قاسىم-جومارت توقاەۆ شاقىرۋىن قابىل الىپ, استاناعا رەسمي ساپارمەن كەلگەنى ءۇشىن يلحام اليەۆكە العىس ايتتى.
«بىلتىر تامىز ايىندا مەن باكۋگە ساپارمەن باردىم. بۇل ساپارىم اسا ناتيجەلى بولدى جانە ەكىجاقتى قاتىناستارعا تىڭ سەرپىن بەردى. قازىر پرەزيدەنتتەردىڭ ەكى ەل ۇكىمەتىنە بەرگەن تاپسىرمالارىنىڭ ورىندالۋ بارىسىن پىسىقتاۋ قاجەتتىلىگى تۋدى. ازەربايجان مەن قازاقستان – باۋىرلاس ءارى دوستاس مەملەكەتتەر. ءبىزدىڭ تاراپىمىزدان ساۋدا-ەكونوميكا جانە ينۆەستيتسيا سالالارىنداعى جان-جاقتى ىنتىماقتاستىقتى, سونداي-اق ەكىجاقتى فورماتتاعى جانە حالىقارالىق ۇيىمدار اياسىنداعى ساياسي قارىم-قاتىناستى دامىتۋ ءۇشىن بارلىق مۇمكىندىك جاسالىپ جاتىر. ءبىز كاۆكاز ايماعىندا جەتەكشى ءرول اتقاراتىن ازەربايجان مەملەكەتىمەن ەكونوميكالىق قاتىناستار مەن ىنتىماقتاستىقتى دامىتۋ ءۇشىن اۋقىمدى جۇمىس جۇرگىزۋدى كوزدەپ وتىرمىز. ءبىزدىڭ ارامىزدا ەشقانداي ماسەلە جوق. تەك قانا وسى باعىتتا العا ىلگەرىلەۋگە دەگەن نيەت قانا بار», دەدى قاسىم-جومارت توقاەۆ.
ءوز كەزەگىندە يلحام اليەۆ قازاقستاندىقتارعا قوناقجايلىلىعى ءۇشىن العىس ايتىپ, قوس تاراپ اراسىنداعى ىنتىماقتاستىق گۇلدەنە بەرەتىنىنە سەنىم ءبىلدىردى.
«قۇرمەتتى قاسىم-جومارت كەمەل ۇلى, ەڭ الدىمەن, ارنايى شاقىرعانىڭىزعا جانە قوناقجايلىعىڭىزعا العىس ايتامىن! گەيدار اليەۆكە كورسەتكەن قۇرمەتىڭىز ءۇشىن بۇكىل ازەربايجان حالقىنىڭ جانە جەكە ءوز اتىمنان ريزاشىلىعىمدى بىلدىرگىم كەلەدى. جالپى, ءبىز بارشا قازاقستان حالقىنىڭ ەلىمىزگە دەگەن ىستىق ىقىلاسىن ارقاشان سەزىنىپ كەلەمىز. ازەربايجانعا رەسمي ساپارىڭىز بارىسىندا وسىنداي تىلەۋلەستىكتى ءسىز دە بايقادىڭىز دەپ ويلايمىن. ءبىزدىڭ رەسمي ساپارلار اياسىندا ءجيى كەزدەسۋىمىز وسى قارىم-قاتىناسىمىزدىڭ سيپاتىن اڭعارتادى جانە ۇدايى بايلانىستا بولۋ قاجەت ەكەنىن كورسەتەدى.
ءوزىڭىز ايتقانداي, ءبىزدىڭ ەلدەرىمىزدىڭ ءبىر-بىرىنە دەگەن باۋىرلاستىق نيەتى شىنايى. بۇل – ەكىجاقتى ىنتىماقتاستىقتى دامىتۋعا جاقسى نەگىز. ىنتىماقتاستىق باعىتتارىنا كەلەتىن بولساق, ولاردى سانامالاۋعا ءبىراز ۋاقىت كەتەدى. ويتكەنى ول قوعامنىڭ بارلىق سالاسىن قامتيدى. ارينە, قازىرگى جاعدايدا ساۋدا-ەكونوميكالىق جانە ينۆەستيتسيالىق جوبالار, سونداي-اق كولىك-لوگيستيكالىق ينفراقۇرىلىمعا قاتىستى جوبالار باسىمدىققا يە», دەدى ازەربايجان پرەزيدەنتى.
