اتالعان ورتالىقتىڭ حيرۋرگتەرى ەكىباستۇزدان كەلگەن ناۋقاستى ءبىراز جىل قيناعان اۋرۋىنان قۇتقاردى. وپەراتسيا ءمامس جۇيەسى اياسىندا جاسالدى.
بۇل اۋرۋ العا قاراۋ ءۇشىن ادامنىڭ باسىن كوتەرۋىنە مۇمكىندىك بەرمەيدى. ناۋقاستىڭ بۇل سىرقاتتان زارداپ شەككەنىنە بىرنەشە جىل بولعان. مۇنداي اۋرۋعا وپەراتسيا جاساۋ وتە قيىن جانە سيرەك جاسالادى ەكەن. ءتىپتى رەسەي دارىگەرلەرى دە ناۋقاستى قابىلداۋدان باس تارتقان.
اكادەميك ن.ج.باتپەنوۆ اتىنداعى ۇلتتىق عىلىمي تراۆماتولوگيا جانە ورتوپەديا ورتالىعىنىڭ حيرۋرگتەرى جوعارى تەحنولوگيالىق مەديتسينا كومەگىمەن 6 ساعات بويى وپەراتسيا جاسادى. ءساتتى جاسالعان وپەراتسيادان كەيىن پاتسيەنت وڭالتۋ ەمشاراسىن قابىلداپ جاتىر.
«جازعا قاراي ۆلاديمير بەلسەندى ءومىر سالتىنا تولىققاندى كوشەدى دەپ ۇمىتتەنەمىز. ەڭ باستىسى – وڭالتۋ كەزەڭىنەن دۇرىس ءوتۋ», دەيدى ومىرتقا پاتولوگياسى ءبولىمىنىڭ مەڭگەرۋشىسى سەيدالى ابداليەۆ.
وسىنداي ءبىر عانا كۇردەلى وپەراتسيانىڭ قۇنى ورتا ەسەپپەن بىرنەشە ميلليون تەڭگە تۇرادى. الەۋمەتتىك مەديتسينالىق ساقتاندىرۋ قورىنان مەديتسينالىق قىزمەت كورسەتۋگە قوماقتى قاراجات بولىنەدى. جىل سايىن مەديتسينالىق ساقتاندىرۋ ەسەبىنەن تراۆماتولوگيا, نەيروحيرۋرگيا, كارديوحيرۋرگيا, ۋرولوگيا, ونكولوگيا جانە باسقا دا سالالار بويىنشا كوپتەگەن قىمبات وپەراتسيا جاسالادى. مىسالى, 2022 جىلى ەلوردادا جوعارى تەحنولوگيالىق مەديتسينا كومەگىمەن 7 885 وپەراتسيا جاسالدى.
«وسىنداي كۇردەلى وپەراتسيانى ماعان ءمامس جۇيەسى ارقىلى تەگىن جاسادى. ءساتتى وتكەن وپەراتسيادان كەيىن ءوزىمدى الدەقايدا جاقسى سەزىنەمىن. ورتالىق دارىگەرلەرىنە العىسىم شەكسىز», دەپ ريزاشىلىعىن ءبىلدىردى ۆلاديمير.
اتالعان ورتالىق – تىرەك-قيمىل اپپاراتىنىڭ ەڭ كۇردەلى اۋرۋلارىنا وپەراتسيا جاسايتىن, تراۆماتولوگيا جانە ورتوپەديا ماسەلەلەرى بويىنشا جەتەكشى ۇيىم. وسى ورتالىققا جۇگىنگىسى, ءمامس اياسىندا كومەك العىسى كەلگەن ەمدەلۋشىلەر مەديتسينالىق ساقتاندىرۋ قورىنا حابارلاسۋىنا بولادى. ساراپشىلار سىزگە تمككك شەڭبەرىندە جانە ءمامس جۇيەسىندە مەديتسينالىق كومەك الۋ بويىنشا كەڭەس بەرەدى, مارتەبەسى مەن تولەمى بويىنشا اقپاراتتى تەكسەرەدى, قاجەت بولعان جاعدايدا ماسەلەنى شەشۋگە مەديتسينالىق ۇيىمنىڭ ساراپشىلارىن جۇمىلدىرادى.
