توپتىڭ باسىن تورتتىك ءتۇزدى

الەم چەمپيوناتىنداعى وتكەن اپتا سوڭعى كۇندەرىنىڭ باستى جاڭالىعى – جارتىلاي فينالعا شىققان ءتورت كوماندانىڭ اتتارى تۇگەل بەلگىلى بولدى. ونى جانە نەگىزىنەن جۇرتشىلىق بولجام جاساپ وتىرعان قۇرامالار قۇرادى. سونىڭ ناتيجەسىندە برازيليا – گەرمانيا, گوللانديا – ارگەنتينا جۇپتارى ءتۇزىلدى. بۇلاردىڭ الدىڭعىلارى بۇگىنگە قاراعان ءتۇنى ساعات 2.00-دە الاڭعا شىقتى. شيرەك فينال شەرۋىن 4 شىلدە كۇنى كەشكە فرانتسيا جانە گەرمانيا باس جاساقتارى اشىپ بەردى. بۇعان دەيىنگى ماتچتاردا ەكى كوماندا دا قورعانىس شەبىنىڭ مىقتىلىعىمەن بىرگە, پوزيتسيالىق شابۋىلداردى جۇرگىزۋگە بەيىم ەكەندىكتەرىمەن كوزگە تۇسكەن بولاتىن. كۇشتەرى شامالاس سانالعان ولاردىڭ بۇل جولى ءتىپتى, ساق قيمىلداپ, ءبىر-بىرلەرىنىڭ ءمۇلت كەتەتىن تۇستارىن بارىنشا اڭدىپ باعۋلارى ۇزاققا سوزىلۋى دا مۇمكىن ەدى. بىراق ءبىر ستاندارتتى جاعدايدان سوعىلعان گول بۇل تىم-تىرىس تەكەتىرەستىڭ جولىن بىردەن كەسىپ كەتتى. وسىلايشا توني كرووستىڭ تاستاعان دوبىن ماتس حۋممەلس باسپەن ۇرىپ ءتۇسىردى. نەمىستەر وزدەرىنىڭ بۇدان ارعى باسىمدىلىعىن قورعانىسقا جۇمساي وتىرىپ, ويىندى وزدەرى ءۇشىن جەڭىستى نوتامەن اياقتاي ءبىلدى. جانكۇيەرلەر 5 شىلدە كۇنى برازيليا – كولۋمبيا اراسىنداعى تارتىستى كەزدەسۋدى تاماشالادى. الاڭ يەلەرى ويىن باسىنان العا ۇمتىلىپ, 7-مينۋتتا ەسەپ اشىپ ۇلگەردى. بۇرىشتامادان بەرىلگەن دوپتى تياگو سيلۆا قاقپانىڭ الىس بۇرىشىنا توپ ەتكىزدى. پەنتاكامپەوندار بۇدان كەيىن دە تىنىم تاپقان جوق. ولار دوپقا دا كوبىرەك يەلىك ەتتى, قاقپاعا دا ارتىعىراق ۇردى. ەكىنشى تايمدا عانا ويىن ەپتەپ تەڭەسە باستادى. ال قارسى قاقپا ماڭىنان كۇدىكتىلەۋ ايىپ دوبى بەلگىلەنگەندە, برازيليالىقتار ەسەپتى ۇلعايتا تۇسەدى, دەگەن وي ەشكىمنىڭ قاپەرىنە كىرمەسە كەرەك. ناتيجەسىندە سولاي بولىپ شىقتى. وسى جەردەن داۆيد لۋيس ۇرعان دوپ تۋرنيردەگى ەڭ ادەمى گولداردىڭ بىرىنە اينالدى. كولۋمبيا قۇراماسى جالعىز قارىمتا دوپتى پەنالتيدەن ءتۇسىردى. ول ءوز ايىپ الاڭىندا كارلوس باككانى شالىپ قۇلاتقان جۋليو سەزاردىڭ قيمىلى ءۇشىن بەرىلدى. بۇل مۇمكىندىكتى حامەس رودريگەس قۇر جىبەرمەدى. ءسويتىپ, برازيليا 2:1 ەسەبىمەن جەڭىسكە جەتتى. كەزدەسۋدىڭ تاعى اتاپ وتەرلىك جاعى, كولۋمبيا فۋتبولشىلارى وتە دورەكى وينادى. سونىڭ سالدارىنان برازيليالىق نەيمار اۋىر جاراقات الىپ, قاتاردان شىعىپ قالدى. وسى كۇننىڭ تۇنىندە ارگەنتينا مەن بەلگيا كۇش سىناستى. مۇندا دا كەزدەسۋ تاعدىرىن جالعىز دوپ شەشتى. مۇندا دا ول تەز سوعىلدى. شابۋىلشى ليونەل مەسسي الاڭنىڭ قاق ورتاسىندا تۇرىپ, سول قاپتالدا اشىق تۇرعان ەسەكەل لاۆەسسيدى تاۋ­ىپ الدى. وسىدان كەيىن ەسەكەل دوپتى قاقپاعا قاراي كولبەي جونەلتتى. بىراق جولاي قورعاۋشىلار قاعىپ قايتاردى. سودان كەيىن انحەل دي ماريا ويىن تىزگىنىن ءوز قولىنا الىپ, ايىپ الاڭىنا جارىپ كىردى. ونىڭ ۇرعان دوبىن تاعى قورعاۋشىلار قايتاردى. وسىدان كەيىن دوپقا يەلىك ەتكەن مەسسي ءوزىن اڭدىعان ەكى ويىنشىدان سىتىلىپ شىعىپ, دي مارياعا قايتا دوپ بەردى. ونىڭ پابلو سابالەتاعا پاسىن قورعاۋشى قيىپ جىبەردى. ايتكەنمەن, دوپ سول بويى يگۋايننىڭ اياعىنا بارىپ سارت ەتتى. گول! شىلدەنىڭ 6-سىنا قاراعان ءتۇنى گوللانديا جانە كوستا-ريكا قۇرامالارى كەزدەستى. بۇل نەگىزگى ۋاقىتتا دا, وۆەرتايمدا دا ەسەپ اشىلماي, كەزدەسۋ تاعدىرى پەنالتيدەن شەشىلگەن جالعىز ماتچ بولدى. ايتارى جوق, بۇل ماتچتىڭ قورىتىندىسىندا جولدان شىعىپ قالعاندارىمەن, كوستا-ريكا فۋتبولشىلارى ەرلەدى. ولار تۋرنيردەگى ويىنداردىڭ نەگىزگى جانە قوسىمشا ۋاقىتتارىندا ءبىر رەت تە جەڭىلمەستەن چەمپيوناتتى ءبىتىردى. كەزدەسۋ ءوزىنىڭ سوڭىنا دەيىن جۇرتتى ۋىسىندا ۇستادى. بۇعان ويىننىڭ بىتكەنىن بىلدىرەتىن ىسقىرىق ەستىلگەنشە, قارسىلاستاردىڭ قايتپاي شايقاسقاندارى سەبەپ بولدى. ماتچتىڭ پەنالتيگە ۇلاسقالى تۇرعانىن سەزگەن لۋي ۆان گال دەرەۋ قاقپاشىلاردى الماس­تىردى. ناتيجەسىندە تاپ وسى كرۋل كوستاريكالىق ەكى ويىنشىنىڭ سوققىلارىن قايتارىپ, ءوز كومانداسىنا جەڭىس اپەردى. رۋسلان يگىلىك.