پرەزيدەنت عىلىم اۋقىمىن كەڭەيتۋ ماقساتىندا ارنايى تاپسىرما بەردى.
«ۋنيۆەرسيتەتتەردەگى عىلىمدى جۇيەلى تۇردە دامىتۋ ءۇشىن عىلىمي مەكەمەلەردىڭ اۋقىمدى جەلىسىن قالىپتاستىرۋ قاجەت. ايماقتاردا اكادەميالىق ارتىقشىلىق ورتالىقتارىن, سونداي-اق تەحنوپاركتەر, ينجينيرينگ حابتارى مەن زەرتحانالار اشۋدى تاپسىرامىن. بۇل رەتتە ايماقتىڭ ەرەكشەلىگىمەن قاتار, عىلىمي-تەحنولوگيالىق جانە ەكونوميكالىق دامۋ باسىمدىقتارىن ەسكەرۋ ماڭىزدى», دەدى قاسىم-جومارت توقاەۆ.
سونىمەن قاتار, مەملەكەت باسشىسى عىلىمعا بولىنگەن قارجى ءتيىمسىز جۇمسالىپ, ءتيىستى جەرگە جەتپەي قالاتىنىنىن نازارعا سالدى.
«عىلىمدى مەملەكەت تاراپىنان قارجىلاندىرۋعا عالىمدار, ناقتىراق ايتقاندا پسەۆدوعالىمدار «مايشەلپەك» رەتىندە قاراماۋى كەرەك ەكەنىن باسا ايتقىم كەلەدى. قارجى گرانتتارىنىڭ كوبىنەسە عىلىمي ماڭىزى, وزەكتىلىگى جوق جوبالارعا بەرىلەتىنى ەشكىمگە جاسىرىن ەمەس. «پاراسات» عىلىمي حولدينگىندە بولعان وكىنىشتى جاعداي – وسىنىڭ انىق مىسالى. بولىنگەن قاراجاتتىڭ ءبارى قۇمعا سىڭگەن سۋداي بولدى. ال ونىڭ بۇرىنعى باسشىسى, حيميا عىلىمدارىنىڭ دوكتورى امەريكا ازاماتتىعىن الىپ, وتباسىمەن بىرگە ەلدەن كەتىپ قالدى», دەدى پرەزيدەنت.
سونداي-اق شەتەلدىك وقۋ ورىندارمەن بىرلەسكەن جۇمىستى ءارى قاراي جالعاسىتىرۋدى تاپسىردى.
«ەلىمىزدەگى زەرتتەۋ ۋنيۆەرسيتەتتەرىنىڭ سانىن بىرتىندەپ كوبەيتۋ قاجەت. شەتەلدىڭ جەتەكشى جوعارى وقۋ ورىندارىنىڭ فيليالدارىن اشۋ تاجىريبەسىن جالعاستىرۋ كەرەك», دەدى قاسىم-جومارت كەمەل ۇلى.
