كەزدەسۋدىڭ ماقساتى مۇرات مۇحتار ۇلى اۋەزوۆتىڭ ءومىرى مەن شىعارماشىلىعىن وسكەلەڭ ۇرپاققا ناسيحاتتاۋ. ونىمەن بىرگە داڭقتى قازاق قايراتكەرىنىڭ ۇرپاعى ديار قوناەۆ بولدى.
قالامگەردىڭ ۇلى مۇرات اۋەزوۆتى ەل-جۇرتى مادەنيەتتانۋشى-عالىم, ديپلومات, مەملەكەت جانە قوعام قايراتكەرى رەتىندە تانىلدى. ول حالقىمىزدىڭ رۋحاني مادەنيەتىن دامىتۋعا, ورتالىق ازيا حالىقتارىنىڭ تاريحي-مادەني قۇندىلىقتارىن زەردەلەۋ مەن ناسيحاتتاۋعا ولشەۋسىز ۇلەس قوستى.
«1949 جىلى ناۋرىز ايىندا الماتىعا كەلدىك, سول جىلى كۇزدە الماتىداعى قازاق مەكتەبىنە 1 سىنىپقا باردىم. 4 سىنىپقا بارعاندا ورىس مەكتەپكە اۋىسۋعا تۋرا كەلدى. اكەم ءارىپ تانىعان كۇننەن باستاپ قازاق ادەبيەتى, تاريحىمەن تانىسۋىما دەن قويدى. قازاقتىڭ ۇلى اقىنى ماعجان جۇماباەۆ تۋرالى مەن مەكتەپ قابىرعاسىندا جۇرگەن كەزدە اكەم مەن انامنان ەستىدىم. انام اقىن-جاندى ەدى. ماعجان, ءىلياستار ۇستالىپ كەتكەن سوڭ دا ولاردىڭ شىعارمالارىن كوزىنىڭ قاراشىعىنداي قورعادى, كەشكىسىن بىزگە ەسىك-تەرەزەنى جاۋىپ ماعجاننىڭ شىعارمالارىن وقىپ بەرەتىن ەدى», دەيدى م. اۋەزوۆ.
كىشى اۋەزوۆتىڭ تانىمىندا مۇحتار اۋەزوۆ تەك اكە عانا ەمەس, ۇلى ۇستاز. تەك حالقىنىڭ عانا ەمەس, بالالارىنا, وتباسىنا ۇستاز بولا ءبىلدى.
«اپكەم ءلايلا مۇحتارقىزى كورنەكتى تاريحشى عالىم. باۋىرىم ەرنار قۇستىڭ قاراشاعىن زەرتتەگەن – دۇنيە جۇزىنە اتاعى شىققان ۇلكەن عالىم-ورنيتولوگ. ءوزىم دە وسال ەمەسپىن. ماسكەۋدە وقىعاندا ماماندىقتى تاڭداعاندا اكەم مەنى جولعا سالىپ, باس كوز بولىپ تىلەۋشىم بولدى. وتە بالاجان ەدى. اكەمدى وسى ۋاقىتقا دەيىن ساعىنامىن» دەيدى م. اۋەزوۆ.
قازاق ءتىلىن جەتىك بىلمەيتىنى تۋرالى ءسوز ەتكەن مۇرات ءوزىن «قازاق تىلىنە ورالعان اداممىن» دەپ سانايتىنىن ايتتى. ء«ورىستىلدى بولعان كەزىمدە دە مەنىڭ جۇرەگىم قازاق دەپ سوققان. بىراق ۋاقىت وتە انا ءتىلىمدى مەڭگەرۋدى ءجون سانادىم. قاسىمداعى دوستارىمىز ءبارىمىز بىرىگىپ ءتىلىمىزدى ۇيرەنۋگە بەل بۋىپ, قايسىمىز ورىس تىلىندە سويلەپ قويساق, بەس تيىننان وتەماقى تولەيمىز دەپ كەلىستىك. سولاي قازاق تىلىنە ورالا باستادىق», دەيدى قازاقتىڭ ۇلى تۇلعاسىنىڭ ۇرپاعى.
