«بۇگىنگى تاڭدا ۇلتتىق ەكونوميكا قولايسىز سىرتقى جاعدايلارعا بەيىمدەلە وتىرىپ, ورنىقتى ءوسۋ جولىنا شىعىپ وتىر. سىرتقى كۇردەلى احۋالعا قاراماستان, 2022 جىلى ەكونوميكامىزدىڭ ناقتى ءوسۋى 3,2%-دى قۇرادى. ەلىمىزگە $28 ملرد تىكەلەي شەتەلدىك ينۆەستيتسيالار تارتىلىپ, 18% ءوسىم قامتاماسىز ەتىلدى. نەگىزگى كاپيتالعا سالىنعان ينۆەستيتسيالاردىڭ ناقتى كولەمى 8%-عا ۇلعايدى. سىرتقى ساۋدا اينالىمى 32%-عا ءوسىپ, $134 ملرد بولدى», دەدى ۇكىمەت باسشىسى.
ونىڭ ايتۋىنشا, جۇمىس ىستەيتىن شاعىن جانە ورتا كاسىپكەرلىك سۋبەكتىلەرىنىڭ سانى 27%-عا ارتىپ, 1,8 ملن-نان استى. وسى سەكتوردا جۇمىسپەن قامتىلعانداردىڭ جالپى سانى 13%-عا ءوسىپ, 3,9 ملن ادامعا جەتتى. ناتيجەسىندە ەكونوميكاداعى شوب ۇلەسى قازىردىڭ وزىندە 36%-دى قۇرادى ء(بىر جىل بۇرىن 33,5%).
ۇكىمەت باسشىسى بيىل قابىلدانعان شارالار ەكونوميكانىڭ تۇراقتى دامۋىن قامتاماسىز ەتۋگە مۇمكىندىك بەرگەنىن اتاپ ءوتتى.
ماسەلەن, قاڭتار-ناۋرىز ايلارىندا ءىجو-ءنىڭ ناقتى ءوسىمى 4,9%-دى قۇرادى. بارلىق نەگىزگى باعىتتار بويىنشا وڭ ديناميكا قالىپتاسىپ وتىر: قۇرىلىستا – 16% ساۋدادا – 12% كولىك سالاسىندا – 8% وڭدەۋ ونەركاسىبىندە – 5,4% ءوسىم تىركەلدى. نەگىزگى كاپيتالعا سالىنعان ينۆەستيتسيالاردىڭ ناقتى كولەمى ءۇش ايدا 16%-عا, ال مەملەكەتتىك بيۋدجەت كىرىسى 24%-عا ارتتى.
بۇل ءوز كەزەگىندە, بيىلعى جىلعا ارنالعان رەسپۋبليكالىق بيۋدجەتتى ناقتىلاۋ كەزىندە الەۋمەتتىك تولەمدەرگە, دەنساۋلىق ساقتاۋ مەن ءبىلىم بەرۋ سالالارىن, ناقتى سەكتور مەن ينفراقۇرىلىمدى دامىتۋعا قوسىمشا 2,2 ترلن تەڭگە بولۋگە مۇمكىندىك بەردى. سونداي-اق قازاقستاننىڭ حالىقارالىق رەزەرۆتەرى $94 ملرد قۇرادى.
اتاپ ايتقاندا, وتكەن جىلدىڭ باسىنان بەرى ۇلتتىق قوردىڭ اكتيۆتەرى $3 ملرد-قا ءوسىپ, $58 ملرد-قا جەتتى.
پرەمەر-مينيستر حالىقارالىق رەيتينگتىك اگەنتتىكتەر قازاقستاننىڭ ينۆەستيتسيالىق رەيتينگىن سەنىمدىلىك دەڭگەيىندە راستاعانىن, ال Standard&Poor's اگەنتتىگى بيىلعى ناۋرىز ايىندا ەكونوميكامىزعا قاتىستى ءوز بولجامىن جاقسارتقانىن ايتتى.
