مەملەكەت باسشىسى استانا كۇنىن اتاپ ءوتۋدى باستاپ بەردى

استانا. 4 شىلدە. پرەزيدەنت نۇرسۇلتان نازارباەۆ استانا كۇنىن مەرەكەلەۋدىڭ باستالعانىن بىلدىرەتىن مەملەكەتتىك تۋدى كوتەرۋ راسىمىنە قاتىستى. بۇل تۋرالى «قازاقپارات» حابارلادى. ەلورداداعى «اتامەكەن» ەتنو-مەموريالدى كەشەنىندە وتكەن جيىندا مەملەكەت باسشىسى: «تاۋەلسىزدىگىمىزدىڭ تىرەگى, ەلىمىزدىڭ جۇرەگى استانامىزعا بيىل 16 جىل تولادى. وسىنداي تاريحتاعى قاس قاعىم ۋاقىتتا زور تابىستارعا جەتتىك. بولاشاقتى باعدارلاپ, ەسىلدىڭ بويىندا ەل قوندىرعان ەڭبەگىمىز اقتالدى. استانا تاتۋلىق پەن تۇراقتىلىقتىڭ قۇتتى ورداسىنا اينالدى. قازىر ەلوردا ەۋرازيا كەڭىستىگىندەگى ينتەگراتسيالىق ءۇردىستىڭ بەسىگى بولىپ وتىر. بۇل ەل تاريحىنا, استانا جىلناماسىنا جازىلاتىن وتە بەلگىلى وقيعا. ەلوردا مەرەكەسى قارساڭىندا مەملەكەتتىك تۋىمىزدى كوتەرۋ ءراسىمى – ءبىز ءۇشىن وسىنداي جەتىستىكتىڭ ءبىرى», – دەدى. سونداي-اق, پرەزيدەنت استانا كۇنى قارساڭىندا مەملەكەتتىك تۋىمىزدى كوتەرۋ داستۇرگە اينالعاندىعىن ايتا كەلە: «كوكتە جەلبىرەگەن كوك بايراعىمىز مەرەيىمىزدى اسىرىپ, رۋحىمىزدى بيىكتەتەتىن كيەلى ءرامىزىمىز بولىپ سانالادى. ال قازاقستاندى كەمەل كەلەشەككە باستاعان استانا – ءبىزدىڭ قاستەرلى بويتۇمارىمىز. ءار ۋاقىتتا بايراق, تۋ ەلدىڭ قولىنا ۇستايتىن, قارۋلى كۇشتەردىڭ پانالايتىن, باعالايتىن ەلدىكتىڭ ءرامىزى بولىپ سانالادى», – دەدى. جولدىباي بازار. دەرەككوز: «قازاقپارات». فوتو: alashainasy.kz.