تاياۋدا ەنەرگەتيكا مينيسترلىگى فەرمەرلەر ءۇشىن ديزەل وتىنىنىڭ باعاسى وزگەرىسسىز قالادى دەپ مالىمدەگەن. بىزگە وبلىس اكىمدىگى ارقىلى جەتكەن رەسمي اقپاراتتا جانارماي بەكەتتەرىندە 1 توننا ديزەلدى وتىننىڭ باعاسى 222 مىڭ تەڭگە نەمەسە 1 ءليترى 184 تەڭگە بولاتىنى ايتىلعان. اۋىلشارۋاشىلىق تاۋارىن وندىرۋشىلەر وپەراتورلارىنىڭ شىعىنىن قوسا ەسەپتەگەندە, 1 ليتر ديزەل وتىنىنىڭ باعاسى ورتا ەسەپپەن 204 تەڭگە بولادى.
بيىل قوستاناي وبلىسىنا مەملەكەت كوكتەمگى القاپ جۇمىستارىن ويداعىداي اتقارىپ الۋ ءۇشىن 413 مىڭ توننا جەڭىلدەتىلگەن جانارماي ءبولىپ وتىر.
مينيسترلىكتىڭ مالىمەتىنشە, جەڭىلدەتىلگەن جانارماي ءاشتو وپەراتورلارىنا بەلگىلەنگەن ۋاقىتقا ساي جىبەرىلىپ جاتىر. ماسەلەن, اقپان ايىندا 82,1 مىڭ توننانىڭ 77,4 تونناسى, ناۋرىزدا 102,2 مىڭ توننانىڭ 78,4 تونناسى جونەلتىلگەن. ەڭ باستىسى, وتىنىمدەر مەن تولەمدەر كەشىكپەي, دەر كەزىندە ۆاگون-تسيستەرنالارمەن قامتاماسىز ەتۋ وتىرۋ ماڭىزدى.
ءوڭىر شارۋاشىلىقتارىنىڭ ءبىرازى كوكتەمگى ەگىس ناۋقانىنا جەتەتىن جانارماي قورىن باعا قىمباتتاماي تۇرىپ جيناپ العان. سوندىقتان شارۋالاردى كوكتەمگى ءدان ءسىڭىرۋ جۇمىستارىنان گورى, ودان كەيىنگى القاپتى وڭدەۋ, ءشوپ شابۋ كەزىندەگى, سونداي-اق كۇزگى جيىن-تەرىن ناۋقانىنداعى جانارماي باعاسىنىڭ قالاي بولاتىنى كوبىرەك الاڭداتادى.
ويتكەنى بۇدان كەيىن جەڭىلدەتىلگەن ديزەل وتىنى قازىرگى نارىقتاعى باعاسىنان نەبارى 5-10 تەڭگە ارزان بەرىلۋى مۇمكىن. مۇنىڭ سىرتىندا, جانارمايدان سوڭ ىلە-شالا تەحنيكا, قوسالقى بولشەكتەر, ازىق-ت ۇلىك, ەلەكتر ەنەرگياسى, وزگە دە اۋىل شارۋاشىلىعىمەن تىعىز بايلانىستى قىزمەت تۇرلەرى قىمباتتاپ كەتۋى مۇمكىن.
بىرتىندەپ وبلىسقا كەلىپ جاتقان جەڭىلدەتىلگەن جانارمايعا ءالى قول جەتكىزە الماي وتىرعان شارۋاشىلىقتار دا بار.
– بىزگە جانارماي تۇگىلى, ءالى ءليميتتى دە بەرگەن جوق. جىلدا ءار شارۋاشىلىقتا قانشا ىلعال جابىلادى, نەشە گەكتارعا ەگىن ەگىلەدى, ءبارىن ەسەپتەپ, سوعان وراي ليميت بەرەتىن. سول ءليميتتى ءالى العان جوقپىز. وسىنىڭ ءبارى قۇددى ادەيى ىستەلىپ جاتقان سياقتى كورىنەدى كەيدە. نەگە وسى بىزدە جانارماي ۇنەمى ناۋقان ابدەن تاياعان كەزدە عانا قىمباتتايدى؟ جازدا نەمەسە قىستا نەگە قىمباتتامايدى؟ جوق, جۇرتتىڭ ءبارى تيىن-تەبەنىن ءار نارسەگە زورعا جەتكىزىپ جاتقاندا قىلعىندىرىپ, جىعىلعانعا جۇدىرىقتىڭ كەرىن كەلتىرەدى. شەرحان مۇرتازاشا ايتساق, «جاپالاقتى تاسقا ۇرساڭ دا جاپالاق ولەدى, تاستى جاپالاققا ۇرساڭ دا جاپالاق ولەدىنىڭ» كەبىن كيىپ وتىرىمىز. شىنىمدى ايتسام, ءبىزدىڭ شارۋاشىلىق مەملەكەتتىڭ قولاداۋىنا مۇقتاج ەمەس. ءبىز وسى ارزان جانارمايسىز دا جەر جىرتىپ, ەگىن ەگە الامىز. مەن تەحنيكاسى ەسكى, قالتاسى تاقىل-تۇقىل شاعىن شارۋاشىلىقتاردىڭ ەرتەڭگى كۇنى نە بولادى دەپ الاڭدايمىن. ولار جارىتىپ ءونىم الىپ جاتپاسا دا, سول ماڭايداعى ءبىردى-ەكىلى اۋىلدارعا ەس بولىپ وتىر عوي, – دەيدى تاجىريبەلى ديقان ىبىراش ەستاەۆ.
