مەملەكەت باسشىسى عىلىمنىڭ دامۋىنا كەرى اسەر ەتەتىن فاكتورلارعا توقتالدى.
«قازاقستان باسقا پوستكەڭەستىك مەملەكەتتەر سەكىلدى عىلىم دامۋىنىڭ «موبيليزاتسيالىق مودەل» پاراديگماسىنان شىعا الماي قالدى. جوسپارلاۋ مەن باسقارۋدىڭ شەكتەن تىس ورتالىقتانعان جۇيەسى, مەملەكەتتىك قارجىلاندىرۋعا تىم تاۋەلدى بولۋ, عزتكج-عا بيزنەس تاراپىنان سۇرانىستىڭ از بولۋى, كادر تاپشىلىعى, اسىرەسە جاس مامانداردىڭ عىلىمنان كەتۋى – وسى مودەلگە ءتان پروبلەمالار», دەدى پرەزيدەنت.
سونداي-اق قاسىم-جومارت توقاەۆ عىلىم سالاسىنداعى وزەكتى ماسەلەلەردى دە اتاپ ءوتتى. سونىڭ ىشىندە عىلىمعا بولىنەتىن قارجىنىڭ ۇلعايعانىن, بىراق, جۇمسالۋىندا تەڭسىزدىكتەر بار ەكەنىن ايتتى.
«قازىرگى احۋالدى سيپاتتاۋ ءۇشىن مىنا ماسەلەلەرگە توقتالىپ ءوتۋ قاجەت. سوڭعى بەس جىلدا عىلىمعا بولىنەتىن قارجى 60 پايىزعا ارتتى. ال ىشكى جالپى ونىمدەگى عىلىمنىڭ ۇلەسى, كەرىسىنشە, 0,13 پايىزعا تومەندەدى. بۇل قاراجاتتىڭ باسىم بولىگى, ناقتىراق ايتساق, 70 پايىزى بيۋدجەتتەن بولىنەدى. سونداي-اق عىلىمنىڭ ءتۇرلى سالاسىن قارجىلاندىرۋ ىسىندە وتە ۇلكەن تەڭسىزدىك بار. قاراجاتتىڭ 82 پايىزى ىرگەلى جانە قولدانبالى عىلىمعا جۇمسالادى. قالعان 18 پايىزى عانا تاجىريبەلىك-كونسترۋكتورلىق زەرتتەۋلەرگە ارنالعان.
ەلىمىزدە عىلىمي زەرتتەۋلەردى ىسكە جاراتىپ, قولدانىسقا ەنگىزەتىن ءوندىرىس وتە از. كاسىپورىنداردىڭ 65 پايىزى شيكىزات, مەتاللۋرگيا سالاسىندا جۇمىس ىستەيدى. بۇل – ءۇشىنشى تەحنولوگيالىق دەڭگەي دەگەن ءسوز», دەدى قاسىم-جومارت توقاەۆ.
