...نۇرلان ساناتاەۆتى كەمەدەگى جۇمىسىنا ءومىر تولقىندارىنىڭ ءوزى قاقپاقىلداپ اكەلگەندەي. 1993 جىلى 10 قىركۇيەكتە ماڭعىستاۋ وبلىسىنىڭ بەينەۋ اۋىلىندا ومىرگە كەلگەن ول ى.التىنسارين اتىنداعى ورتا مەكتەپتىڭ 9 سىنىبىن بىتىرگەن سوڭ كاسىپتىك ليتسەيدە وقىپ, وپەراتور ماماندىعىن الادى. 2011-2012 جىلدارى لۋگوۆوي ستانساسىنداعى №42062 قۇرلىق اسكەري بولىمىندە وتان الدىنداعى ازاماتتىق بورىشىن وتەپ, تۋعان اۋىلىنا ورالعان سوڭ تۇراقتى جۇمىس تابىلا قويمايدى. جۇك تاسىمالداۋشى, كۇزەتشى, جۇرگىزۋشى سىندى جۇمىستاردى تاپقانىمەن, تابىسى از ءارى كەيبىرى مەرزىمدىك, ماۋسىمدىق جۇمىستار بولىپ شىعادى. نۇرلان كوپ ويلانا كەلە 2015 جىلى تۋعان كۇنىندە اقتاۋداعى №21814 اسكەري بولىمىمەن كەلىسىمشارتقا قول قويىپ, ارتەكتى كەمەلەر ديۆيزيونى «سارىارقا» زىمىران ارتيللەريالىق ءبولىمىنىڭ تەحنيگى بولىپ ورنالاسادى. ەكى جىل تەحنيك بولىپ تەڭىزدەگى اسكەري ءومىر, كەمەدەگى جاۋاپكەرشىلىك تۋرالى ءبىراز ءتارتىپ-تالاپقا ۇيرەنىپ قالعان ن.ساناتاەۆ 2017 جىلى اتالعان ءبولىمنىڭ توپ باسشىسى بولىپ تاعايىندالادى. اراعا 4 جىل سالىپ قىزمەتىنە تياناقتى جاس جىگىتتى باسشىلىق كەمە بوتسمانى – باس ستارشينا ەتىپ تاعايىندايدى. قازىر ن.ساناتاەۆ كەمەنىڭ ىشكى تازالىعى, تاماق, كورپە-توسەك, كيىم-كەشەك, ارقان, كاتەر, زاكىر, تاماقتىڭ ساقتالۋى سىندى جاۋاپتى مىندەتتەر جۇكتەلگەن قىزمەتتى شىرق ءۇيىرىپ ءجۇر.
ء«وزىم قۇرلىق اسكەرىندە بولدىم, قىزمەتكە ورنالاسقان سوڭ كەمەمەن تەڭىزگە العاش شىعۋ وڭاي بولعان جوق, تەڭىز اۋرۋىمەن اۋىرىپ تۇردىق. قازىر جۇمىسىما ابدەن ۇيرەندىم, وزىمە ۇنايدى, 8 جىل بويى تۇراقتى وسى «سارىارقا» كەمەسىندەمىن. كەلەشەكتە ءبىلىمىمدى جەتىلدىرىپ, كەلىسىمشارت مەرزىمىن ۇزارتقىم كەلەدى», دەيدى نۇرلان قارجاۋ ۇلى.
قىس مەزگىلىندە تەڭىزگە سيرەكتەۋ شىققانىمەن كۇن جىلىنىسىمەن اپتاسىنا 2-3 رەت, كەيدە اپتالاپ تەڭىزدە بولادى. اسا جاۋاپتى قىزمەتكە ورنالاسقان سوڭ وبلىستىڭ ەڭ شالعاي اۋدانىنداعى اتا-اناسىن اقتاۋعا كوشىرىپ اكەلگەن بولاتىن, بۇگىندە قارا شاڭىراقتاعى «اتا-انا قولىنداعى بالا» اتانعان نۇرلاننىڭ وتباسىندا كىشكەنتاي ۇلى مەن قىزى ءوسىپ كەلەدى.
«سارىارقا» كەمەسىمەن ءتۇرلى اسكەري حالىقارالىق سايىستارعا قاتىسىپ جۇرگەن نۇرلان: ء«الى ءبىرىنشى ورىن بۇيىرماي تۇر», دەپ كۇلەدى اۋىل بالاسىنا ءتان اڭقىلداعان ادالدىقپەن. 2016 جىلى تاجىكستاندا وتكەن حالىقارالىق «تەڭىز كۋبوگى» سايىسىندا دوداعا قاتىسۋشى «ورال» كەمەسىنە قوسىمشا بوتسمان رەتىندە بارىپ, ەكەۋى 2-ورىندى مىسە تۇتسا, 2017 جىلى وسى سايىس باكۋدە ءوتىپ, «سارىارقا» ەكيپاجى 2-ورىنمەن ورالدى. اراعا ەكى جىل سالىپ ازەربايجان استاناسىنان تاعى دا 2-ورىندى ەنشىلەسە, 2021 جىلى يراندا وتكەن سايىستا سۋدان قۇتقارۋ كەزەڭى بويىنشا «سارىارقا» كەمەسىنىڭ توبى 1-ورىندى يەلەندى, ال 2022 جىلى كەمە توبى «تەڭىز كۋبوگى» حالىقارالىق سايىسىنان 2-ورىننىڭ جالاۋىن جەلبىرەتىپ ورالدى.
ماڭعىستاۋ وبلىسى
