«وتاندىق عىلىمدى دامىتۋ ءۇشىن ۇكىمەت جۇيەلى ءىس-شارالاردى قابىلداۋدا. عالىمدارمەن جانە ساراپشىلارمەن بىرلەسىپ, ءبىز جوعارى ءبىلىم جانە عىلىمدى دامىتۋدىڭ 2029 جىلعا دەيىنگى جاڭا تۇجىرىمداماسىن ازىرلەپ بەكىتتىك, جاقىندا. ونىڭ اياسىندا عالىمداردىڭ سانىن 1,5 ەسەگە ۇلعايتۋ, عىلىمي ينستيتۋتتاردى دامىتۋ, عىلىمي-زەرتتەۋلەردى كوممەرتسيالاندىرۋ, جاستاردى عىلىمعا تارتۋ جانە ۋنيۆەرسيتەت عىلىمىن دامىتۋ كوزدەلەدى», دەدى ءاليحان سمايىلوۆ.
ونىڭ ايتۋىنشا, مەملەكەت باسشىسىنىڭ تاپسىرماسىنا سايكەس, عىلىمدى قارجىلاندىرۋ 2020 جىلعى 89 ميلليارد تەڭگەدەن بيىل ونىڭ كولەمى 160 ميلليارد تەڭگەگە دەيىن ۇلعايتىلدى. 2025 جىلعا قاراي قارجىلاندىرۋ كولەمىن 240 ميلليارد تەڭگەگە دەيىن ارتتىرۋ جوسپارلانىپ وتىر. وتكەن جىلى عالىمداردىڭ جالاقىسى ەكى ەسە ءوستى. بيىل 20 پايىزعا كوبەيدى, الداعى جىلدارى جىل سايىن 20 پايىزعا ارتادى.
«گرانتتار كونكۋرسىنىڭ قورىتىندىسىنا قاراماستان, بازالىق قارجىلاندىرۋ اياسىندا 700 عالىم جالاقىمەن قامتاماسىز ەتىلدى. ىرگەلى عىلىمعا قاراجات گرانتتار كونكۋرسىنان تىس بولىنەدى. ۇلتتىق عىلىمي كەڭەستەر شەشىمدەرىنىڭ وبەكتيۆتىلىگى ارتا ءتۇستى, اپەللياتسيالىق كوميسسيا قۇرىلدى. قازاقستاننىڭ عالىمدارى جىل سايىن الەمنىڭ جەتەكشى عىلىمي ورتالىقتارىنا تاعىلىمدامادان وتۋگە جىبەرىلەدى. جاس عالىمدارعا 1000 گرانتقا دەيىن بولىنەدى. 2020 جىلى 40 جاسقا دەيىنگى جاس عالىمداردىڭ ۇلەسى 38 پايىز بولسا, بۇگىندە بۇل كورسەتكىش 46 پايىزعا جەتتى. جوبالاردى كوممەرتسيالاندىرۋ ۇلەسى 27 پايىزعا ارتتى. قازاقستان رەسپۋبليكاسىنىڭ پرەزيدەنتى جانىنداعى ۇلتتىق عىلىم اكادەمياسىنىڭ مارتەبەسى جوعارىلادى», دەدى ۇكىمەت باسشىسى.
