ەنەرگەتيكا مينيسترلىگىنىڭ تۇسىندىرۋىنشە, بۇل قىسقارتۋ 2022 جىلعى 5 قازانداعى وپەك+ 33-ءشى مينيسترلىك كەزدەسۋىندە قابىلدانعان ءوندىرىستى قىسقارتۋعا قوسىمشا الدىن الۋ شاراسى. «2023 جىلدىڭ مامىر ايىنان باستاپ وپەك+ باسقا قاتىسۋشى ەلدەرىمەن بىرگە ءوندىرۋدى تاۋلىگىنە 78 مىڭ باررەلگە قىسقارتۋدى جۇزەگە اسىرادى», دەلىنگەن مينيسترلىك تاراتقان اقپاراتتا.
الايدا وسى قىسقارتۋ تۋرالى جاڭالىق مۇناي نارىعىنا ءتاۋىر اسەرىن تيگىزگەن سياقتى. ءبىرازدان بەرى قۇلدىراپ تۇرعان «قارا التىن» باعاسى 7 پايىزعا كوتەرىلىپ, قازىر باررەلىنە 85 دوللاردان اسىپ تۇر. نارىقتا ۇسىنىستىڭ ازايۋى باعانىڭ كوتەرىلۋىنە جول اشتى.
Rystad Energy ساراپشىلارى الداعى جازدا Brent باعاسى باررەلىنە 110 دوللارعا دەيىن ءوسۋى جانە جىل سوڭىنا دەيىن سول مەجەسىندە قالۋى مۇمكىن دەپ بولجايدى. UBS تە سونداي كوزقاراستا, ال Goldman Sachs مۇناي باعاسىن شامامەن 95 دوللار توڭىرەگىندە ايالدايدى دەپ پىكىر ءبىلدىرىپتى.
ساۋد ارابياسىنىڭ ەنەرگەتيكا مينيسترلىگى نارىقتاعى مۇناي كولەمىن كەنەتتەن قىسقارتۋدى «مۇناي نارىعىنىڭ تۇراقتىلىعىن ساقتاۋ ءۇشىن جاسالعان ساقتىق شاراسى رەتىندە قاجەت», دەپ تۇسىندىرگەن. ال اقش بولسا ينفلياتسيامەن كۇرەسۋ جانە ەنەرگيا تاسىمالداۋشىلار باعاسىن تومەندەتۋ ءۇشىن ءوندىرىستى ارتتىرايىق دەۋمەن كەلە جاتىر. مۇناي نارىعى بويىنشا تاۋەلسىز ساراپشى ناتان پايپەردىڭ ايتۋىنشا, وندىرۋشىلەر وسىنداي قادامعا بارۋ ارقىلى ورتا مەرزىمدى پەرسپەكتيۆادا باعانى باررەلىنە 80 دوللار دەڭگەيىندە ۇستاپ تۇرۋعا ۇمتىلاتىن سەكىلدى.
ەنەرگەتيكا ەكس-ءمينيسترى بولات اقشولاقوۆتىڭ ايتۋىنشا, ءار مەملەكەتتەگى شەكتەۋ كولەمى ءارتۇرلى. بىزدەگى شەكتەۋ – 5 پايىزدىڭ ماڭايىندا.
«قازاقستاننىڭ ءوز ىشىندەگى كولەمنىڭ تومەندەۋى باعاعا اسەر ەتپەيدى. 4,7 پايىزعا تومەندەتۋ – نەگىزىنەن, ءبىزدىڭ كەن ورىندارىن پايدالانۋداعى تەحنيكالىق قاتەلەر شەگىندەگى قىسقارتۋ. ءبىزدىڭ كەن ورىندارىنىڭ تەحنيكالىق قاتەلىگى 10-نان 20 پايىزعا دەيىن, بۇل جوبالىق قۇجاتقا ەنگىزۋدى قاجەت ەتپەيدى. سوندىقتان 4-5 پايىز شامامەن تەحنولوگيالىق دەڭگەيدىڭ قاتەلىگى بولىپ سانالادى», دەيدى مينيستر.
ەكونوميست اكىمجان ارۋپوۆتىڭ سوزىنشە, تاۋار ازايعان كەزدە عانا ساتۋشى ءوز تاۋارىن قىمباتقا وتكىزە الادى. سوندىقتان وپەك+ بۇل رەتتە گەوساياسي, گەوەكونوميكالىق احۋالدى, وتە جوعارى دەڭگەيدەگى قۇبىلۋدى ەسكەرىپ, وسىنداي شەشىم قابىلداپ وتىر.
قازاقستان مۇناي سەرۆيستىك كومپانيالار وداعىنىڭ مالىمدەۋىنشە, مۇناي باعاسىنىڭ ءوسۋى ينفلياتسيانىڭ ودان ءارى قاراي ورىستەۋىنە جول اشادى. «قازىر كوپشىلىك جوعارى ينفلياتسيادان زارداپ شەگىپ وتىر. بۇل – توتەنشە احۋال. ءبىزدىڭ جيعان-تەرگەن قاراجاتىمىز كوز الدىمىزدا قۇمعا سىڭگەن سۋداي جوعالىپ بارا جاتىر. سوندىقتان تۇپكىلىكتى سەبەپتەردى ءتۇسىنۋ ماڭىزدى. وپەك+ جانە رەسەيدىڭ مۇناي ءوندىرىسىن قىسقارتۋى – سول سەبەپتەردىڭ ءبىرى. قىسقارتقاننان كەيىن باعا ءوسىپ جاتىر. ەگەر باعا وسسە وندا باسقا باعالار دا وسە باستايدى. بۇل جەردە اڭگىمە تەك بەنزين تۋرالى ەمەس, مۇنايدى پايدالانا وتىرىپ وندىرىلەتىن وزگە دە تاۋارلارعا قاتىستى. ال ولار وتە كوپ – پارفيۋمەريا, كامپيت, اسپيرين, ت.ب. اقش, جاپونيا جانە ەو كوپ مۇناي يمپورتتايتىندىقتان, ولاردىڭ كوبىرەك تولەۋىنە تۋرا كەلەدى. سونداي-اق مۇناي ءوندىرىسىنىڭ قىسقارۋى مۇناي يندۋسترياسىندا جۇمىس ورىندارىنىڭ قىسقارۋىنا دا الىپ كەلەدى. اسىرەسە, مۇناي وڭدەۋ سالاسىنا تەرىس ەففەكتىسىن بەرەدى», دەپ مالىمدەمە جاسادى وداق.
