سالىق كودەكسىنىڭ 19-بابىندا مەملەكەتتىك كىرىستەر ورگانى سالىق مىندەتتەمەسىنىڭ ورىندالۋىن قامتاماسىز ەتۋ تاسىلدەرىن قولدانۋعا جانە سالىق تولەۋشىنىڭ سالىقتىق بەرەشەگىن ماجبۇرلەپ ءوندىرىپ الۋعا مىندەتتى ەكەندىگى كوزدەلگەن.
بۇل رەتتە مەرزىمىندە ورىندالماعان سالىق مىندەتتەمەسىنىڭ ورىندالۋىن قامتاماسىز ەتۋ تاسىلدەرىن قولدانۋ باستالعانعا دەيىن سالىق تولەۋشىگە سالىق بەرەشەگىن وتەۋ تۋرالى حابارلاما جىبەرىلەدى.
بۇل حابارلاما ورىندالماعان جاعدايدا مەملەكەتتىك كىرىستەر ورگانى تاۋەكەلدەردى باسقارۋ جۇيەسىنە سايكەس مىناداي ساناتقا جاتقىزىلعان:
تاۋەكەلدىڭ جوعارى دەڭگەيى (سالىق بەرەشەگىن وتەۋ تۋرالى حابارلاما تابىس ەتىلگەن كۇننەن باستاپ ءبىر جۇمىس كۇنى وتكەن سوڭ)
تاۋەكەلدىڭ ورتاشا دەڭگەيى (سالىق بەرەشەگىن وتەۋ تۋرالى حابارلاما تابىس ەتىلگەن كۇننەن باستاپ ون جۇمىس كۇنى وتكەن سوڭ سالىق تولەۋشىنىڭ بانكتىك شوتتارى مەن كاسساسى بويىنشا شىعىس وپەراتسيالارىن توقتاتا تۇرۋدى جۇرگىزەدى)
شىعىس وپەراتسيالارىن توقتاتا تۇرۋ تۋرالى وكىمدى شىعارعان مەملەكەتتىك كىرىستەر ورگانى سالىق بەرەشەگى وتەلگەن كۇننەن كەيىنگى ءبىر جۇمىس كۇنىنەن كەشىكتىرمەي بانكتىك شوتتار مەن كاسساسى بويىنشا شىعىس وپەراتسيالارىن توقتاتا تۇرۋ تۋرالى وكىمىنىڭ كۇشىن جويادى.
بۇل رەتتە بانكتىك شوتتار مەن كاسساسى بويىنشا شىعىس وپەراتسيالارىن توقتاتا تۇرۋ تۋرالى وكىم قالىپتاستىرۋ جانە جىبەرۋ «ورتالىقتاندىرىلعان بىرىزدەندىرىلگەن دەربەس شوتتار» اقپاراتتىق جۇيەسىندە جۇرگىزىلەتىن دەربەس شوتتاردىڭ دەرەكتەرىن ەسكەرە وتىرىپ, «قازاقستان رەسپۋبليكاسىنىڭ ينتەگراتسيالانعان سالىقتىق اقپاراتتىق جۇيەسى» اقپاراتتىق جۇيەسىندە اۆتوماتتى رەجيمدە جۇرگىزىلەدى.
سالىق قارىزدارىن ءوندىرۋدىڭ اتالعان شارالارى تەك جەكە كاسىپكەرلەر مەن زاڭدى تۇلعالارعا قاتىستى قولدانىلادى.
