الدىن الا بولجام بويىنشا تۇرعىن ۇيدە گاز قوسپاسى جارىلىپ, 150 شارشى مەتر اۋماقتاعى كىرەبەرىس قۇلاعان. جارىلىس سالدارىنان 3 پاتەر قيراعان. قازىر تۇرعىن ءۇي گازدان اجىراتىلىپ, قوقىستار تازارتىلۋدا. توتەنشە جاعدايلار دەپارتامەنتى 56 جەكە قۇرامىن, ونىڭ ىشىندە 1 ءتۇسىرۋ توبى جانە 9 تەحنيكا, جەرگىلىكتى اتقارۋشى ورگاندار 13 ادام جانە 6 تەحنيكا, جەدەل مەديتسينالىق كومەك 12 ادام جانە 6 تەحنيكا, پوليتسيا دەپارتامەنتى 150 جەكە قۇرام مەن 10 تەحنيكا, ۇلتتىق ۇلاننىڭ «باتىس» وڭىرلىك قولباسشىلىعىنا قاراستى 5548 اسكەري ءبولىمىنىڭ اسكەري قىزمەتشىلەرى جانە 2 بىرلىك تەحنيكاسىن جۇمىلدىردى. اۋرۋحاناعا جاتقىزىلعانداردىڭ بارلىعى تراۆماتولوگيا بولىمشەسىندە ەم السا, جاعدايى اۋىر تۇرعىندار جانساقتاۋ جانە قارقىندى تەراپيا انەستەزيولوگيا بولىمشەسىنە جاتقىزىلىپ, ءبىر پاتسيەنت وبلىستىق اۋرۋحاناعا جەدەل اۆياتسيالىق تىكۇشاقپەن جەتكىزىلدى.
جاڭاوزەن قالالىق تۇرعىن ءۇي-كوممۋنالدىق شارۋاشىلىق ءبولىمىنىڭ حابارلاۋىنشا, قازىر ۇيىندىلەردى شىعارۋ جۇمىستارى ءجۇرىپ جاتىر. سودان كەيىن عانا اپات ورىن العان ءۇيدىڭ جاعدايىنا باعالاۋ جۇرگىزىلمەك. بولىمدەگىلەردىڭ ايتۋىنشا, اپات ورىن العان 12 پاتەرلىك ءۇي 1977 جىلى سالىنعان. ءبىر كىرەبەرىس ورتالىقتاندىرىلعان گازبەن قامتىلعان. جالپى اۋدانى 621 شارشى مەتردى قۇرايتىن ءۇي اپاتتىق جاعدايداعى تۇرعىن ءۇي تىزىمىندە ەمەس. ۇيىندىلەردى سۇرىپتاپ, تەكسەرىپ بولعان سوڭ ساراپتاما جۇرگىزىلمەك. سونداي-اق جارىلىستان زارداپ شەككەن جاقىن ماڭداعى ۇيلەرگە جاڭاوزەندىك كاسىپورىندار كومەكتەسپەك.
وكىنىشكە قاراي, اپاتتان قايتىس بولعاندار سانى 4 ادامعا جەتتى. وقيعا ورنىندا ءۇيىندى استىندا قالعان بارلىق زارداپ شەككەندەر سىرتقا شىعارىلىپ, ۇيىندىدەن تازالاۋ جۇمىستارى جالعاسۋدا. «قازمۇنايگاز» ۇك» اق جاڭاوزەن قالاسىنداعى توتەنشە جاعداي سالدارىنان تۇرعىن ءۇيسىز قالعان وتباسىلارعا جاڭا پاتەر بەرمەك, سونداي-اق زارداپ شەككەندەرگە ورتالىق جانە جەرگىلىكتى اتقارۋشى ورگاندار بىرلەسە وتىرىپ, بارلىق قاجەتتى كومەك كورسەتىلەتىنىن جەتكىزدى.
– قايتىس بولعان ازاماتتاردىڭ وتباسىنا قايعىرا كوڭىل ايتامىن. زارداپ شەككەندەرگە جانە ولاردىڭ وتباسىلارىنا ماتەريالدىق كومەك كورسەتىلەدى, جاڭا تۇرعىن ءۇي بەرىلەدى. اپاتتىق جۇمىستارعا كومەك كورسەتكەن ەرىكتىلەر مەن قالا تۇرعىندارىنا العىس ايتامىن. قازىرگى ۋاقىتتا بارلىق ادام ۇيىندىلەردەن شىعارىلدى, دەدى وقيعا ورنىنا كەلگەن وبلىس اكىمى ن.نوعاەۆ.
ماڭعىستاۋ وبلىسى
