ءىس-شاراعا ارنايى كەلگەن اقىننىڭ ۇلى, قازاقستان جازۋشىلار وداعىنىڭ مۇشەسى باقىتجان سوۆەت ۇلى اكەسى تۋرالى جىلى ەستەلىكتەرىمەن ءبولىستى. سونداي-اق ول وقۋشىلار اراسىندا ۇيىمداستىرىلعان «الىمقۇلوۆ وقۋلارى» بايقاۋىنىڭ جەڭىمپازدارىن ماراپاتتاپ, اكەسىنىڭ ولەڭدەرىن جاتقا وقىعان جاسوسپىرىمدەرگە ريزاشىلىعىن جەتكىزدى.
«ۇمىتىپ كەتپە مەنى» تاقىرىبىندا وتكەن ءىس-شارا بارىسىندا بەلگىلى اقىننىڭ باۋىرلارى ابزابەك, يسلامبەك الىمقۇلوۆتار قالامگەردىڭ كىسىلىك بەينەسى, شىعارماشىلىعى تۋرالى پىكىرلەرىن ورتاعا سالسا, قازاقستاننىڭ ەڭبەك سىڭىرگەن ءارتىسى, تەاتر اكتەرى اسقاربەك سەيىلحان اكەسىنىڭ ولەڭدەرىن ناسيحاتتاۋدا ايانباي ەڭبەك ەتىپ جۇرگەن باقىتجان سوۆەت ۇلىنا, اۋداندىق كىتاپحانا ۇجىمىنا العىسىن ءبىلدىردى.
«جۇرت بالالار اقىنى رەتىندە تانىعان سوۆەت الىمقۇلوۆتىڭ ليريكالىق ولەڭدەرى دە جەتىپ-ارتىلادى. ونىڭ «قول اينا», «سىبىزعى», ء«ورىمتال» سەكىلدى وزگە دە جيناقتارى وقىرمان قاۋىمدى باۋراپ الاتىنى راس. بالالار الەمىنىڭ باعبانىنا اينالعان اقىننىڭ شىعارمالارى جاس ۇرپاقپەن بىرگە ۇزاق جاسايتىنىنا كۇمانىمىز جوق», دەدى قازاقستان جازۋشىلار وداعى وبلىستىق فيليالىنىڭ ديرەكتورى, اقىن حاميت ەسامان ادەبي كەشتە سويلەگەن سوزىندە.
اۋدان اكىمىنىڭ ورىنباسارى الىبەك تەرلىكباەۆتىڭ ايتۋىنشا, تۇرار رىسقۇلوۆ اۋدانىنان شىققان قالامگەرلەردىڭ شىعارمالارىن ناسيحاتتاۋعا ارنالعان ءىس-شارالار لەگى مۇنىمەن توقتاپ قالماق ەمەس. ادەمى اندەرمەن ادىپتەلگەن كەش اقىن سوزىنە جازىلعان «ۇمىتىپ كەتپە مەنى» انىمەن تۇيىندەلدى.
جامبىل وبلىسى,
تۇرار رىسقۇلوۆ اۋدانى,
قۇلان اۋىلى
