قازىرگى كۇنى راشيدا يۋكسەل جەرگىلىكتى سايلاۋ زاڭناماسىنا سايكەس تۇركيا ۇلى ۇلتتىق ماجىلىسىنە دەپۋتات بولۋ ءۇشىن ءۇش كەزەڭنەن تۇراتىن ىرىكتەۋدەن وتكەن. ەندى سوڭعى كەزەڭدە پارتيالىق ءتىزىم بويىنشا كىمنىڭ دەپۋتات بولاتىنىن پارتيا توراعاسى, ياعني ەل پرەزيدەنتى بەكىتەدى.
«ىستانبۇلدا ءۇش ۋچاسكە بويىنشا 98 ادام پارلامەنت دەپۋتاتى بولادى. سايلاۋ قورىتىندىسى بويىنشا وسى ورىندار پارتيالار اراسىندا بولىنەدى. ەگەر مەن سايلاناتىن بولسام, 70 جىلدان بەرى تۇركيا پارلامەنتىنە وتكەن تۇڭعىش قازاق بولماقپىن. سوندىقتان قازاقستاندىق باۋىرلارىم دا ماعان تىلەۋلەس بولسا دەيمىن. ەگەر دەپۋتات بولسام, ەڭ الدىمەن باۋىرلاس ەكى ەل قازاقستان مەن تۇركيا اراسىنداعى قارىم-قاتىناستى نىعايتۋعا بارىنشا كۇش سالامىن», دەدى تۇركيا پارلامەنتى دەپۋتاتتىعىنا ۇمىتكەر راشيدا يۋكسەل.
راشيدا يۋكسەلدىڭ نەگىزگى ماماندىعى دارىگەر. زەيتىن-بۋرنۋ اۋدانىندا دۇنيەگە كەلگەن. 400 مىڭعا جۋىق ادام تۇراتىن بۇل اۋداندا قازاقتار كوپ شوعىرلانعان. راشيدا يۋكسەل وسى جەردەگى قازاقتار اراسىنان شىققان تۇڭعىش ايەل دارىگەر جانە ءماسليحات دەپۋتاتى ەكەن.
«اكەمە مۇندا جەر مەن ءۇي بەرىپتى. وسى جاقتا اكەم «بالالارىم وقۋى كەرەك» دەپ ءبىزدى وقۋعا بەردى. ۇيدە جەتى اعايىندىمىز. اتا-انامىز ءبارىمىزدى وقىتتى. بۇل جاقتا قىزدار وقىمايتىن. اكەمنىڭ ارقاسىندا مەن قازاقتان شىققان تۇڭعىش دارىگەر قىز بولدىم. 27 جىل دارىگەر بولىپ, 2014 جىلى زەينەتكە شىقتىم», دەيدى راشيدا يۋكسەل.
زەينەتكە شىققان سوڭ ول اۋداننىڭ قوعامدىق ومىرىنە بەلسەنە ارالاسىپ, بيلىكتەگى «AK Parti» پارتياسىنان سايلاۋعا قاتىسىپ, ءماسليحات دەپۋتاتى اتانادى. بۇعان قوسا, پارتيانىڭ ايەلدەر ءىسى جونىندەگى كوميسسياسىنىڭ مۇشەسى.
