تاراپىنان مەملەكەتتىك باعدارلامالارعا قاتىسۋ بەلسەندىلىگى بايقالادى. بىلتىر 600 ايەل كاسىپكەردىڭ جوباسى قارجىلاندىرىلعان. ءوز كاسىبىن اشۋعا نيەت بىلدىرگەن 37 كاسىپكەرگە 106 ملن تەڭگەنىڭ قايتارىمسىز گرانتى ۇسىنىلعان. ونىڭ 24-ءى – ايەلدەر. ولار جاڭادان 30 جۇمىس ورنىن اشقان. قىز-كەلىنشەكتەر جەتەكشىلىك ەتەتىن كاسىپكەرلىك سۋبەكتىلەرى نەگىزىنەن ءبىلىم بەرۋ, دەنساۋلىق ساقتاۋ, جەڭىل ونەركاسىپ سالالارىن دامىتۋعا باعىتتالعان.
تابىس كوزىن كاسىپكەرلىكتەن تاپقانداردىڭ اراسىندا ماحامبەت اۋدانىنىڭ العا اۋىلىندا تۇراتىن گۇلجانات ەرقاليەۆا دا بار. كوپبالالى انا جەكە كاسىبىن باستاۋ ءۇشىن 2019 جىلى «بيزنەس باستاۋ» باعدارلاماسىنا قاتىسىپ, 505 مىڭ تەڭگە قايتارىمسىز گرانت العان. قازىر ول سۇلۋلىق سالونى مەن كيىم دۇكەنىن اشقان.
– ءوزىم – ورالدىڭ قىزىمىن. ومىرلىك سەرىگىم مارال دىنعاليەۆكە 2013 جىلى تۇرمىسقا شىعىپ, العا اۋىلىنا كەلىن بولىپ ءتۇستىم. نەگىزگى ماماندىعىم – ديزاينەر. ەكى بالامىز ومىرگە كەلگەننەن كەيىن جۇمىسقا شىعۋدى ويلاستىردىم. بىراق بالالارعا قارايتىن ادام بولمادى. كۇيەۋىم شاعىن كاسىپ اشۋعا كەڭەس بەردى. العاشىندا ءتۇرلى زاتتار ساتا باستادىم. سودان سوڭ جولداسىم ەكەۋمىز «بيزنەس باستاۋ» باعدارلاماسىنا قاتىسىپ, ارنايى كۋرستان وتتىك. ءوزىمنىڭ اتىما مەملەكەتتەن قايتارىمسىز گرانت الىپ, ءۇيىمىزدىڭ ءبىر بولمەسىنەن سۇلۋلىق سالونىن اشتىق. كەيىن شاعىن عيمارات سالدىق. ءبىر جاعىندا سۇلۋلىق سالونى, ەكىنشى بولىگىندە كيىم دۇكەنى بار. جولداسىم شاشتارازدىقتى مەڭگەردى. ال ءوزىم قىز-كەلىنشەكتەردىڭ بەتىن, تىرناعىن ارلەيمىن, دەيدى گ.ەرقاليەۆا.
ال گۇلزيا يسەمباەۆا بەسىك جاساۋىن ۇلتتىق ناقىشپەن تىگۋگە بەت بۇرعان. بۇرىن ونىڭ اۋلەتىندە تىگىنشىلىكپەن ەشكىم اينالىسپاعان. ءوزى بىرنەشە جىل بۇرىن قۇرىلىس يندۋسترياسىندا ينجەنەر-ەكولوگ بولىپ جۇمىس ىستەگەن.
– تىگىنشىلىكتى قولعا العانىمدا, بۇل قادامىما تاڭدانىسپەن قاراعاندار كوپ بولدى. سەبەبى بۇرىن مۇنداي ىسكە بەت بۇرۋدى ويلاعان جوق ەدىم. تۇڭعىش قىزىم بويجەتكەن سوڭ ماتەريالدىق, قارجىلىق يگىلىكتەر بالا قۋانىشىن الماستىرا المايتىنىن ۇعىندىم. سول كەزدە بالا سۇيسەك دەگەن ويعا بەكىندىك. وسىنى سەزگەن بولۋى كەرەك, قىزىم بەسىك تەربەتىپ وتىرعان انانىڭ سۋرەتىن سىيلادى. ءتىپتى اعايىن-تۋىستار, دوس-جاراندار ومىرگە كەلگەن بالالارىنا كىندىك شەشە بولۋىمدى ءوتىندى. ەشقايسىسىنا قارسى بولمادىم. قولقا سالعانداردىڭ بوبەگىنە قاجەتتى دۇنيەلەردى ىزدەپ ءجۇرىپ, ۇلتتىق ناقىشتاعى تۇرلەرى تابىلماعانىنا قىنجىلدىم. وسى ولقىلىقتىڭ ورنىن تولتىرۋ ءۇشىن قولىما ءىس تىگەتىن ماشينكا الىپ, بەسىك جاساۋىن تىگۋدى باستادىم, دەيدى گۇلزيا يسەمباەۆا.
ارينە جاڭا كاسىبى ءۇشىن بۇرىنعى جۇمىسىنان باس تارتۋعا تۋرا كەلدى. ءسويتىپ, ءوزى ديزاينەرلىكتى دە, تىگىنشىلىكتى دە مەڭگەرىپ العان.
ۇلتتىق ناقىشپەن بەسىك جاساۋىن تىگەتىن شەبەردىڭ قولىنان شىققان بۇيىمدى تاپسىرىسپەن الدىراتىندار كوبەيدى. تاپسىرىس بەرۋشىلەر بەسىك جاساۋىن اقش-تا ومىرگە كەلگەن نەمەرەسىنە, وڭتۇستىك كورەيادا ءوسىپ جاتقان جيەندەرىنە جىبەرگەن. رەسەي فەدەراتسياسىنداعى استراحان, ورىنبور وبلىستارىندا تۇراتىن قانداستاردان دا تاپسىرىس ءتۇسىپ تۇرادى.
«بەسىكتىڭ ءار جاساۋىن بار ىنتاممەن تىگۋگە تىرىسامىن. ويتكەنى بەسىك جاساۋى كىشكەنتاي ءسابي ءۇشىن جايلى, اتا-اناسىنا, سول وتباسىنداعى ادامدارعا ۇنايتىنداي ادەمى بولۋى كەرەك. ۇلتتىق ناقىشتاعى ويۋدى سالۋ ءۇشىن ارنايى قۇرىلعىنى پايدالانامىن. وسى ءىستى قولعا العاندا, بەسىك جاساۋىنان ۇلتتىق ناقىشتى كورگىم كەلدى», دەيدى جەرگىلىكتى شەبەر.
تىگىنشىنىڭ ايتۋىنا قاراعاندا, ءسابي ءسۇيۋدى اڭساعان جۇپتار دا بەسىك جاساۋىن ساتىپ الادى. كەيىن ءسۇيىنشى سۇراپ, قۋانىشىمەن بولىسەتىندەرى بار.
«قازاق – ىرىمشىل حالىق. بەسىك جاساۋىن ىرىمداپ العاندار دا ءسابي سۇيگەنىن قالايمىن. بۇل كاسىپتى ادامدارعا قۋانىش, باقىت سىيلاۋدىڭ جولى دەپ ەسەپتەيمىن. سول سەبەپتەن, ءار تىگىستى جۇرگىزگەندە, بوبەككە قۋانىش سىيلاعانىن ىشتەي تىلەپ وتىرامىن», دەيدى گۇلزيا يسەمباەۆا.
اتىراۋ وبلىسى
