فوتو: zakon.kz
تۇرعىندار ءوز قالاۋلارى بويىنشا كورشى كوشەلەردەگى جاقىن تۋىستارىنىڭ ۇيىنە ورنالاسىپ, قۇتقارۋشىلار ەلدىڭ قولىنداعى ءىرىلى-ۇساقتى مالدى قاۋىپسىز جەرگە ايداپ شىعارعان.
552 ادام تۇراتىن قارامىرزا تۇرعىندارىنا سۋ تاسقىنىنان تونەتىن قاۋىپ تۋرالى الدىن الا حابارلانعان. اۋىل اكىمدىگىنىڭ عيماراتىندا اشىلعان جەدەل شتاب مۇشەلەرى ءۇيدى-ءۇيدى ارالاپ, تۇرعىندارعا قانداي كومەك كەرەك ەكەنىن انىقتاۋ, قاجەت بولعان جاعدايدا پسيحولوگيالىق كومەك كورسەتۋ شارالارىن قولعا الىپ جاتىر. قاۋىپتى ايماقتا قۇرامىندا 36 ادام, 13 تەحنيكا, 3 قايىق, 14 موتوسورعى, 1 درونى بار قۇتقارۋ قىزمەتى, جەرگىلىكتى اتقارۋشى ورگاندار مەن پوليتسيا كۇشتەرى ءجۇر.
بۇگىندە قارامىرزا, زەلەنوۆ, جەلەزنودوروجنىي, وكتيابرسك, قاراسۋ جانە ۆوستوك اۋىلدارى ەرەكشە باقىلاۋعا الىنعان. قارامىرزا اۋىلىندا ءتىنتۋىر وزەنىندەگى سۋ دەڭگەيى مەن ەرىگەن قار سۋىن كۇنى-ءتۇنى قاداعالاپ وتىراتىن ەكى باقىلاۋ بەكەتى قويىلعان.
– وسىدان ەكى كۇن بۇرىن قاردىڭ كۇرت ەرۋىنە بايلانىستى اتىز-اتىزدان جينالىپ كەلىپ قۇيىلعان قىزىل سۋدىڭ سالدارىنان ءتىنتۋىر وزەنىنىڭ دەڭگەيى 2 مەتر 30 سانتيمەترگە دەيىن كوتەرىلدى. كەمەرىنەن اسقان سۋ 6-7 ساعاتتىڭ ىشىندە قارامىرزا اۋىلىنا جەتتى. قازىر بۇل اۋىلداعى 35 تۇرعىن ءۇي, 60 اۋلا سۋ استىندا قالىپ وتىر. كورشىلەس مولودەجنىي اۋىلىندا دا ءبىر ءۇيدى سۋ باسىپ كەتتى. زارداپ شەككەندەر جوق, جاعدايدى باقىلاۋدا ۇستاپ وتىرمىز, – دەدى وبلىستىق تجد-نىڭ قوعاممەن بايلانىس توبىنىڭ وكىلى ءۋاليحان دوسانوۆ.
سۋ تاسقىنىنا بايلانىستى قاراسۋ اۋدانىنا جۇمىس ساپارىمەن بارعان وبلىس اكىمى قۇمار اقساقالوۆ اۋدان حالقىمەن كەزدەسۋىندە تاسقىن سۋدان زارداپ شەككەن وتباسىلار ءۇشىن جاڭا تۇرعىن ۇيلەر سالىناتىنىن ايتتى.
– سۋ تاسقىنىنان زارداپ شەككەندەرگە مەملەكەت ماتەريالدىق كومەك كورسەتەدى. جەرگىلىكتى اۋىل شارۋاشىلىعى كاسىپورىندارىنىڭ باسشىلارى باسپاناسىن سۋ باسقان تۇرعىندارعا قاۋىپسىز جەردەن جاڭا ۇيلەر سالىپ بەرۋگە ۋادە ەتىپ وتىر. كاسىپكەرلەردىڭ تۇرعىن ءۇي سالۋعا جۇمساعان شىعىندارىنىڭ 50 پايىزىن مەملەكەت سۋبسيديالايتىن بولادى. بيىل سۋ دەڭگەيى 2,5 مەترگە كوتەرىلدى, سوندىقتان ينجەنەرلىك قۇرىلىستاردى جاساۋ مۇمكىن ەمەس. جالعىز دۇرىس شەشىم – تۇرعىنداردى قاۋىپسىز جەرگە كوشىرۋ, – دەدى اكىم.
توتەنشە جاعداي دەپارتامەنتىنىڭ سوڭعى مالىمەتىنشە, قارامىرزا اۋىلىنداعى تاسقىن سۋدىڭ بەتى قايتا باستاعان. ماماندار ءتىنتۋىر وزەنىندەگى سۋ دەڭگەيى 1 مەتر تومەندەگەنىن ايتىپ وتىر. ناتيجەسىندە, 17 ءۇيدىڭ اينالاسىنداعى سۋ كەرى قايتقان. قازىرشە 18 ءۇي, 60 اۋلا قىزىل سۋدىڭ قۇرساۋىندا قالىپ وتىر. ەۆاكۋاتسيالانعان 39 ادامنىڭ 15-ءى ءوز ۇيلەرىنە قايتىپ ورالعان.
قازىر قۇتقارۋشىلار جىلجىمالى موتوسورعىلاردىڭ كومەگىمەن سۋ باسقان تۇرعىن ۇيلەردى قۇرعاتۋ جۇمىستارىن جۇرگىزىپ جاتىر.
قوستاناي وبلىسى
