جازۋشى مۇحتار اۋەزوۆتىڭ ۇلى مۇرات اۋەزوۆتى ەل-جۇرتى مادەنيەتتانۋشى-عالىم, ديپلومات, مەملەكەت جانە قوعام قايراتكەرى رەتىندە تانيدى. ول حالقىمىزدىڭ رۋحاني مادەنيەتىن دامىتۋعا, ورتالىق ازيا حالىقتارىنىڭ تاريحي-مادەني قۇندىلىقتارىن زەردەلەۋ مەن ناسيحاتتاۋعا ولشەۋسىز ۇلەس قوستى. «1949 جىلى ناۋرىز ايىندا الماتىعا كەلدىك, سول جىلى كۇزدە قالاداعى قازاق مەكتەبىنە 1-سىنىپقا باردىم. 4-سىنىپتا ورىس مەكتەبىنە اۋىسۋعا تۋرا كەلدى. ءارىپ تانىعان كۇننەن باستاپ اكەم ماعان قازاق ادەبيەتى مەن تاريحىن تانىتۋعا دەن قويدى. قازاقتىڭ ۇلى اقىنى ماعجان جۇماباەۆ تۋرالى العاش مەكتەپتە وقىپ جۇرگەنىمدە اكەم مەن انامنان ەستىدىم. انام فاتيما عابيتوۆا اقىنجاندى ەدى. ماعجان, ءىلياستار ۇستالىپ كەتسە دە ولاردىڭ شىعارمالارىن كوزىنىڭ قاراشىعىنداي قورعادى. كەشكىسىن بىزگە ەسىك-تەرەزەنى جاۋىپ سول كىسىلەردىڭ شىعارمالارىن وقىپ بەرەتىن», دەيدى م.اۋەزوۆ.
كىشى اۋەزوۆتىڭ تانىمىندا مۇحاڭ ول ءۇشىن اكە عانا ەمەس, ۇلى ۇستاز. تەك حالقىنا عانا ەمەس, بالالارىنا, وتباسىنا ۇستاز بولا ءبىلدى. «اپكەم ءلايلا مۇحتارقىزى كورنەكتى تاريحشى عالىم. باۋىرىم ەرنار قۇستىڭ قاراشىعىن زەرتتەگەن, دۇنيە جۇزىنە اتاعى شىققان عالىم-ورنيتولوگ. ماسكەۋگە وقۋعا بارىپ, ماماندىق تاڭداعانىمدا اكەم جول كورسەتتى. وتە بالاجان ەدى», دەيدى مۇرات مۇحتار ۇلى.
قازاق ءتىلىن جەتىك بىلمەگەنىمەن, ول ءوزىن «قازاق تىلىنە ورالعان اداممىن» دەپ سانايدى. ء«ورىستىلدى بولسام دا جۇرەگىم قازاق دەپ سوققان. ۋاقىت وتە قازاق ءتىلىن مەڭگەرۋدى ءجون سانادىم. بۇل جەردە جالعىز مەن عانا ەمەس, قاسىمداعى دوستارىممەن بىرىگىپ ۇيرەنۋگە بەل بۋدىق. سوندا قايسىمىز ورىسشا سويلەپ قويساق, بەس تيىننان ايىپپۇل تولەيمىز دەپ كەلىستىك. سولاي قازاق تىلىنە ورالا باستادىق», دەيدى قازاقتىڭ ۇلى تۇلعاسىنىڭ ۇرپاعى.
الماتى
