الدىمەن ول 260 ستاتسيونارلىق توسەكتىك ورنى بار قالالىق ونكولوگيا ورتالىعى مەن سونىڭ ءبىر اۋىسىمدا 150 ادام قابىلداۋعا ارنالعان ەمحاناسىنا ات باسىن بۇردى. ونكولوگيا ورتالىعى حيميوتەراپيالىق, راديولوگيالىق, پاللياتيۆتىك, راديوگينەكولوگيالىق, حيرۋرگيالىق, ماممولوگيالىق جانە ونكوگەماتولوگيالىق بولىمشەلەردەن قۇرالعان. مۇندا تاعى 30 توسەكتىك ورىن كۇندىزگى ستاتسيونار, كلينيكالىق-دياگنوستيكالىق ەمحانا, ونىڭ ىشىندە ساۋلەلىك دياگنوستيكا بولىمشەسى, تسيتو-گيستولوگيالىق زەرتحانا جانە كلينيكالىق-دياگنوستيكالىق زەرتحانا بار. اتالعان مەديتسينالىق ۇيىمدا 85 دارىگەر جانە 200-دەن اسا ورتا مەديتسينا قىزمەتكەرى جۇمىس ىستەيدى.
ءبىرىنشى ۆيتسە-مينيستر قالالىق ونكولوگيا ورتالىعىنىڭ جۇمىسىمەن ەگجەي-تەگجەيلى تانىسىپ, شەشىمىن كۇتكەن سالالىق پروبلەمالاردى تالقىلادى. اڭگىمە بارىسىندا پاتسيەنتتەردى ەمدەۋدە قولداناتىن يننوۆاتسيالىق تەحنولوگيالار ءسوز بولدى. ماسەلەن, قازىرگى زامانعى ەندوبەينەحيرۋرگيالىق كەشەننىڭ كومەگىمەن كىشى جامباس جانە كەۋدە مەن ىشكى اعزا اۋرۋلارىنا از ءينۆازيۆتى وپەراتسيالار جۇرگىزىلە باستادى. 2019 جىلدان باستاپ مۇندا اياق-قول ساركومالارى كەزىندە ءىرى بۋىنداردى پروتەزدەۋ ءىسى قولعا الىندى.
سونداي-اق ورتالىقتا ءسۇت بەزى وبىرىنا شالدىققان ناۋقاستارعا پسيحولوگيالىق جانە الەۋمەتتىك وڭالتۋ شارالارى قاراستىرىلعان. بۇل قاتاردا تەرى-بۇلشىقەت قيىندىلارىن قولدانا وتىرىپ جاسايتىن ءارتۇرلى رەكونسترۋكتيۆتىك-پلاستيكالىق وپەراتسيالار بار. كەيىنگى 4 جىلدا كلينيكادا 80-نەن اسا وسىنداي رەكونسترۋكتيۆتىك وپەراتسيا جاسالىپتى. قازىرگى زامانعى Phillips AZURION بيپلان انگيوگرافىن ونكولوگ ماماندار 1,854 رەنتگەنحيرۋرگيالىق وپەراتسيا جاساۋدا قولدانعان.
بۇدان سوڭ ت.سۇلتانعازيەۆ 400 توسەكتىك ورىنعا ەسەپتەلگەن №2 قالالىق اۋرۋحانانى ارالادى. وتكەن جىلى مۇندا 21 مىڭنان اسا پاتسيەنت ەمدەلىپتى. ءبىرىنشى ۆيتسە-مينيستر مەديتسينالىق كومەك كورسەتۋ ساپاسىنا, اسىرەسە ەمحانا جانە اۋىلدىق مساك وبەكتىلەرىمەن ديسپانسەرلىك پاتسيەنتتەردى ەسەپكە الۋ جانە ەمدەۋ, سونداي-اق قجا اۋرۋلارى كەزىندە ينسۋلتتىك ناۋقاستارعا مەديتسينالىق كومەك كورسەتۋ دەڭگەيىن ارتتىرۋ ماسەلەسىنە نازار اۋداردى.
