سۋرەت «ەگەمەن قازاقستاننىڭ» ارحيۆىنەن الىندى
پىكىر يەلەرى اراسىندا سول ماڭداعى تال-داراقتىڭ الىنىپ تاستالاتىنىنا وكىنىش بىلدىرۋشىلەر دە, بيلىكتىڭ باسقا كوشەلەرگە كوز قىرىن سالۋىن سۇراعاندار دا بار ەكەن. ىلە-شالا وتكەن قوعامدىق كەڭەس وتىرىسىندا وبلىس اكىمى نۇرلىبەك نالىباەۆ وسىعان قاتىستى بايلامىن ايتتى. مەملەكەت باسشىسى قاسىم-جومارت توقاەۆ بەكىتكەن «حالىق ۇنىنە قۇلاق اساتىن مەملەكەت» تۇجىرىمداماسىنا ساي عيمارات قورشاۋى الىنىپ, ورنىنا جاڭا ساياباق سالىنادى.
«حالىقتان قىمتانىپ, تىعىلىپ وتىرمايمىز. اكىمدىك قورشاۋىنىڭ ءبارىن الىپ, پارك ەتىپ جاسايمىز», دەدى ايماق باسشىسى. بەيبارىس سۇلتان كوشەسىنىڭ قوس داڭعىلدىڭ ورتاسىنداعى وسى بولىگىنە سۋبۇرقاقتار سالىنىپ, ورىندىقتار ورناتىلادى. جۇرت ەمىن-ەركىن سەرۋەندەيتىن ساياباق كۇزدە پايدالانۋعا بەرىلەدى.
تاۋەلسىزدىك جولىن تاڭداعالى بەرى تالاي وتكەلدەن وتكەن قوعامنىڭ باستى بايلىعى بىرلىك ەدى. بىراق كەيىنگى جىلدارى وسى قۇندىلىقتىڭ دا قولدان سۋسىپ بارا جاتقانى بايقالىپ قالادى. ورتالىقتان ەل اراسىنا اندا-ساندا ءبىر شىعاتىن شەندىلەردىڭ كەزدەسۋگە قالىڭ نوكەرىن ەرتە كەلەتىنى قاراپايىم حالىقتان ىرگەسىن اۋلاق سالا باستاعانىنىڭ بەلگىسى ەدى. جەرگىلىكتى اكىمدىكتەر مەن باسقا دا قۇزىرەتتى مەكەمەلەردىڭ جۇرتتان جەرىپ, بوي جەتپەس قورشاۋدى تاسالانىپ العانى دا بيلىك پەن بۇقارا اراسىن سۋىتا بەرگەنى بەلگىلى. بىراق كەشەگى قاھارلى قاڭتار قورشاۋدىڭ ەشقاشان قورعان بولماسىن كورسەتىپ كەتكەن جوق پا؟
جالپى, سىر وڭىرىندە بيلىكتىڭ ەلمەن ەتەنە بولۋى ءۇشىن جاسالعان قادام از ەمەس. وسى ۋاقىتقا دەيىن وبلىس اكىمىنىڭ 30-عا جۋىق جەكە قابىلداۋىنا 600-دەن استام تۇرعىن كەلىپتى. قابىلداۋدا جەدەل شەشىلۋگە ءتيىس كەيبىر ماسەلەلەرگە وراي ءتيىستى ورىندارعا شۇعىل تاپسىرمالار بەرىلدى. ودان بولەك, پرەزيدەنت جارلىعىنا سايكەس ايماق باسشىسى وبلىستاعى قۇقىق قورعاۋ ورگاندارى جەتەكشىلەرىمەن بىرگە قالا مەن اۋداندا تۇرعىندارمەن كەزدەستى.
مۇنداي كەزدەسۋلەردە جەكە ماسەلەلەرمەن قاتار ەلگە ورتاق پروبلەمالار دا كوتەرىلەدى. مىسالى, جالاعاش اۋدانىندا وتكەن كەزدەسۋدە مىرزاباي احۋن اۋىلىنا جاڭا ەمحانا سالۋ جونىندە ۇسىنىس ايتقان ەلدى مەكەن تۇرعىنىنا نىساننىڭ قۇرىلىس-سمەتالىق قۇجاتتاماسى ازىرلەنىپ, جاقىن ارادا قۇرىلىسى باستالاتىنى ايتىلدى. سىرداريا اۋدانىنداعى قوعالىكول اۋىلى مەن وبلىس ورتالىعىن جالعايتىن جولدىڭ توزىعى جەتكەندىگىن ايتقان ەلدى مەكەن تۇرعىنى داۋلەت قىرداننىڭ پىكىرىن ەسكەرگەن ايماق باسشىسى ماسەلەنىڭ شەشىمىن قاراستىرۋدى تاپسىردى. «وبلىس اكىمىمەن كەزدەسۋدەن كەيىن اۋدان اكىمدىگىنەن مەنىڭ ۇسىنىسىم بويىنشا جاقىن ارادا جوندەۋ جۇمىستارى باستالاتىنى جايلى حات كەلدى. كوپ جىلدان بەرى شەشىمىن تاپپاعان ماسەلەنىڭ ەسكەرىلگەنىنە قۋانىشتىمىن», دەيدى اۋىل تۇرعىنى.
