ءار قۇراما ەكى كوماندادان تۇرادى. «ا» كوماندالارىنىڭ قۇرامىندا ءتورت ەرەسەك سپورتشى بار. ال «ۆ» كوماندالارى – 14, 16, 18 جانە 20 جاسقا دەيىنگى سپورتشىلار.
ماتچتىڭ اشىلۋ سالتاناتىنا قازاقستان رەسپۋبليكاسىنىڭ سپورت جانە مادەنيەت ءمينيسترى اسحات ورالوۆ قاتىستى. ول بۇل ماتچتى ناتيجەگە قاراماستان, تاريحي دەپ اتاۋعا بولاتىنىن جانە ەلىمىزدىڭ عانا ەمەس, شەتەلدىڭ دە سپورت شەجىرەسىنە ەنەتىنىن اتاپ ءوتتى. مينيستر قازاقستاندىق شاحماتشىلارعا وتاندىق شاحماتتىڭ دامۋ تاريحىن جازعانى ءۇشىن العىس ايتىپ, كەزدەسۋدى رەسمي تۇردە اشىق دەپ جاريالادى.
ءبىرىنشى ءجۇرىس قۇقىعى قازاقستان شاحمات فەدەراتسياسىنىڭ پرەزيدەنتى تيمۋر تۋرلوۆقا بەرىلدى.
ماتچتىڭ جەرەبە تارتۋ ناتيجەسى بويىنشا, حوۋ يفان قازاقستاندىق گروسسمەيستەر دينارا سادۋاقاسوۆاعا قارسى قارا فيگۋرالارمەن وينادى. ۇندىستاندىق شاحماتشى حاريكا دريۋناۆاللي مەرۋەرت كاماليدەنوۆاعا قارسى شىقتى. قازاقستاندىق گروسسمەيستەر ءبيبىسارا اساۋباەۆا ويىندى ازەربايجان وكىلى گۇناي مامەدزادەگە قارسى باستادى. گروسسمەيستەر جانسايا ابدىمالىك تە گرۋزين شاحماتشىسى نانا دزاگنيدزەگە قارسى قارا فيگۋرامەن وينادى.
جاسوسپىرىمدەر اراسىندا جەرەبە بىلاي شىقتى: قازاقستاندىق زارينا نۇرعاليەۆا وزبەكستاندىق افرۋزا حامداموۆاعا قارسى اق ءتۇستى, ال كسەنيا بالاباەۆا بولگاريالىق نۇرگۇل ساليموۆاعا قارسى قارا ءتۇستى فيگۋرالارمەن وينادى. ۆەنگريالىق جوكا گاال قازاقستاندىق الۋا نۇرمانوۆاعا قارسى قارا ءتۇستى, ۇندىستاندىق شاحماتشى شري ب.ساۆيتا جەرلەسىمىز ليا قۇرمانعاليەۆاعا قارسى قارا ءتۇستى فيگۋرالارمەن باستادى.
بۇگىن قىزدار راپيد بويىنشا 4 راۋند وينادى. كەزدەسۋدىڭ ءبىرىنشى كۇنى شەتەلدىك سپورتشىلاردىڭ باسىمدىعىمەن اياقتالدى.
قازاقستان كومانداسى 13,5 ۇپاي, ال الەم قۇراماسى 18,5 ۇپاي جينادى. حوۋ يفان دينارا سادۋاقاسوۆا مەن جانسايا ابدىمالىكپەن تەڭ ءتۇسىپ, مەرۋەرت كاماليدەنوۆانى ۇتىپ, ءبيبىسارا اساۋباەۆادان ۇتىلدى.
ماتچتىڭ تولىق ستاتيستيكاسىن مىنا سايتتان كورۋگە بولادى.
بۇگىن ولار ءراپيدتىڭ تاعى 4 راۋندىن, ال 19 ساۋىردە سەگىز راۋندتىق بليتس ويناۋى كەرەك. وسىمەن جەڭىمپاز قۇراما بەلگىلى بولادى.
ايتا كەتەيىك, ايەلدەر اراسىنداعى كوماندالىق ماتچتىڭ جالپى جۇلدە قورى 50 000 دوللاردى قۇرايدى.
