پوليتسيا دەپارتامەنتىنىڭ جەدەل-تەرگەۋ توبى جۇرگىزۋشىنىڭ سوڭعى ايالدامادان قارسى باعىتقا بۇرىلىپ, اۆتوبۋستى قول تەجەگىشىنە قالدىرىپ, كولىكتەن شىعىپ كەتكەنىن انىقتادى. وقيعا بولعان جەردە انىقتاۋشىلار مەن كريميناليستەر جۇمىس ىستەپ جاتىر. قازىر بۇل وقيعا بويىنشا قىلمىستىق كودەكستىڭ 345-بابىمەن سوتقا دەيىنگى تەرگەۋ باستالىپ, اۆتوبۋستىڭ جۇمىسقا جارامدىلىعىن تەكسەرۋ ءۇشىن اۆتوتەحنيكالىق ساراپتاما تاعايىندالدى. ال قوعامدىق كولىك جۇرگىزۋشىسى ۋاقىتشا تەرگەۋ يزولياتورىنا قامالدى.
وسى وقيعادان كەيىن ەرتەسىنە تاڭەرتەڭ شاھارداعى «ديسپەتچەرلىك قىزمەت ورتالىعىندا» جولاۋشى تاسىمالداۋشى كومپانيا باسشىلارىنىڭ قاتىسۋىمەن شۇعىل جيىن ءوتتى. ءوز كەزەگىندە قالالىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى مۇحتار قوقانباەۆ قازا بولعان ازاماتتاردىڭ تۋىستارىنا كوڭىل ايتاتىنىن جەتكىزدى. ول وقيعانىڭ بولۋىنا ادامي فاكتور اسەر ەتكەنىن مالىمدەدى. سوندىقتان جولاۋشى تاسىمالداۋشى 10 كومپانيادا قاۋىپسىزدىك تالاپتارى كۇشەيتىلەتىنىن جانە رەيدتىك ءىس-شارالار ۇيىمداستىرىلاتىنىن باياندادى. ال «TBus» تاسىمالداۋشى كومپانياسىنىڭ باسشىسى ابدىبەك ۇكىباەۆ قويىلىپ وتىرعان تالاپتى تولىق ورىندايتىنىن ايتتى. دەگەنمەن بۇگىنگە دەيىن اۆتوبۋستار تەحنيكالىق تالاپقا ساي شىعارىلىپ جاتقانىن, جۇرگىزۋشىلەر مەديتسينالىق تەكسەرۋدەن وتكىزىلەتىنىن جەتكىزدى. وسىلاي دەپ بولعان جاعدايعا بايلانىستى وكىنىشىن ءبىلدىردى.
جيىندا جەرگىلىكتى پوليتسيا دەپارتامەنتى جانە اكىمشىلىك پوليتسيا تاراپىنان تەكسەرىس جۇرگىزىلەتىنى ايتىلدى. ەندىگى جەردە 3 اۋىسىممەن جۇمىس ىستەيتىن 50-60 اكىمشىلىك پوليتسيا ەكيپاجى اۆتوبۋستاردىڭ جول ءجۇرۋ ەرەجەسىنە ەرەكشە كوڭىل بولەدى.
جانتۇرشىگەرلىك جاعداي الەۋمەتتىك جەلىدە دە قىزۋ تالقىلاندى. وسى رەتتە كەيبىر وقىرماندار بار كىنانى كوندۋكتورسىز جۇيەگە ارتىپ, ولار بولعاندا مۇمكىن تەجەگىشتى تارتىپ ۇلگەرەر مە ەدى دەگەن ۇمىتتەرىن ءبىلدىرىپ جاتتى. بۇعان قاتىستى جولاۋشىلار كولىگى جانە اۆتوموبيل جولدارى باسقارماسىنىڭ باسشىسى م.قوقانباەۆ پىكىر ءبىلدىرىپ, كوندۋكتورسىز جۇيەنى بۇل ماسەلەگە مۇلدەم ارالاستىرماۋىن ءوتىندى. «كەرىسىنشە كوندۋكتورلاردى الىپ تاستاعان سوڭ اۆتوبۋستاردىڭ ءبىر-بىرىمەن جارىسى توقتاعان. سونىڭ ناتيجەسىندە كولىكتەردىڭ بۇزىلۋ وقيعالارى دا ازايعان. سوسىن كوندۋكتورلار بار كەزدە جوسپار بولاتىن. ونى ورىنداۋ ءۇشىن اۆتوبۋستار جانتالاساتىن. قازىر ەلەكتروندى تولەمنىڭ ناتيجەسىندە جوسپار جويىلىپ, اۆتوبۋستار تەك كەستەمەن جۇرەتىن بولدى. جۇرگىزۋشىلەردىڭ ايلىق جالاقىسى دا ءبىرشاما كوتەرىلدى», دەدى باسقارما باسشىسى.
