جاڭا جوبالاردى ىسكە قوسۋ مەن ازاماتتىق ءوندىرىستى دامىتۋ اياسىندا «قازاقستان ينجينيرينگ» ۇلتتىق كومپانياسىنا قاراستى «ەۆروكوپتەر قازاقستان ينجينيرينگ» زاۋىتىندا H145 جانە H125 ماركىلى تىكۇشاقتارى جيناقتالىپ, تاپسىرىس بەرۋشىلەرگە تابىستالدى.
Airbus Helicopters H145-ءتىڭ العاشقى داناسى توتەنشە جاعدايلار مينيسترلىگىنە بەرىلدى. بۇل ۇلگىدەگى مودەل Airbus-تىڭ قوس موتورلى تىكۇشاقتارى توبىنا جاتادى.
«اتالعان اۋە تەحنيكاسىنىڭ ساپاسى الەمدىك ءوندىرۋشى كومپانيالاردىڭ قولدانىستاعى ستاندارتتارىنا, سونداي-اق ەۋروپالىق اۆياتسيالىق قاۋىپسىزدىك اگەنتتىگىنىڭ (EASA) ۇشۋ جارامدىلىعىنىڭ نورمالارىنا ساي كەلەدى. H145 اۋەگە كوتەرىلگەندە 5 قالاقتى روتور تەربەلىستى ايتارلىقتاي تومەندەتۋگە سەپتىگىن تيگىزدى. بۇل جوعارى تەربەلىستى باسەڭدەتۋ جۇيەسىن قاجەت ەتپەيتىنىن كورسەتتى. ناتيجەسىندە پايدالى جۇكتەمە 150 كەلىگە دەيىن ۇلعايتىلدى. وسى تىكۇشاق ءوز ساناتىندا اۋىر سالماقتى اۋە تەحنيكاسى سانالادى. مىسالى, 2019 جىلى H145 اند تاۋىنىڭ بيىكتىكتىگى 6 961 مەتر بولاتىن اكونكاگۋا شىڭىنا ءساتتى قونىپ, تەحنيكالىق سيپاتتاماسى وڭ جاعىنان بايقالدى», دەدى «قازاقستان ينجينيرينگ» ۇك» اق باسقارما توراعاسى تەمىرجان ءابدىراحمانوۆ.
قازىر تجم-ءنىڭ اۆياتسيالىق پاركى وتاندىق جانە شەتەلدىك اۋە قۇرالدارىمەن, ونىڭ ىشىندە H145, H130 سىندى تىكۇشاقتارمەن تولىقتىرىلعان.
بۇدان باسقا Dala Air اۋە كومپانياسىنا H125 تىكۇشاعىن تابىستاۋ ءراسىمى وتكىزىلدى. H125 – Airbus كومپانياسىنىڭ ءبىر موتورلى تىكۇشاعى. ونىڭ نارىقتا ساتىلىپ كەلە جاتقانىنا 40 جىلدان اسىپ, كەيىنگى 30 جىلدا ءوز ساناتىندا كوش باستاپ كەلەدى. تەحنيكالىق مۇمكىندىگى جاعىنان بۇل تىكۇشاق امبەباپتىعىمەن, قاۋىپسىزدىك دەڭگەيى, سونداي-اق قولايلى قۇنى جانە شۇعىل جاعدايلارداعى ۇتقىرلىعىمەن ءوز باسەكەلەستەرىنەن وزىق بولىپ تۇر. FADEC تسيفرلى باسقارۋ جۇيەسىمەن جاراقتالعان قۋاتتى قوزعالتقىش H125-ءتى 7 مىڭ مەتر بيىكتىككە دەيىن كوتەرۋگە مۇمكىندىك بەرەدى.
جوعارىدا اتالعان تىكۇشاقتاردى ىزدەستىرۋ-قۇتقارۋ جۇمىستارىندا, مەديتسينالىق كومەك كورسەتۋ مەن سانيتارلىق ءىس-شارالار جۇرگىزۋدە, جابايى اڭدار مەن جانۋارلاردى ساناۋدا, ورمان قورىنا باقىلاۋ جاساپ, قورعاۋ شارالارىنا پايدالانۋ جوسپارلانىپ وتىر. اۋە قۇرالى قازاقستاننىڭ كليماتتىق جانە گەوگرافيالىق جاعدايلارىنا قولدانۋعا تولىق جارامدى, سونىمەن بىرگە بيىك تاۋلى جەرلەر مەن ىستىق كليماتتى ۋاقىتتاردا ۇشۋعا بەيىمدەلگەن.
ەلىمىزدىڭ اۆياتسيالىق بولىمشەلەرى مەن تەحنيكالىق قۇرامى جاڭا تىكۇشاقتاردى تىزگىندەپ, ولارعا قىزمەت كورسەتۋگە بايلانىستى تەوريالىق ءارى تاجىريبەلىك دايارلاۋدان وتكەن.