قالانىڭ ىرگەسىندەگى «ەڭبەك» ساياجايىن قونىستانعان تۇرعىندار اۋىز سۋ, تابيعي گاز بەن ەلەكتر جارىعى سەكىلدى يگىلىكتەردەن قۇر قالىپ وتىر ەدى. بۇل ماسەلە دە بيلىك پەن حالىقتىڭ تىكەلەي بايلانىسىنىڭ ارقاسىندا شەشىمىن تاپتى.
وسى جىلى 22 اقپاندا وتكەن جەكە قابىلداۋدا ساياجاي تۇرعىندارىنىڭ ءوتىنىشىن تىڭداعان وبلىس باسشىسى نۇرلىبەك نالىباەۆ قالا اكىمى مەن وبلىستىق ەنەرگەتيكا جانە تۇرعىن ءۇي كوممۋنالدىق شارۋاشىلىعى باسقارماسىنىڭ باسشىسىنا ساياجاي اۋماعىنداعى ينفراقۇرىلىم ماسەلەسىن مۇقيات زەرتتەپ, 10 ناۋرىزدا ەلەكتر جارىعىن جۇرگىزۋدى مىندەتتەگەن ەدى. ەل تىلەگى اياقسىز قالعان جوق. ايتىلعان مەرزىمدە ساياجايدا ينفراقۇرىلىم تارتۋ باستالىپ كەتتى. ورتالىق 3 كوشەگە 2,8 شاقىرىم كابەل مەن 36 جارىقشام باعانى ورناتىلدى. ءسوز بەن ءىستىڭ ۇيلەسىم تاپقانىن كورسەتەتىن بۇل جۇمىستار دەمەۋشىلەر قارجىسى ەسەبىنەن جۇزەگە اسىرىلدى.
اشىقتىق قاعيداتى اياسىندا وبلىس اكىمىنىڭ ورىنباسارلارى, قالا, اۋدان اكىمدەرى مەن وبلىستىق باسقارما باسشىلارى ەلدى مەكەندەردى ارالاپ, قوعامدىق قابىلداۋ وتكىزىپ ءجۇر. ايماق باسشىسىنىڭ تاپسىرماسىمەن باسقارما, قالا جانە اۋدان اكىمدىكتەرى, ولاردىڭ ءبىرىنشى باسشىلارى الەۋمەتتىك جەلىلەردە رەسمي پاراقشا اشىپ, تۇرعىندار ۇسىنىس-پىكىر, ساۋالدارىن تىكەلەي ايتىپ, جاۋابىن ونلاين رەجىمدە الا الادى.
وسىعان دەيىن جۇمىسپەن بارعانىمىزدا اكىمدىككە مۇڭىن ايتا كەلىپ, قورشاۋدان وتە الماي قاجىعان جۇرتتى تالاي كورگەنبىز. قازىر تۇرعىندار وبلىس اكىمىنىڭ قابىلداۋىنا egov پورتالى, ە-otinish بىرىڭعاي بازاسى ارقىلى تىركەلە الادى. اكىمدىككە كەلىپ جازباشا ءوتىنىش تاستاۋ ارقىلى دا جازىلۋعا بولادى.
بىلتىر وبلىس اكىمى قىزمەتىنە تاعايىندالا سالا وتكىزگەن العاشقى جيىندا نۇرلىبەك نالىباەۆ اكىم اپپاراتىندا شتاتتاعى جانە شتاتتان تىس كەڭەسشى لاۋازىمدارى بولمايتىنىن مالىمدەگەن ەدى. «بۇدان ءارى وبلىس اكىمىنىڭ شتاتتاعى جانە شتاتتان تىس كەڭەسشى لاۋازىمدارى بولمايدى. كەز كەلگەن ادامعا كەڭەسشى دەگەن كۋالىكتى تاراتا بەرۋدى قويۋىمىز كەرەك. ءبىزدىڭ كەڭەسشىمىز – حالىق!», دەگەن وبلىس اكىمىنىڭ ەلگە جاقىن بولۋداعى باستاماسىن كوپشىلىك قولدايدى.
قازىر قاراپايىم حالىق پەن بيلىكتىڭ اراسىن ءبولىپ تۇرعانداي كورىنەتىن قورشاۋ الىنا باستادى. ەندى عيماراتىن اينالدىرا قورشاپ, سىرتقا بيىك دۋالدان سىعالاپ قاراپ وتىرعان جەرگىلىكتى قۇقىق قورعاۋ مەكەمەلەرى دە ەلمەن ەتەنە بولۋدىڭ وسى قادامىنا قوسىلسا, قۇبا-قۇپ بولار ەدى.
قىزىلوردا وبلىسى
