ا. مۇحامەدي ۇلى سوت وتىرىسىنا ونلاين رەجيمدە قاتىسىپ وتىر. سەبەبى ەلوردادا قاردىڭ قالىڭ تۇسۋىنە بايلانىستى كۇدىكتى سوت ءوتىپ جاتقان عيماراتقا جەتكىزىلمەدى. سوندىقتان ول سوت وتىرىسىنان كەيىن جەتكىزىلۋى مۇمكىن. اتالعان ءىس سۋديا باعلان ىدىرىسوۆتىڭ قاراۋىمەن ءوتىپ جاتىر. بۇدان بۇرىن ءىستىڭ سوتقا كەلىپ تۇسكەنىن حابارلاعان بولاتىنبىز.
ەستەرىڭىزگە سالا كەتەيىك, 24 قاڭتاردا ارىستانبەك مۇحامەدي ۇلىنىڭ ءىسى بويىنشا قازاقستان ۇلتتىق مۋزەيى ديرەكتورىنىڭ بۇرىنعى ورىنباسارى ۇستالعانى بەلگىلى بولدى. انتيكوردىڭ مالىمەتىنشە, الماز نۇرازحان مۇحامەدي ۇلىمەن جانە باسقالارمەن ءسوز بايلاسىپ, «الەم مۇراجايلارى بويىنشا التىن ادامنىڭ شەرۋى» حالىقارالىق كورمەسىنىڭ جوباسىن ىسكە اسىرۋ كەزىندە 221 ملن تەڭگە سوماسىندا سەنىپ تاپسىرىلعان بيۋدجەت قاراجاتىن ۇرلاعان.
تەرگەلگەن قىلمىستىق ىستەر بويىنشا مەملەكەتكە كەلتىرىلگەن زالالدىڭ الدىن الا سوماسى شامامەن 7 ملرد تەڭگە دەپ باعالاندى.