ۆەدومستۆو وكىلىنىڭ جۇمىس ساپارى بۇدان ءارى №1قالالىق ەمحانادا جالعاستى. اتالعان ەمدەۋ مەكەمەسى بۇگىنگى تاڭدا 45 مىڭعا جۋىق تۇرعىنعا قىزمەت كورسەتەدى. ءوز كەزەگىندە ت.سۇلتانعازيەۆ اۋرۋلاردىڭ پروفيلاكتيكاسىن, سكرينينگتىك زەرتتەۋلەردىڭ تيىمدىلىگىن ارتتىرۋدى, پاتسيەنتتەردى ۋاقتىلى ديسپانسەرلەۋدى جانە اۋرۋلاردى باسقارۋ باعدارلاماسىن جۇزەگە اسىرۋدى كۇشەيتۋ قاجەتتىگىن اتاپ ءوتتى جانە پاتسيەنتتەردى قولداۋ قىزمەتىن جانداندىرۋدى ۇسىندى.
مەگاپوليستەگى مەديتسينالىق ۇيىمداردى ارالاپ بولعان ت.سۇلتانعازيەۆ قورىتىندى ءسوز سويلەدى. وندا ونكولوگيالىق اۋرۋلاردى ەرتە ساتىسىندا انىقتاۋ كەرەك ەكەنىن, مساك-تىڭ وزىق تاجىريبەلەرىن كەڭىنەن ەنگىزۋدى, اكىمدىكپەن بىرلەسىپ مەديتسينالىق مەكەمەلەردى ءتيىستى كادرلارمەن قامتاماسىز ەتۋدى تاپسىردى. سونداي-اق ۇيىمداردىڭ مەنەدجمەنتىن دامىتۋدى, جاڭا تەحنولوگيالار مەن جۇمىس ادىستەرىن ەنگىزۋدى ءسوز ەتتى.
«بۇگىنگى تاڭدا دەنساۋلىق ساقتاۋ جۇيەسىنىڭ باسىم باعىتتارىنىڭ ءبىرى حالىققا ساپالى جانە قولجەتىمدى مەديتسينالىق كومەك كورسەتۋ ەكەنىن اتاپ وتكىم كەلەدى. 2022 جىلى شىمكەنت قالاسىندا جالپى ءولىم-ءجىتىم 35%-عا تومەندەگەنىن, سونداي-اق قاناينالىم جۇيەسى اۋرۋلارىنان ءولىم-ءجىتىم 21%-عا, وبىردان-10%-عا, تىنىس الۋ اعزالارىنىڭ اۋرۋلارىنان جانە تۋبەركۋلەزدەن ءولىم-ءجىتىم 47%-عا ازايدى. حالىقتىڭ سۇراۋى بويىنشا جالپى پراكتيكا دارىگەرىنىڭ جولداماسىنسىز كونسۋلتاتسيالىق-دياگنوستيكالىق قىزمەتتەر كورسەتۋ قاعيدالارى بەكىتىلدى. سونداي-اق ونكولوگيالىق جانە گەماتولوگيالىق اۋرۋلارعا كۇدىك بولعان كەزدە تەكسەرۋ مەن ەمدەۋدى جەدەلدەتۋ ءۇشىن «جاسىل جول» ەنگىزىلدى. ونىڭ اياسىندا ونكولوگيالىق اۋرۋعا كۇدىگى بار پاتسيەنتتەر 18 جۇمىس كۇنى ىشىندە كونسۋلتاتسيا الادى جانە تەكسەرىلەدى», دەدى ت.سۇلتانعازيەۆ.
