قۇرىلىسى قارقىندى ءجۇرىپ جاتقان توبىل وڭىرىنە قابىرعاتاستار نەگىزىنەن رەسەيدەن اكەلىنەدى. وعان باسەكە بولا الاتىنداي جەرگىلىكتى ءونىم از. ويتكەنى شاعىن تسەحتاردان شىعاتىن جەرگىلىكتى گازبلوكتىڭ ارزانىراق بولعانىنا قاراماستان, جۇرتتىڭ كوبى ساپاسىنا قىزىعىپ, رەسەيدىڭ قىمبات گازبلوگىن اتتاي قالاپ الىپ جاتادى. ەڭ ءوتىمدى تاۋار. ءتىپتى جاز ورتاسى – قۇرىلىس ماۋسىمىنىڭ ناعىز قىزعان شاعىندا قات بولىپ كەتەتىنى دە بار.
«RealtyKST» جشس ەندى شەتەلدىك گازبلوكتان ارزان ءارى ساپالى ءونىم شىعارۋعا بەل بۋىپ وتىر. كاسىپورىن باسشىسى ۆيكتور شاستليۆىيدىڭ ايتۋىنشا, جەرگىلىكتى اۆتوكلاۆتى گازبلوك قۇم, تسەمەنت جانە اكتىڭ قوسپاسىنان جاسالادى.
– ءبىز شىعاراتىن بلوكتار ەكولوگيالىق جاعىنان تازا قۇرىلىس ماتەريالدارىنا جاتادى. ەگەر ءوندىرىس ۇدەرىسى تۋرالى ايتاتىن بولساق, قوسپا ءۇش ساعاتتىڭ ىشىندە قاتادى. سودان كەيىن ونى شيكى كۇيىندە كەسۋگە اپارادى. ءارى قاراي 12 ساعاتقا اۆتوكلاۆقا جىبەرىلەدى. باعاسى باسقا گازبلوكتاردان تومەن, سەبەبى ءبىز شيكىزاتتى وزىمىزدەن الامىز. مىسالى, گيپس پەن اك پاۆلوداردان كەلەدى, – دەيدى زاۋىت باسشىسى.
جاڭا زاۋىت ورنالاسقان ۇلكەن عيمارات بۇرىن بازالتتان مينەرالدى جىلىتقىش ماتەريالدار جاساپ شىعاراتىن «تەرموماستەر» دەپ اتالاتىن ءوندىرىس ورنىنا تيەسىلى بولعان. يندۋستريالىق-يننوۆاتسيالىق دامۋ باعدارلاماسى اياسىندا ىسكە قوسىلعان بۇل جوبا قۇتتى بولمادى. جۇمىسىن باستاماستان, ساتسىزدىككە ۇشىراپ توقىراپ قالدى. ويتكەنى زاۋىتقا دەپ ارنايى ساتىپ الىنعان وندىرىستىك قۇرىلعىلار ساپاسىز بولىپ شىققان. وسىلايشا, ەڭسەلى عيمارات ون شاقتى جىل بويى قاڭىراپ بوس تۇردى.
جاڭا كاسىپورىننىڭ باسشىلارى اۋدانى 15 مىڭ شارشى مەتر بولاتىن الىپ عيماراتتى جاڭارتىپ, قايتا بەيىمدەپ, ءوندىرىستى ىسكە قوسۋعا شامامەن 2 ملرد تەڭگە قارجى جۇمساعان.
«2021 جىلى قۇرىلىس-مونتاجداۋ جۇمىستارى باستالدى. عيماراتتى قالپىنا كەلتىرىپ, قۇرال-جابدىقتاردى ورناتىپ شىقتىق. بيىل قاڭتار ايىندا گاز بلوكتارىنىڭ العاشقى لەگىن قۇيىپ كوردىك. وسىلايشا, ءونىم كولەمىن ارتتىرىپ كەلە جاتىرمىز. ەندى, مىنە, ءوندىرىس تولىققاندى جۇمىس ىستەپ تۇر. قاجەت بولسا, از عانا شىعىنمەن ءوندىرىس كولەمىن جىلىنا 120 مىڭ گازبلوكقا دەيىن ارتتىرۋعا مۇمكىندىك بار», دەيدى ۆيكتور شاستليۆىي.
بيىل وڭىردە 2,5 ملن شارشى مەتر تۇرعىن ءۇي سالىپ, 150 مىڭ ادامدى باسپانامەن قامتاماسىز ەتۋ جوسپارلانعان. وعان قاجەت قابىرعاتاستىڭ 70 پايىزىن «RealtyKST» سەرىكتەستىگى شىعاراتىن بولادى.
قوستاناي وبلىسى
