ءبىلىم باسقارماسى وكىلدەرىنىڭ ايتۋىنشا, شاحمات سپورتىن ناسيحاتتاۋ ماقساتىنداعى تۋرنيرلەر – وقۋ-اعارتۋ مينيسترلىگىنىڭ «9 اي – 9 ءىس-شارا» تۇجىرىمداماسى شەڭبەرىندە بۇكىل رەسپۋبليكا كولەمىندە قولعا الىنىپ جاتقان شارا.
70 شاحماتشى قاتىسقان تۋرنير قوستانايدىڭ ورتالىق الاڭىندا ساعات 12:00-دە باستالدى. ءدال وسى ۋاقىتتا قالانىڭ بۇكىل مەكتەپتەرى مەن كوللەدجدەرىندەگى وقۋشىلار مەن ۇستازدار دا شارشى تاقتا سايىسىنا وتىردى. ويىندار راپيد جۇيەسى بويىنشا ءوتتى. بۇل ەرەجە بويىنشا جۇرىسكە شەكتەۋلى ۋاقىت بەرىلەتىندىكتەن, كوبىنە ويى ۇشقىر ويىنشى وزىق شىعىپ, پارتيا تەز اياقتالادى. ۇتقان ادام ەكى ۇپاي ەنشىلەسە, تەڭ تۇسكەندەردىڭ ەسەبىنە ءبىر ۇپايدان جازىلادى.
– جالپى, شاحمات ادامنىڭ اقىل-ويىن شىڭدايتىن بۇقارالىق سپورت تۇرىنە جاتادى. بۇگىندە استانا تورىندە ءوتىپ جاتقان الەم چەمپيوناتى جاھان جۇرتشىلىعىنىڭ نازارىن اۋدارىپ وتىر. وسى چەمپيونات قارساڭىندا قوستانايدا ءوتىپ جاتقان رەسپۋبليكالىق چەللەندج ەلگە ەڭ اقىلدى ويىندى ناسيحاتتاۋدى كوزدەيدى, – دەيدى شاحماتتان وبلىستىڭ اعا جاتتىقتىرۋشىسى امانگەلدى ورالباەۆ.
قوستاناي وبلىسى