ونىڭ ايتۋىنشا, بۇگىنگى تاڭدا دەنساۋلىق ساقتاۋ جۇيەسىندە 78 مىڭ دارىگەر, ونىڭ ىشىندە شىمكەنت قالاسىندا 2 مىڭ دارىگەر جۇمىس ىستەيدى. وڭىردە دارىگەرلەردىڭ تاپشىلىعى 98 ماماندى قۇرايدى. وتكەن جىلى ەل وڭىرلەرىنە مەديتسينالىق جوعارى وقۋ ورىندارىنىڭ 1 809 تۇلەگى, ونىڭ ىشىندە شىمكەنت قالاسىنا 74 تۇلەك ءبولىندى. دارىگەرلەردىڭ قاجەتتىلىگىن قامتاماسىز ەتۋ ءۇشىن اسا تاپشى ماماندىقتار بويىنشا بىلتىر رەسپۋبليكالىق بيۋدجەت ەسەبىنەن 4 700 ءبىلىم گرانتى, ونىڭ ىشىندە 1 500 رەزيدەنتۋرا گرانتى ءبولىندى. شىمكەنت قالاسىنىڭ ۇلەسى 74 گرانتتى قۇرايدى. مەملەكەت باسشىسى ءۇش جىلدىڭ ىشىندە رەزيدەنتۋراعا بەرىلەتىن گرانتتار سانىنىڭ جىل سايىن 70%-عا ۇلعايۋىن قامتاماسىز ەتۋدى تاپسىرعان ەدى. وسىعان بايلانىستى بيىل رەزيدەنتۋراعا 2 500 گرانت ءبولۋ جوسپارلانىپ وتىر. بۇعان قوسىمشا وسى جىلى سەرتيفيكاتتاۋ كۋرستارى ارقىلى ارنايى مامانداردى دايارلاۋ ءۇشىن جاڭا ءبىلىم بەرۋ باعدارلامالارى ەنگىزىلەدى. مەملەكەت باسشىسىنىڭ تاپسىرمالارىن ىسكە اسىرۋ اياسىندا ءماجىلىس قاراۋىنا مەديتسينا قىزمەتكەرلەرىنىڭ كاسىپتىك جاۋاپكەرشىلىگىن ساقتاندىرۋ جونىندەگى زاڭ جوباسى ازىرلەنىپ ەنگىزىلدى, بۇل ءبىرىنشى وقىلىمدا ماقۇلداندى. 2023 جىلى زاڭ قابىلدانعاننان كەيىن مەديتسينا قىزمەتكەرلەرىنىڭ كاسىپتىك جاۋاپكەرشىلىگىن ساقتاندىرۋ جۇيەسى ىسكە قوسىلادى.
سونىمەن قاتار ءبىرىنشى ۆيتسە-مينيستر وڭتۇستىك قازاقستان مەديتسينا اكادەمياسىندا وقۋ ورنىنىڭ جالپى جۇمىسىمەن تانىسىپ شىعىپ, مۇراجايىن تاماشالادى. بۇعان قوسا ول جۇمىس ساپارى اياسىندا وقما بازاسىندا حالىقپەن كەزدەستى, ازاماتتاردى جەكە ماسەلەسى بويىنشا قابىلداپ, وڭىرلىك كوممۋنيكاتسيالار الاڭىندا بريفينگ وتكىزدى.
قالا جۇرتشىلىعىمەن كەزدەسۋدە ت.سۇلتانعازيەۆ مەديتسينا قىزمەتكەرلەرىنىڭ كاسىپتىك جاۋاپكەرشىلىگىن كۇشەيتۋ, پاتسيەنتتەردىڭ قۇقىقتارىن قورعاۋ جانە قوعامداعى دارىگەرلەر مارتەبەسىن نىعايتۋ باعىتىنداعى قابىلدانار جاڭا زاڭنامالار تۋرالى حابارلادى. سونداي-اق ۆەدومستۆونىڭ امبۋلاتوريالىق دەڭگەيدە ءدارى-دارمەكپەن قامتاماسىز ەتۋدى جاقسارتىپ جاتقانىن جانە كادر ساياساتى مەن «اڭساعان ءسابي» ارنايى باعدارلاماسىن ىسكە اسىرۋ ناتيجەلەرى تۋرالى ايتىپ بەردى. ماسەلەن, سونىڭ اياسىندا 2026 جىلعا دەيىن ەكۇ-عا جىل سايىن 7 مىڭ كۆوتا ءبولۋ كوزدەلگەن. وسى باعدارلاما بويىنشا وتكەن جىلى شىمكەنتكە 413 كۆوتا ءبولىنىپ, 214 ايەل ەكۇ قىزمەتىنە جۇگىنسە, 90 وتباسى بالا ءسۇيۋ باقىتىنا يە بولعان.
بارلىق ايتىلعان ءوتىنىش پەن سۇراققا ءبىرىنشى ۆيتسە-مينيستر تولىق جاۋابىن بەردى. قاجەت جەرىندە ارنايى ءتۇسىندىردى. سوسىن بەيىندى دەپارتامەنتتەرگە جۇگىنگەن ازاماتتارعا قاجەتتى جاردەم كورسەتۋدى تاپسىردى.