ال قايعىلى وقيعاعا سەبەپكەر بولعان ادام فاكتورىنا بايلانىستى ساۋالعا «Shymkent Bus» كومپانياسىنىڭ باسشىسى ازات قايىپبەك بىلايشا جاۋاپ بەردى.
«وكىنىشكە قاراي, سوڭى 5 ادامنىڭ ولىمىمەن اياقتالعان اپات بولدى. ونى تۋىنداتقان 21-باعىتتاعى اۆتوبۋس ءبىزدىڭ كومپانياعا قارايدى. ءبىز انىقتاعان دەرەككە ساي اۆتوبۋس سوڭعى ايالداما كەلىپ توقتاعان. سول كەزدە بالالى ايەل مىنبەكشى بولادى. الايدا جۇرگىزۋشى سىرتقا شىعىپ كەلەتىنىن ايتىپ, اۆتوبۋستى قول تەجەگىشىندە قالدىرىپ, ەسىگىن ق ۇلىپتاپ تاستاپ كەتەدى. سول كەزدە ارادا 30-40 سەكۋند وتپەي جاتىپ, كولىك تومەن قاراي قوزعالا بەرگەن. قايعىلى وقيعا بولعان سوڭ القىنىپ جەتكەن جۇرگىزۋشى قول تەجەگىشتى تارتىپ قويعان. بىراق ونىڭ الدىندا اۆتوبۋسقا كىرگەن ەكى ازامات ونىڭ قول تەجەگىشتە تۇرماعانىن كورگەن. بۇل جەردە ءبىزدىڭ بولجامىمىز بويىنشا جۇرگىزۋشى قول تەجەگىشىن تارتۋىن تارتقان, الايدا ول سوڭىنا دەيىن قويىلماي قالعان. ياعني جۇرگىزۋشى اۆتوبۋستىڭ تەجەگىشتە تۇرعانىنا ناقتى كوز جەتكىزبەگەن. ەندى بۇل ىسكە ناقتى نۇكتەنى تەرگەۋ ناتيجەسى قويادى. اۆتوبۋستىڭ تەحنيكالىق جاعدايى ما, الدە جۇرگىزۋشى كىنالى مە, سول كەزدە انىقتالادى. ال كومپانيا ءوز تاراپىنان اۋرۋحاناعا تۇسكەندەرگە جانە قايتىس بولعان ازاماتتاردىڭ وتباسىلارىنا مورالدىق-ماتەريالدىق كومەك كورسەتۋگە دايىن», دەدى ا.قايىپبەك.
جالپى, جيىندى ۇيىمداستىرۋشىلار بۇل باسقوسۋ بىرەۋدى كىنالاۋ ەمەس, اقىلداسۋ, سالاداعى پروبلەمالاردى اتاپ كورسەتىپ, ولاردىڭ شەشىلۋ جولدارىن تالقىلاۋ ەكەنىن جەتكىزدى. وسى ورايدا جولاۋشىلار تاسىمالىندا قوردالانعان ماسەلەلەر بارشىلىق بولىپ شىقتى. ماسەلەن, بۇگىنگى تاڭدا سالادا 300-400-دەي اۆتوبۋس جۇرگىزۋشىسى جەتىسپەيدى. ونىڭ ءبىر سەبەبى, كوپشىلىگى ايلىق جالاقىسى جوعارى دەپ استانا, الماتى قالالارىنا كەتىپ قالسا, ەكىنشىدەن جۇرگىزۋشىلىك كۋالىكتىڭ D ساناتىن الۋ جانە ونىمەن جۇمىسقا كىرۋ قيىنداپ كەتكەن.
ايتا كەتۋ كەرەك, قالادا جولاۋشىلار تاسىمالىمەن 10 كومپانيا اينالىسادى. اۆتوبۋس جۇرگىزۋشىلەرى 2 كۇن جۇمىس ىستەپ, 2 كۇن دەمالادى. ياعني جۇمىس جۇكتەمەسى ايىنا 15 كۇندى قۇرايدى.
شىمكەنت
