قىزىلوردا وبلىسىندا جاپپاي توبەلەستەن كەيىن توعىزىنشى سىنىپ وقۋشىسى رەانيماتسياعا ءتۇستى. وقيعا ءۇش كۇن بۇرىن بولعان. وقۋشى اۋرۋحاناعا ءتۇرلى جاراقاتتارمەن جەتكىزىلگەن.
«پوليتسيا وعان سول مەكتەپتىڭ وقۋشىلارى شابۋىل جاساعانىن انىقتادى. ولاردىڭ بەسەۋى ءىس بويىنشا كۇدىكتى دەپ تانىلدى», دەپ مالىمدەدى 24kz.
مەكتەپ ديرەكتورى مەن ونىڭ ورىنباسارى قىزمەتىنەن بوساتىلدى. سونداي-اق 10 پوليتسيا قىزمەتكەرى جازالاندى. بىراق مۇنداي شەشىمگە ءبارى بىردەي كەلىسكەن جوق.
«ول جەردە يدن ينسپەكتور تورتەۋ-اق, بۇكىل اۋماقتى قامتىپ جابۋ مۇمكىندىگى شەكتەۋلى. دەگەنمەن پروفيلاكتيكالىق جۇمىستار جۇرگىزىلىپ جاتىر. مويىندايمىز, كەمشىلىك بار, سول كەمشىلىكتەرمەن جۇمىس ىستەيمىز», دەدى قىزىلوردا وبلىسى پد باستىعىنىڭ ورىنباسارى شامشيدين اميتوۆ.
وبلىستىق ءبىلىم باسقارماسىنىڭ باستىعى قازالى اۋدانىندا عانا ەمەس, وبلىستاعى بارلىق ءبىلىم بەرۋ ۇيىمدارىندا تاربيە جۇمىستارىن كۇشەيتۋ, ءتارتىپ ماسەلەسىنە كوڭىل ءبولۋ, اتا-انالار كوميتەتىنىڭ, انالار مەكتەبى, اكەلەر مەكتەبى سەكىلدى بالالارمەن تىعىز جۇمىس ىستەيتىن قوعامدىق ۇيىمداردىڭ جۇمىسىن كۇشەيتۋ جونىندە ءتيىستى تاپسىرمالار بەرىلگەنىن ايتتى.
