ءسوز باسىندا ىسكەرلىك بايلانىستى دامىتۋدى مۇرات تۇتقان دەلەگاتسيانىڭ ءبىزدىڭ وڭىرگە دەيىن اقتوبە وبلىسى مەن شىمكەنت قالاسىندا بولعانىن ايتا كەتەلىك. الەكسەي تسوي ءوز سوزىندە ەلىمىزدىڭ وزگە وڭىرلەرىندە دە وسىنداي ماڭىزداعى ءىس-شارالار جىل سوڭىنا دەيىن جالعاساتىنىن ايتىپ ءوتتى. ەلدى ەلەڭ ەتكىزگەن ساپاردىڭ باستى ماقساتى – اۋرۋدىڭ الدىن الۋ, دياگنوستيكالاۋ جانە ەمدەۋ مەن جالپى ساۋىقتىرۋ سالاسىندا تاجىريبە الماسۋ.
دەلەگاتسيا قۇرامىندا ورتالىقتىڭ جانە ورتالىق كلينيكالىق اۋرۋحانانىڭ جوعارى بىلىكتى ماماندارى بار. ولار ءوڭىردىڭ ەمدەۋ مەكەمەلەرىندە شەبەرلىك ساباقتارىن وتكىزىپ, پراكتيكالىق جانە كونسۋلتاتسيالىق-ادىستەمەلىك كومەك كورسەتۋدە. ورتالىقتىڭ جەتەكشى ماماندارى ءوڭىردىڭ 340 تۇرعىنىنا تەگىن مەديتسينالىق كومەك كورسەتۋدى جوسپارلاپ وتىر.
جيىن بارىسىندا ءوڭىر باسشىسى وبلىستاعى مەديتسينا سالاسىنىڭ احۋالى تۋرالى بايانداسا, ورتالىقتىڭ اتقارىپ جاتقان اۋماقتى جۇمىستارى جايىندا الەكسەي تسوي تاراتىپ ايتىپ بەردى. مۇنان سوڭ ورتالىق كلينيكالىق اۋرۋحانانىڭ پرەزيدەنتى اسحان برالوۆ بايانداما جاسادى. پرەزيدەنت ءىس باسقارماسى مەديتسينالىق ورتالىعى اۋرۋحاناسىنىڭ ديرەكتورى رۋستام الباەۆ ءوز پىكىرىن ورتاعا سالىپ, الداعى اۋقىمدى جۇمىس تۋرالى تاپتىشتەپ ءتۇسىندىردى. مۇنان سوڭ ەكى جاق ءوزارا ىنتىماقتاستىق مەموراندۋمىنا قول قويدى.
ەندى مەديتسينالىق ورتالىقتىڭ قىزمەتكەرلەرى ءوز تاجىريبەلەرىمەن, سالاداعى سونى جاڭالىقتارمەن بولىسپەك. قازىردىڭ وزىندە بىرلەسە اتقاراتىن 33 ءىس-شارا جوسپارلانىپ وتىر. جيىن سوڭىندا قۇرمەتتى قوناقتاردىڭ قاتىسۋىمەن كوپبەيىندى وبلىستىق اۋرۋحانانىڭ قۇرىلىسى تانىستىرىلدى. سونداي-اق دەلەگاتسيا وبلىس ورتالىعىنداعى مەديتسينالىق مەكەمەلەردىڭ ماتەريالدىق-تەحنيكالىق بازاسىمەن تانىستى.
كوكشەتاۋ
