تۇركىستان وبلىسى پوليتسيا دەپارتامەنتىنىڭ باستىعى مۇرات قابدەنوۆ وڭىردە زاڭسىز كوشى-قون ارناسىن انىقتاپ, الدىن الۋ جانە ولاردى ۇيىمداستىرۋشىلاردى تابۋ, سونداي-اق وبلىس اۋماعىندا جۇرگەن شەتەلدىكتەر مەن ازاماتتىعى جوق ادامداردى انىقتاۋ ماقساتىندا تىكەلەي تاپسىرما بەرىپ, ارنايى توپ قۇردى. اتالمىش توپ 10 تاۋلىك ىشىندە ەل اۋماعىندا زاڭسىز جۇرگەن وزبەكستان رەسپۋبليكاسىنىڭ 114 ازاماتىن انىقتاعان. ولارعا قاتىستى قر اقبتك-ءنىڭ 517-بابى بويىنشا ءتيىستى حاتتامالار تولتىرىلىپ, جيناقتالعان ءىس قۇجاتتار جەرگىلىكتى سوتقا جولداندى.
ال قازاقستان رەسپۋبليكاسىندا بولۋ ەرەجەلەرىن بۇزعان 50 شەتەل ازاماتى سوت شەشىمىمەن ەل اۋماعىنان الاستاتىلسا, ءتورت شەتەلدىك اكىمشىلىك قاماۋعا الىندى. بۇدان بولەك, شەتەلدىك جۇمىس كۇشىن زاڭسىز پايدالانعان قازاقستان رەسپۋبليكاسىنىڭ ەكى ازاماتىنىڭ ارقايسىسىنا قر اقبتك-ءنىڭ 519-بابى بويىنشا اكىمشىلىك ايىپپۇل سالىندى.
شەتەل ازاماتتارىن زاڭدا بەلگىلەنگەن ءتارتىپ بويىنشا قابىلداماعان ءۇش قازاقستان ازاماتىنا قاتىستى قر اقبتك-ءنىڭ 518-بابى بويىنشا شارا قولدانىلدى. وسى رەتتە وبلىستىڭ باس پوليتسەيى م.قابدەنوۆتىڭ ءجىتى باقىلاۋىمەن زاڭسىز جۇرگەن شەتەل ازاماتتارى مەن ازاماتتىعى جوق ادامداردى انىقتاۋ جۇمىستارى ۇزدىكسىز جالعاسۋدا.
